కడప కొత్త మేయర్‌గా పాకా సురేష్ ఏకగ్రీవం

కడప మేయర్ పదవికి ఎన్నికల సంఘం నోటిఫికేషన్ విడుదల చేసినప్పటి నుంచి దీనిపై సర్వత్ర రాజకీయంగా ఆసక్తి నెలకొంది. ఈ ఎన్నికపై గతంలో పనిచేసిన మేయర్ సురేష్ బాబు హైకోర్టును ఆశ్రయించినప్పటికీ, న్యాయస్థానం ఆయన పిటిషన్‌ను కొట్టివేయడంతో ఎన్నికకు మార్గం సుగమమైంది.

కార్పొరేషన్‌లోని మొత్తం 50 స్థానాలకు గాను, ప్రస్తుతానికి 48 మంది కార్పొరేటర్లు ఉన్నారు. ఇద్దరు మరణించారు. వైఎస్సార్‌సీపీకి స్పష్టమైన మెజారిటీ ఉన్నారు. అంటే 39 మందికి పైగా కార్పొరేటర్లు ఉన్నారు. ఇలా ఎక్కువ మంది కార్పొరేటర్లు ఆ పార్టీకి ఉండటంతో, రాష్ట్రంలో అధికారంలో ఉన్న తెలుగుదేశం పార్టీ ఈ ఎన్నికల ప్రక్రియకు దూరంగా ఉండాలని నిర్ణయించుకుంది.

దీంతో, వైఎస్సార్‌సీపీ కార్పొరేటర్లు అంతా ఏకగ్రీవంగా పాకా సురేష్ పేరును ప్రతిపాదించి ఎన్నుకున్నారు. ఎన్నికల అధికారిగా వ్యవహరించిన కడప జిల్లా జాయింట్ కలెక్టర్ అదితి సింగ్ అధికారికంగా ఈ ఎన్నిక ఫలితాన్ని ప్రకటించారు. ఈ కార్యక్రమంలో కడప ఎంపీ వైఎస్ అవినాష్ రెడ్డి, ఇతర ముఖ్య నేతలు పాల్గొన్నారు. నూతనంగా ఎన్నికైన మేయర్‌కు పార్టీ శ్రేణులు శుభాకాంక్షలు తెలిపారు.