వైజాగ్‌ బీచ్‌లో మారథాన్‌ సోయగం!

నావికాదళ దినోత్సవాన్ని పురస్కరించుకుని ఏటా ఇండియన్‌ నేవీ విశాఖలో మారథాన్‌ను నిర్వహిస్తుంది. ఆర్కే బీచ్‌ వేదికగా ఇది జరుగుతుంది. ఈ ఏడాది కూడా ఆదివారం ఈ మారథాన్‌ను నిర్వహించింది. ఇండియన్‌ నేవీకి పదవ ఎడిషన్‌ ఇది. ఈ మారథాన్‌ పోటీలపు నాలుగు ప్రధాన విభాగాలుగా విభజించారు. 42 కిలోమీటర్లు ఎయిర్‌క్రాఫ్ట్‌ మారథాన్, 21 కిలోమీటర్ల సబ్‌మెరైన్‌ హాఫ్‌ మారథాన్, , 10 కిలోమీటర్ల ఎయిర్‌క్రాఫ్ట్‌ రన్, 5 కిలోమీటర్ల ఫ్రిగేట్‌ రన్‌ను నిర్వహించారు. ఈ మారథాన్‌లో దాదాపు 18 వేల మంది పాల్గొన్నట్టు అంచనా. వీరిలో నావికాదళ సిబ్బందితో పాటు పోలీసులు, ఉద్యోగులు, నగరవాసులు ఉన్నారు. ఇంకా 17 దేశాల నుంచి 35 మంది ప్రతినిధులు హాజరయ్యారు. వెయ్యి మంది సిబ్బంది, రెండు వేల మంది వరకు వలంటీర్లు సేవలందించారు.

ఆదివారం తెల్లవారుజామున తొలుత 42 కిలోమీటర్ల మారథాన్‌ను తూర్పు నావికాదళ ప్రధానాధికారి (ఈఎన్‌సీ) సంజయ్‌ భళ్లా ప్రారంభించారు. అనంతరం 21 కి.మీల హాఫ్‌ మారథాన్‌ను నేవీ వెల్ఫేర్‌ అండ్‌ వెల్‌నెస్‌ అసోసియేషన్‌ అధ్యక్షురాలు, ఈఎన్‌సీ సతీమణి ప్రియ భళ్లా, 10 కిలోమీటర్ల 10కె రన్‌ను విశాఖపట్నం జిల్లా కలెక్టర్‌ హరేందిర ప్రసాద్, 5 కి.మీల 5కె రన్‌ను విశాఖ నగర పోలీస్‌ కమిషనర్‌ శంఖబ్రత బాగ్చీలు శ్రీకారం చుట్టారు. మారథాన్‌ విశాఖ ఆర్కే బీచ్‌లోని విశ్వప్రియ ఫంక్షన్‌ హాలు నుంచి ప్రారంభమై భీమిలి వరకు నిర్దేశిత ప్రాంతాల్లో కొనసాగింది. ఈ మారథాన్‌లో పాల్గొన్న వారికి డ్రై ఫ్రూట్స్, టీ షర్ట్స్, వాటర్‌ బాటిళ్లను అందించారు. వీరికి సర్టిఫికెట్లతో పాటు బహుమతులను అందజేశారు.

ఈ సందర్భంగా తూర్పు నావికాదళ ప్రధానాధికారి సంజయ్‌ భళ్లా మాట్లాడుతూ ఇండియన్‌ నేవీ ఎంతో ప్రతిష్టాత్మకంగా నిర్వహిస్తున్న ఈ కార్యక్రమం ముఖ్య ఉద్దేశం మానసిక ఒత్తిడికి గురవుతున్న ప్రజలను ఆ ఒత్తిడి నుంచి ఉపశమనం కలిగించడమేనని చెప్పారు. ఇండియన్‌ నేవీ విశాఖపట్నం ప్రజలకు ఎంతో చేరువైందని, దానికి నిదర్శనమే ఈ రోజు మారథాన్‌లో పాల్గొన్న జనమని పేర్కొన్నారు. ఈ మారథాన్‌లో పాల్గొన్న వారికి, మారథాన్‌ విజయవంతానికి కృషి చేసిన జిల్లా యంత్రాంగానికి ఆయన కృతజ్ఞతలు తెలిపారు. జిల్లా కలెక్టర్‌ హరేందిర ప్రసాద్‌ ఆదేశాలతో పార్కింగ్, హైడ్రేషన్‌ పాయింట్లు, వైద్య సదుపాయాలు, ఇతర అత్యవసర సేవలు అందించారు. దీంతో ఈ సుదీర్ఘ మారథాన్‌ను విజయవంతంగా నిర్వహించగలిగారు.