ఏపీలో శాటిలైట్‌ టౌన్‌ షిప్పులు
మరిన్ని పెట్టుబడుల కోసం మారిటైం పాలసీలో మార్పులు చేయాలని సీఎం చంద్రబాబు అధికారులకు సూచించారు.
ఓడరేవులు, విమానాశ్రయాలకు అనుసంధానించేలా శాటిలైట్‌ టౌన్‌ షిప్పులను ఏర్పాటు చేసి వాటిని అభివృద్ధి చేయాలని ముఖ్యమంత్రి చంద్రబాబు అధికారులకు సూచించారు. ఏపీతో పాటు పొరుగు రాష్ట్రాల సరకు రవాణాను నిర్వహించేందుకు లాజిస్టిక్స్‌ కార్పోరేషన్‌ ఏర్పాటు చేయాలని అధికారులను ఆదేశించారు. సోమవారం సచివాలయంలో పరిశ్రమలు, మౌలిక సదుపాయాలపై ఆయన సమీక్షించారు. ఎయిర్‌ పోర్టులు–పోర్టుల అభివృద్ధి, మారిటైం పాలసీలో తీసుకురావాల్సిన మార్పులు, లాజిస్టిక్స్‌ కార్పోరేషన్‌ ఏర్పాటు వంటి అంశాలపై అధికారులతో చర్చించారు.
ఈ సందర్భంగా సీఎం చంద్రబాబు మాట్లాడుతూ.. ఓడరేవులు, విమానాశ్రయాలు, రహదారులు, రైలు, అంతర్గత జల రవాణా మార్గాల ద్వారా చేపట్టే సరకు రవాణాను ఈ కార్పోరేషన్‌ ద్వారానే నిర్వహించాలని సూచించారు. రాష్ట్రంలో 20 పోర్టులు, మరిన్ని ఎయిర్‌ పోర్టుల నిర్మాణాలకు ప్రణాళికలు సిద్దం చేసుకుంటున్నాం. ప్రతి పోర్టు, ఎయిర్‌ పోర్టుల సమీప ప్రాంతాలను ఆర్ధిక కేంద్రాలుగా అభివృద్ధి చేయాలి. ఓడరేవులు, విమానాశ్రయాలకు అనుసంధానించేలా శాటిలైట్‌ టౌన్‌ షిప్పులను అభివృద్ధి చేయాలి. దీనివల్ల కొత్తగా మరిన్ని ప్రాంతాలు అభివృద్ధి చెందుతాయి. ఆర్థిక కార్యకలాపాలు పెరుగుతాయి. తద్వారా సంపద çసృష్టి జరుగుతుంది. ఈ తరహా సమీకృత అభివృద్ధి ఎక్కడెక్కడ చేయగలమో..ఏ విధంగా చేయగలమనే అంశాలపై బ్లూ ప్రింట్‌ సిద్దం చేయాలని అధికారులకు సూచించారు.
ఇదే సమయంలో సరుకు రవాణపై ప్రత్యేక దృష్టి సారించాలి. రోడ్డు, రైలు, ఎయిర్‌ కార్గో, ఇన్‌ ల్యాండ్, మారి టైమ్‌ కార్గోలకు ఏపీనే కేంద్రంగా ఉండాలి. తక్కువ వ్యయం అయ్యే మార్గం ద్వారా సరుకులను రవాణా చేసుకునే వెసులుబాటు ఉంటుంది. ఉత్తర–దక్షిణాది రాష్ట్రాలకు వెళ్లాలంటే ఏపీనే కేంద్రం. ఇలాంటి పరిస్థితుల్లో ఏపీలో అన్ని రకాల సరుకు రవాణా మార్గాలు అందుబాటులో ఉంటే...అభివృద్ధి వేగంగా జరుగుతుందని సీఎం సూచించారు. పోర్టులు, ఎయిర్‌ పోర్టులకు అనుసంధానంగా నేషనల్‌ హైవే కనెక్టివిటీ, రైల్‌ కనెక్టివిటీ ఉండేలా చూసుకోవాలి. రోడ్లపై ఎక్కడా పాత్‌ హోల్స్‌ లేకుండా ఉండాలి. అలాగే ఇన్‌ ల్యాండ్ వాటర్‌ వేస్‌ కనెక్టివిటీ కూడా ఉంటే.. ఏపీ నుంచే సరుకు రవాణా ఎక్కువగా జరుగుతుంది. కేంద్రం వద్ద నేషనల్‌ హైవేలకు, రైల్వేలకు నిధుల కొరత లేదు. మనం ప్రణాళికలు సిద్దం చేసుకుని ప్రతిపాదనలు పంపితే వాటిని ఇవ్వడానికి కేంద్రం సిద్దంగా ఉంది. దీన్ని మనం సద్వినియోగం చేసుకోవాలని చంద్రబాబు సూచించారు.
