గేమ్ ఛేంజర్ గా మోదీ సంస్కరణలు: సీఎం చంద్రబాబు

శక్తిపీఠం, జ్యోతిర్లింగం ఒకేచోట కొలువై ఉన్న దివ్యక్షేత్రం శ్రీశైలం. ఉయ్యాలవాడ నరసింహారెడ్డి పుట్టిన పౌరుషాల గడ్డ లో జీఎస్టీ బచత్ ఉత్సవ్ సభకు ప్రధాని హాజరు కావటం సంతోషంగా ఉందని అన్నారు. ఎస్టీ సంస్కరణలతో దేశాన్ని ప్రగతి పథంలో నడిపిస్తున్న ప్రధాని మోదీకి ఏపీ ప్రజల తరపున అభినందనలు తెలిపారు.

ప్రధాని మోదీ తెచ్చిన సంస్కరణలు దేశానికి గేమ్ చేంజర్లుగా మారాయి. ప్రగతిశీల దేశంగా 2047 నాటికి భారత్ ప్రపంచంలో అగ్రస్థానంలో నిలిచి సూపర్ పవర్ గా తయారవుతుంది. 11 ఏళ్లలో 4 కోట్ల కుటుంబాలకు పక్కా ఇళ్లు, 81 కోట్ల మందికి ఉచితంగా రేషన్, 144 వందే భారత్ రైళ్లు, 55 వేల కి.మీ మేర కొత్త హైవేలు, 86 ఎయిర్ పోర్టులు, 16 ఎయిమ్స్ ఆస్పత్రులు నిర్మించిన ఘనత ప్రధాని మోదీదేనన్నారు.

7 ఐఐటీలు, 8 ఐఐఎంలను తీసుకువచ్చిన రికార్డు కూడా ప్రధాని మోదీదే ఇది ఆల్ టైం రికార్డు. ప్రధాని సంకల్పంతోనే 11 ఏళ్ల క్రితం 11వ ఆర్ధిక వ్యవస్థగా ఉన్న భారత్‌ 4వ స్థానానికి వచ్చింది. 2028 నాటికి 3వ, 2038కి 2వ ఆర్ధిక శక్తిగా భారత్ ఎదుగుతుంది. ఆర్థికంగా మనం బలం ఏంటో ఈ విజయాలు చెబితే...సైనికంగా మన బలం ఏంటో ఆపరేషన్ సింధూర్ చాటిందని చెప్పారు.

మోదీ సంకల్పంతో 11వ స్థానం నుంచి నాలుగో స్థానానికి చేరాం. ఆపరేషన్‌ సిందూర్‌.. మన సైనిక బలం నిరూపించింది. మాటలతో కాదు.. చేతలతో చూపించే వ్యక్తి ప్రధాని మోదీ.

ఒకే దేశం-ఒకే పన్ను- ఒకే మార్కెట్ విధానంతో తెచ్చిన జీఎస్టీ 2.0లో 99 శాతం వస్తువులు సున్నా, 5 శాతం శ్లాబ్ ల పరిధిలోనే ఉన్నాయి. జీఎస్టీ పన్ను తగ్గింపుతో నిత్యావసరాల వస్తువుల ధరలు తగ్గాయి. పేద మధ్య తరగతి వర్గాలకు ఇదో పెద్ద రిలీఫ్. రైతులు, విద్యార్ధులు, చిరువ్యాపారులు, ఇలా అన్ని వర్గాలకూ లబ్దికలిగేలా సంస్కరణలు ఉన్నాయి. జీఎస్టీ నెక్స్ జెన్ సంస్కరణలతో ప్రతీ కుటుంబానికీ ఏడాదికి రూ.15వేలు ఆదా అవుతోంది. దసరా నుంచి దీపావళి వరకూ ఆ తర్వాత కూడా జీఎస్టీ సంస్కరణల ప్రయోజనాలను వివరించేలా కార్యక్రమాలు ఉంటాయని ముఖ్యమంత్రి చెప్పారు.

సూపర్ జీఎస్టీ సూపర్ సేవింగ్స్ పేరిట 98 వేలకు పైగా ఈవెంట్లు నిర్వహించాం. జీఎస్టీ సంస్కరణలతో బచత్ ఉత్సవ్... ఇవాళ భరోసా ఉత్సవ్ గా మారింది. కేంద్రంలో రాష్ట్రంలో ఉన్న డబుల్ ఇంజన్ సర్కార్ తో రాష్ట్రానికి డబుల్ బెనిఫిట్ జరిగింది. సూపర్ సిక్స్ పథకాలతో పాటు సూపర్ జీఎస్టీతో ఏపీ ప్రజలకు సూపర్ సేవింగ్స్ జరిగాయి అని చంద్రబాబు నాయుడు అన్నారు.