ఐఏఎస్ అధికారి భార్య మృతిపై మిస్టరీ?
విజయవాడలో ఐఏఎస్ అధికారి భార్య ఆసుపత్రిలో చికిత్స పొందుతూ కన్నుమూత. అనుమానాస్పద మృతిగా కేసు నమోదు.
ఐఏఎస్ అధికారి జి.కె.కిషోర్ కుమార్ భార్య సత్య దీపిక మృతి విజయవాడలో చర్చనీయాంశమైంది. గొంతు ఇన్ఫెక్షన్తో ఆసుపత్రిలో చేరిన ఆమె హఠాత్తుగా కన్నుమూయడం, ఆసుపత్రి యాజమాన్యమే స్వయంగా పోలీసులకు మెడికో లీగల్ కేసు కింద సమాచారం ఇవ్వడంతో ఈ మరణం చుట్టూ అనుమానాలు రేకెత్తాయి. కుటుంబ సభ్యులు ఎవరూ ఫిర్యాదు చేయకపోయినప్పటికీ, నిబంధనల ప్రకారం పటమట పోలీసులు దీనిని అనుమానాస్పద మృతిగా నమోదు చేసి విచారణ చేపట్టారు. మరో వైపు ఏపీ మిషన్ ఫర్ క్లీన్ కృష్ణా, గోదావరి కెనాల్ ప్రాజెక్ట్ డైరెక్టర్గా బాధ్యతలు నిర్వర్తిస్తున్న సీనియర్ ఐఏఎస్ అధికారి జి.కె.కిషోర్ కుమార్ భార్య సత్య దీపిక మృతి చెందడంతో ఆ కుటుంబంలో తీవ్ర విషాదం చోటుచేసుకుంది.
ఘటన వివరాలు
మొగల్రాజపురంలో నివాసం ఉంటున్న సత్య దీపిక గత కొంతకాలంగా కిడ్నీ సంబంధిత సమస్యలతో బాధపడుతున్నారు. గత నెల డిసెంబర్ 24 నుండి 27 వరకు నగరంలోని ఒక ప్రైవేట్ ఆసుపత్రిలో చికిత్స పొంది డిశ్చార్జ్ అయ్యారు. అయితే, గొంతు ఇన్ఫెక్షన్ రావడంతో డిసెంబర్ 31న తిరిగి అదే ఆసుపత్రిలో చేరారు. ఈ నెల 3న తన సోదరితో ఫోన్లో మాట్లాడిన దీపిక, కోలుకున్నాక ఇంటికి వస్తానని చెప్పారు. కానీ, శనివారం అర్ధరాత్రి 1:20 గంటల సమయంలో పరిస్థితి విషమించి ఆమె మృతి చెందారు.
పోలీసుల జోక్యం - అనుమానాస్పద మృతి
సత్య దీపిక మృతిపై ఆసుపత్రి యాజమాన్యం 'మెడికో లీగల్ కేసు' (MLC) కింద పటమట పోలీసులకు సమాచారం అందించింది. వైద్యులు అందించిన ప్రాథమిక నివేదికలో 'కార్డియాక్ అరెస్ట్' (గుండెపోటు) కారణంగా మరణం సంభవించి ఉండవచ్చని పేర్కొన్నారు. మృతురాలి కుటుంబ సభ్యులు లేదా ఐఏఎస్ అధికారి కిషోర్ కుమార్ వైద్యంపై ఎలాంటి అనుమానాలు వ్యక్తం చేయనప్పటికీ, ఆసుపత్రి నుంచి ఎమ్మెల్సీ రిపోర్ట్ రావడంతో పోలీసులు సాంకేతిక కారణాల దృష్ట్యా 'అనుమానాస్పద మృతి'గా కేసు నమోదు చేయాల్సి వచ్చింది.
ప్రస్తుత పరిస్థితి
కుటుంబ సభ్యులకు ఎటువంటి ఫిర్యాదు లేదని చెప్పినప్పటికీ, ఆసుపత్రి నిబంధనల ప్రకారం కేసు నమోదు చేసి దర్యాప్తు చేస్తున్నాం" అని పటమట సీఐ పవన్ కిషోర్ తెలిపారు. ఆదివారం సాయంత్రం పోస్టుమార్టం పూర్తయిన అనంతరం మృతదేహాన్ని కుటుంబ సభ్యులకు అప్పగించారు. మృతురాలి సోదరి సరిత ఇచ్చిన ఫిర్యాదు మేరకు పోలీసులు తదుపరి దర్యాప్తు కొనసాగిస్తున్నారు.
Next Story