వైజాగ్ స్టీల్ ప్లాంట్ ప్రైవేటీకరణపై పార్లమెంట్ లో గళం విప్పండి
పార్లమెంటు సమావేశాల నేపథ్యంలో వైఎస్సార్సీపీ ఎంపీలకు జగన్ దిశానిర్దేశం చేశారు.
విశాఖపట్నం స్టీల్ ప్లాంట్ ప్రైవేటీకరణపై పార్లమెంట్ లో ప్రస్తావించాలని వైఎస్సార్సీపీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్‌రెడ్డి ఆ పార్టీ ఎంపీలకు సూచించారు. పార్లమెంటు శీతాకాల సమావేశాలు సోమవారం (డిసెంబర్ 1) నుంచి ప్రారంభం కానున్న నేపథ్యంలో వైఎస్సార్సీపీ ఎంపీలతో తడేపల్లి క్యాంపు కార్యాలయంలో ఆదివారం సమావేశం నిర్వహించారు. రాష్ట్ర ప్రయోజనాల కోసం గట్టిగా పోరాడాలని, రాజీలేకుండా గళమెత్తాలని ఆదేశించారు. రైతుల సమస్యలు, తుపాను నష్టాలు, పంటలకు గిట్టుబాటు ధరలు, ప్రభుత్వ నిర్లక్ష్యం, ఉపాధి హామీ పథకం, విశాఖ స్టీల్ ప్లాంట్ ప్రైవటీకరణ వంటి కీలక అంశాలపై లోక్‌సభ, రాజ్యసభల్లో చర్చించాలని స్పష్టమైన సూచనలు చేశారు.
వైఎస్ జగన్‌మోహన్‌రెడ్డి మాట్లాడుతూ.. రైతులపై చంద్రబాబు ప్రభుత్వం చూపుతున్న నిర్లక్ష్యం అమానుషమైనది. మొంథా ప్రభావం వల్ల రైతులు లక్షల ఎకరాల పంటలు కోల్పోయారు. కానీ రాష్ట్రం, కేంద్రం ఎవరూ పరిహారం ఇవ్వలేదు. పంటలకు గిట్టుబాటు ధరలు (ఎంఎస్‌పీ) హామీ ఇవ్వకపోవడం, దళారుల చేతిలో దోపిడీకి గురవుతున్న వైనాన్ని పార్లమెంటులో గట్టిగా చర్చించాలి. వైఎస్సార్సీపీ పాలనలో అమలు చేసిన ఉచిత పంటల బీమాను కూటమి ప్రభుత్వం నిలిపేసింది. బీమా లేకపోవడంతో రైతులు నష్టపోతున్నారు. ఇన్‌పుట్ సబ్సిడీ కూడా అందడం లేదు. ఈ-క్రాప్ విధానం అమలు చేయడం లేదు. మామిడి రైతులకు ఫ్యాక్టరీల బకాయిలు చెల్లించకపోవటం వంటి అంశాలను సభలో ప్రస్తావించాలి అని ఆదేశించారు. రైతుల సమస్యల పరిష్కారం కోసం రాజీలేని పోరాటం చేయాలని, కేంద్ర దృష్టిని రాష్ట్ర సమస్యల మీదకు తీసుకెళ్లాలని ఎంపీలకు సూచించారు.
ఉపాధి హామీ పథకంలో 18.63 లక్షల జాబ్ కార్డులు తొలగించి పేదల కడుపు కొట్టడాన్ని పార్లమెంటులో గట్టిగా నిలదీయాలని సూచించారు. అర్హులందరికీ తిరిగి కార్డులు ఇచ్చేలా కేంద్రంపై ఒత్తిడి తేవాలి. విశాఖ స్టీల్ ప్లాంట్ ప్రైవటీకరణకు వ్యతిరేకంగా గట్టిగా పోరాడాలి. విశాఖ ఉక్కు ఫ్యాక్టరీ కోసం రాష్ట్ర ప్రజలు చేసిన త్యాగాలను మరోసారి కేంద్ర దృష్టికి తీసుకెళ్లాలి అని పేర్కొన్నారు. అలాగే, రాష్ట్రంలో నెలకొన్న రాజకీయ కక్ష సాధింపులు, అక్రమ అరెస్టులు, పోలీసు వ్యవస్థ దుర్వినియోగం, ప్రభుత్వ సంక్షేమ హాస్టల్స్‌లో కలుషిత ఆహారం తిని విద్యార్థులు ఆస్పత్రుల పాలవటం, మౌలిక సదుపాయాలు కల్పించకపోవటం వంటి అంశాలపై సభలో చర్చించాలని ఆదేశించారు. రాష్ట్రానికి రావాల్సిన పాత బకాయిలు, ఏపీ హక్కుల సాధన కోసం ఎంపీలు గట్టిగా గళమెత్తాలి అని జగన్ స్పష్టం చేశారు.