రాష్ట్రంలో వివిధ మార్గాల ద్వారా చేపట్టే సరకు రవాణాను సమర్ధంగా నిర్వహించేందుకు లాజిస్టిక్స్‌ కార్పోరేషన్‌ ఏర్పాటు చేయాలి. పోర్టులు, ఎయిర్‌ పోర్టుల సమీపంలో శాటిలైట్‌ టౌన్‌ షిప్పుల అభివృద్ధికి అవసరమైన సంస్థలను గుర్తించి పీపీపీ విధానంలో అభివృద్ధి చేయాలి. లాజిస్టిక్‌ కార్పోరేషన్‌ అనేది రాష్ట్ర ఆర్థికాభివృద్ధికి గ్రోత్‌ ఇంజిన్‌ మాదిరిగా ఉండాలి. ఇదే తరహాలో 175 నియోజకవర్గాల్లో ఏర్పాటు చేసుకుంటున్న ఎంఎస్‌ఎంఈ పార్కుల వద్ద కూడా శాటిలైట్‌ టౌన్‌ షిప్పులను అభివృద్ధి చేసేలా ప్రణాళికలు చేయాలి. కుప్పం, దగదర్తి విమానాశ్రయాల నిర్మాణానికి సంబంధించిన పనులను వేగవంతం చేయాలి. అనుకున్న సమయానికి భూసేకరణ పూర్తి చేసి పనులు మొదలు పెట్టాలి. ఈ ఎయిర్‌ పోర్టులను నేషనల్‌ హైవేలను కలిపేలా అంతర్గత రోడ్ల నిర్మాణం ఉండాలి. అవసరమైతే వయబిలిటీ గ్యాప్‌ ఫండింగ్‌ ద్వారా దీనిని చేపట్టాలని సీఎం చెప్పారు.
పెట్టుబడులను మరింతగా ఆకర్షించేందుకు వీలుగా మారిటైమ్‌ విధానంలో మార్పులు చేయాలని ముఖ్యమంత్రి సూచనలు చేశారు. పోర్టులు, టెర్మినల్స్, షిప్‌ బిల్డింగ్‌ యూనిట్లు, అంతర్గత జల రవాణా మార్గాలు, క్రూయిజ్‌ టెర్మినళ్ల ఏర్పాటు చేసేందుకు మార్గం సుగమం చేసేలా చర్యలు తీసుకోవాలన్నారు. కేంద్రం అమలు చేస్తున్న షిప్‌ బిల్డింగ్‌ క్లస్టర్‌ స్కీం పాలసీకి అనుగుణంగా మారిటైం పాలసీలో మార్పులు చేసుకోవాలని అధికారులు చెప్పారు. ఈ మేరకు అవసరమైన మార్పులు చేసేందుకు ముఖ్యమంత్రి అంగీకరించారు. అలాగే షిప్‌ బిల్డింగ్‌ యూనిట్ల నిర్మాణం కోసం మచిలీపట్నం, మూలపేట, చినగంజాం వంటి ప్రాంతాల్లో షిప్‌ బిల్డింగ్‌ యూనిట్ల ఏర్పాటుకు కొన్ని సంస్థలు ముందుకు వచ్చాయని అధికారులు సీఎంకు తెలిపారు.
రాష్ట్రంలో షిప్‌ బిల్డింగ్‌ యూనిట్లు ఎన్ని చోట్ల ఏర్పాటు చేయడానికి అనువుగా ఉంటుందో చూడాలని సీఎం సూచించారు. పోర్టుల నిర్మాణం, షిప్‌ బిల్డింగ్‌ యూనిట్ల నిర్మాణం చేసే సమయంలో స్థానిక మత్స్య కారులకు ఇబ్బంది లేకుండా చూడాలి. మత్స్య కారులకు సంబంధించిన పనిముట్లు, పరికరాలను పెట్టుకోవడానికి వీలు కల్పించేలా ఉండాలి. కంటైనర్‌ పోర్టుల ఏర్పాటు, అభివృద్ధి పై మీద మరింత దృష్టి పెట్టాలి. గత ప్రభుత్వం నిర్వాకం వల్ల కంటైనర్‌ పోర్టు తమిళనాడుకు వెళ్లిపోయింది. అలాంటి పరిస్థితులు రాకూడదని సీఎం ఆదేశించారు.
Next Story