ఆంధ్రప్రదేశ్‌ ఐపీఎస్‌ అధికారుల్లో మరో సారి కలకలం రేగింది. కూటమి అధికారంలోకి వచ్చిన తర్వాత ఐపీఎస్‌ అధికారులను టార్గెట్‌ చేసింది. పలువురు ఐపీఎస్‌ అధికారులపై కేసులు నమోదు చేసింది. నలుగురు ఐపీఎస్‌ అధికారులను సస్పెండ్‌ చేసింది. తాజాగా మరో సీనియర్‌ ఐపీఎస్‌ అధికారి, పీవీ సునీల్‌ కుమార్‌ కేసును తెరపైకి తెచ్చింది. గత ఐదు మాసాలుగా ఇది నలుగుతున్నా.. ఈ కేసును సీరియస్‌గా తీసుకున్నారు. ఏలాగైనా సునీల్‌ కుమార్‌ను అరెస్టు చేయాలనే దిశగా అడుగులు వేస్తోంది. ఈ నేపథ్యంలో కీలక పరిణామం చోటు చేసుకుంది. పీవీ సునీల్‌ కుమార్‌పై విచారణ చేపట్టాలని నిర్ణయించింది. దీనికి సీనియర్‌ ఐఏఎస్‌ అధికారిని విచారణ అధికారిగా నియమించింది. సీనియర్‌ ఐఏఎస్‌ అధికారి, ప్రస్తుతం రెవెన్యూ శాఖ ప్రత్యేక ప్రధాన కార్యదర్శిగా ఉన్న ఆర్‌పీ సిసోడియాను విచారణ అధికారిగా నియమించింది. అంతేకాకుండా విజిలెన్స్‌ అండ్‌ ఎన్‌ఫోర్స్‌మెంట్‌ విభాగం డైరెక్టర్‌ జనరల్‌గా ఉన్న హరీష్‌ కుమార్‌ గుప్తాకు కూడా ఓ పని అప్పగించింది. పీవీ సునీల్‌ కుమార్‌ కేసుకు సంబంధించిన పూర్వ పరాలను విచారణ అధికారిగా నియమితులైన ఆర్‌పీ సిసోడియాకు వివరించాలని ఆదేశాలు జారీ చేసింది. ప్రభుత్వ ప్రధాన కార్యదర్శి కే విజయానంద్‌ ఈ రకమైన ఉత్తర్వులను జారీ చేశారు.
తాజా పరిణామాల నేపథ్యంలో పీవీ సునీల్‌ కుమార్‌ కేసు ఇప్పుడు ఏపీలో హాట్‌ టాపిక్‌గా మారింది. కూటమి అధికారంలో వచ్చిన తర్వాత గత జగన్‌ ప్రభుత్వం ప్రస్తుత అసెంబ్లీ డిప్యూటీ స్పీకర్‌ రఘురామకృష్ణరాజు రాజద్రోహం కేసును తెరపైకి తెచ్చారు. తనపై కావాలనే 2021లో రాజద్రోహం కేసు పెట్టారని, విచారణ పేరుతతో చిత్ర హింసలకు గురి చేశారని, తనను హత మార్చేందుకు కుట్రలు పన్నారని దీనికి కారణమైన అధికారుల చర్యలు తీసుకోవాలని రఘురామకృష్ణరాజు గుంటూరు నగరపాలెం పోలీసు స్టేషన్‌లో 2024 జూలై 11న ఫిర్యాదు చేశారు. దీనిలో నాడు ఏపీ సీఐడీ చీఫ్‌గా ఉన్న పీవీ సునీల్‌ కుమార్‌ పేరును కూడా ప్రస్తావించారు.
ఈ నేపథ్యంలో పీవీ సునీల్‌ కుమార్‌ మీద, నాడు నిఘా విభాగం చీఫ్‌గా మరో సీనియర్‌ ఐపీఎస్‌ అధికారి పీ సీతారామాంజనేయులు, నాడు సీఐడీ అదనపు ఎస్పీగా ఉన్న విజయ్‌పాల్‌పైన కేసు నమోదు చేశారు. ఈ కేసులో ఇప్పటికే విజయ్‌పాల్‌ను పోలీసులు అదుపులోకి తీసుకున్నారు. అయితే ఈ కేసు మీద సునీల్‌ కుమార్‌ స్పందించారు. నమోదు చేసిన సమయంలో వ్యాఖ్యలు చేశారు. ఈ కేసు సుప్రీం కోర్టులో మూడేళ్ల పాటు నడిచి.. సాక్షాత్తు ఆ కోర్టే తిరస్కరించిన కేసులో కొత్తగా ఎఫ్‌ఐఆర్‌ దాఖలు చేయడాన్ని ఏమనాలో మీ విజ్ఞతకే వదిలేస్తున్నా అంటూ సామాజిక మాధ్యమాల్లో పోస్టు పెట్టారు.
కూటమి సూర్కర్‌ ఈ వ్యాఖ్యలను ఇప్పుడు సీరియస్‌గా తీసుకుంది. ఇలా సామాజిక మాధ్యమాల్లో సునీల్‌ కుమార్‌ వ్యాఖ్యలు చేయడాన్ని తప్పుబట్టింది. ఇది అఖిల భారత సర్వీసు నిబంధనల ఉల్లంఘన కిందకు వస్తుందని కూటమి ప్రభుత్వం అక్టోబరు 7, 2024న సునీల్‌ కుమార్‌పై ఈ అభియోగాలను నమోదు చేసింది. ఈ నేపథ్యంలో సీనియర్‌ ఐఏఎస్‌ అధికారి, ప్రభుత్వ ప్రత్యేక ప్రధాన కార్యదర్శి ఆర్‌పీ సిసోడియాను విచారణ అధికారిగా నియమించింది. దీంతో మరో సారి సునీల్‌ కుమార్‌ ఐపీఎస్‌ కేసు చర్చనీయాంశంగా మారింది.
