పిఠాపురంలో పవన్‌ ప్రచారానికి మెగాస్టార్‌ చిరంజీవి

పవన్‌ కల్యాణ్‌ జనసేన పార్టీ పెట్టిన తర్వాత రెండు అసెంబ్లీ స్థానాల్లో పోటీ చేసి ఓడి పోయారు. ఆ పార్టీ నుంచి కేవలం ఒకే ఒక్క ఎమ్మెల్యేను గెలిపించుకో గలిగారు. తర్వాత ఆయన కూడా జనసేనను వీడి వైఎస్‌ఆర్‌సీపీలో చేరారు. ఈ నేపథ్యంలో గెలుపే ధ్యేయంగా పిఠాపురం నియోజక వర్గం నుంచి పవన్‌ రంగంలోకి దిగారు. ఓటర్లు తనను నమ్మాలని, ఆ నమ్మకాని తాను నిలబెడుతానని చెబుతూ పిఠాపురంలోనే నివాసం ఉండేందుకు నిర్ణయించుకున్నారు. ఇటీవలె గృహ ప్రవేశం కూడా చేశారు. నియోజక వర్గంలో ఎన్నికల ప్రచారం నిర్వహిస్తూ వారాహి సభల్లో పాల్గొంటూ, స్థానిక ఓటర్ల సమస్యలపైన దృష్టి పెట్టారు.

ప్రచారంలో సినీ ప్రముఖులు ఉంటే ఓటర్లును మరింత ఆకట్టుకోవచ్చనే అభిప్రాయానికి వచ్చిన మెగా ఫ్యామిలీ నుంచి ఒక్కొరుగా ప్రచారంలోకి దిగుతున్నారు. టాలీవుడ్‌ను శాసిస్తున్న స్టార్‌లందరూ మెగా ఫ్యామీలోనే ఉన్నారు. బాబాయిని తప్పకుండా గెలిపించాలంటూ సినీ వరణ్‌ తేజ్‌ పిఠాపురంలో నిర్వహించిన రోడ్డు షోకి వేలాది జనం తరలి వచ్చారు. తమ్ముడి గెలుపు కోసం చిరంజీవి కూడా పిఠాపురంలో ప్రచారం చేయాలనే నిర్ణయానికి వచ్చినట్లు సమాచారం. మే నెల 5వ తేదీనా ప్రచారానికి వస్తున్నట్లు సోషల్‌ మీడియాలో ప్రచారం జరుగుతోంది. అయితే చిరంజీవి నుంచి ఎలాంటి అధికారిక ప్రకటన విడుదల కాలేదు. అనకాపల్లి బిజెపీ అభ్యర్థి సీఎం రమేష్‌ తన మిత్రులతో కలిసి హైదరాబాద్‌లో చిరంజీవిని కలిసి ప్రచారం చేయాలని కోరారు. దీనిపై స్పందించిన చిరంజీవి రమేష్‌ నాకు చాలా కాలం నుంచి మిత్రుడని, ఎన్డీఏ కూటమి అభ్యర్థిగా పోటీ చేస్తున్న సీఎం రమేష్‌ను గెలిపించాలని, తన తమ్ముడు పవన్‌ కల్యాణ్‌ను కూడా గెలిపించాలని కోరుతూ ఒక వీడియోను రూపొందించి సోషల్‌ మీడియాలో పోస్టు చేశారు. ఇది కాస్తా వైరల్‌గా మారింది. పవన్‌ కల్యాణ్‌ ఈ ఎన్నికల్లో గెలిచి అసెంబ్లీలో అడుగు పెట్టాలనే ధ్యేయంతో ఉన్నారు. ఎన్ని అవమానాలు అడ్డంకులు వచ్చినా ఆయన టీడీపీ, బిజెపీతో కలిసి పోటీ చేసేందుకు అన్ని మార్గాలను సుగుమం చేసుకున్నారు.

పవన్‌ కల్యాణ్‌పై పోటీకి దిగిన వైఎస్‌ఆర్‌సీపీ అభ్యర్థి వంగ గీత పట్టు వదలని విక్రమార్కురాలు. అయితే చిరంజీవి కుటుంబంతో ఆమెకు మంచి అనుబంధం ఉంది. గతంలో చిరంజీవి పెట్టిన ప్రజారాజ్యంలో చేరిన ఆమె ఆ పార్టీ అభ్యర్థిగా పిఠాపురం అసెంబ్లీ నియోజక వర్గం నుంచి పోటీ చేసి గెలిచారు. ఆ ఎన్నికల్లో వంగ గీత గెలుపు కోసం చిరంజీవి పిఠాపురంలో ప్రచారం చేశారు. అయితే ఇదే గంగ గీత ఇప్పుడు తమ్ముడు పవన్‌ కల్యాణ్‌కు ప్రత్యర్థిగా రంగంలోకి దింపారు సీఎం జగన్‌. వంగ గీత రాజకీయంగా అనుభవం ఉన్న నాయకురాలు. పైగా ఇద్దరూ ఒకే సామాజిక వర్గానికి చెందిన వారు. ఈ నేపథ్యంలో కాపు సామాజిక వర్గం ఓటర్లు ఎవరిని ఆదరిస్తారనేది స్థానికుల్లో చర్చగా మారింది. ఇలాంటి పరిస్థితుల్లో పవన్‌ కల్యాణ్‌ను గెలిపించుకోవడానికి కుటుంబ సభ్యులంతా ఏకతాటిపై నిలబడటం గమనార్హం. పార్టీలో ముఖ్య నాయకుడిగా ఉన్న నాగబాబు ఇప్పటికే కీలక పాత్ర పోషిస్తున్నారు.