దర్శి నియోజకవర్గంపై ఇక చర్చ లేదు!
దర్శి నియోజకవర్గం మార్కాపురంలో కలుస్తుందని, లేదంటే రెండు మండలాలు కలుస్తాయనే చర్చకు ప్రభుత్వం తెరదించింది.
ఆంధ్రప్రదేశ్ ప్రభుత్వం దర్శి నియోజకవర్గం సరిహద్దులపై జరిగిన చర్చలకు తెరదించింది. మొదటి రెండు రోజులు దర్శి నియోజకవర్గంలోని కురిచేడు, దొనకొండ మండలాలను మార్కాపురం జిల్లాలో చేర్చాలనే చర్చ సాగినప్పటికీ, 29 డిసెంబర్ 2025న జరిగిన మంత్రివర్గ సమావేశంలో ఈ ప్రతిపాదనను తిరస్కరించారు. బదులుగా కనిగిరి రెవెన్యూ డివిజన్ నుంచి దర్శిని అద్దంకి రెవెన్యూ డివిజన్కు మార్చుతున్నట్లు ప్రకటించారు. ఈ నిర్ణయాన్ని దర్శి నియోజకవర్గ ప్రజలు స్వాగతించారు.
ఈ మార్పులతో అద్దంకి నియోజకవర్గాన్ని తిరిగి ప్రకాశం జిల్లాలో చేర్చారు. మార్కాపురం జిల్లాలో మార్కాపురం నియోజకవర్గంతో పాటు యర్రగొండపాలెం, గిద్దలూరు, కనిగిరి నియోజకవర్గాలు మాత్రమే ఉంటాయి. ఒకవేళ దర్శి నియోజకవర్గాన్ని మార్కాపురంలో చేర్చి ఉంటే, ప్రకాశం జిల్లా పూర్తిగా రెండు భాగాలుగా అయ్యేది. అయితే ప్రస్తుత నిర్ణయంతో ప్రకాశం జిల్లాలో దర్శి ఉండటం వల్ల మార్కాపురం ప్రజల ఆశలు ఫలించలేదనే చర్చ కూడా ఉంది.
ఈ నిర్ణయం వెనుక ఎన్నో విశ్లేషణలు జరుగుతున్నాయి. ముఖ్యంగా, దొనకొండ, కురిచేడు మండలాలను ప్రకాశం జిల్లాలోనే ఉంచడానికి ప్రధాన కారణం ఆ మండలాల్లో వైఎస్సార్సీపీ నాయకుల పొలాలు, ఆస్తులు ఎక్కువగా ఉండటమే అనే చర్చ సాగుతోంది. మార్కాపురం జిల్లాలో చేర్చితే, కొత్త ప్రయోజనాలు వారికి చేరకుండా ఉండటానికి ఈ నిర్ణయం తీసుకున్నారని కొందరు భావిస్తున్నారు. అయితే ప్రభుత్వం ఈ చర్చలను తోసిపుచ్చుతూ, ప్రజల సౌకర్యాన్ని దృష్టిలో పెట్టుకుని ఈ మార్పులు చేపట్టినట్లు స్పష్టం చేసింది.
ఈ నిర్ణయం రాష్ట్ర రాజకీయాల్లో కొత్త చర్చలకు దారి తీసే అవకాశం ఉంది. ప్రకాశం, మార్కాపురం జిల్లాల మధ్య సమతుల్యతను కాపాడటం వల్ల ప్రజలకు మరిన్ని అభివృద్ధి అవకాశాలు లభించనున్నాయి. మున్ముందు ఈ మార్పులు ఎలాంటి ప్రభావం చూపుతాయో చూడాలి.
మార్పుల తరువాత పూర్వపు ప్రకాశం జిల్లా ఒక్కటైంది. ఆ తరువాత మార్కాపురాన్ని జిల్లాగా ప్రకటించడంతో నాలుగు నియోజకవర్గాలు కలిపి మార్కాపురం జిల్లా ఏర్పడింది. ఈ జిల్లాలో నల్లమల అడవుల విస్తీర్ణం ఎక్కువగా ఉంది. పూర్వపు కందుకూరు రెవెన్యూ డివిజన్ 24 మండలాలతో ఉండేది. ఇప్పుడు ఈ డివిజన్ ఏడు మండలాలతో మాత్రమే ఉంది. నియోజకవర్గంలోని ఐదు మండలాలతో పాటు నెల్లూరు జిల్లాలోని కొండాపురం, వరికుంట పాడు మండలాలను కలిపారు. దీంతో ప్రకాశం జిల్లాలో ఆరు నియోజకవర్గాలు, ఉండగా మార్కాపురంలో నాలుగు నియోజకవర్గాలు ఉన్నాయి.
