కళ్యాణదుర్గం టీడీపీ..ముద్దనూరు వైసీపీ కైవసం

మరో వైపు కడప జిల్లా ముద్దనూరుతో పాటు, ఎన్టీఆర్ జిల్లాలోని విస్సన్నపేట మండల పరిషత్ అధ్యక్ష (ఎంపీపీ) పీఠాలను వైఎస్సార్‌సీపీ కైవసం చేసుకుంది. రాజకీయంగా ఉత్కంఠ రేపిన ముద్దనూరు ఎన్నికల్లో కూటమి నేతల ప్రలోభాలను ఎదుర్కొని వైఎస్సార్‌సీపీ విజయం సాధించింది. ముద్దనూరు మండల అధ్యక్ష ఎన్నికల్లో కొర్రపాడు ఎంపీటీసీ సభ్యురాలు వెన్నపూస పుష్పలత ఎంపీపీగా ఎన్నికయ్యారు. మొత్తం 10 ఎంపీటీసీ స్థానాలకు గాను, వైఎస్సార్‌సీపీకి 6గురు మద్దతుదారులు ఉన్నారు. ఈ ఎన్నికల ప్రక్రియ సందర్భంగా తీవ్ర రాజకీయ పరిణామాలు చోటుచేసుకున్నాయి. బీజేపీ ఎమ్మెల్యే ఆదినారాయణరెడ్డి తమ సభ్యులపై ప్రభావం చూపి, భయభ్రాంతులకు గురిచేస్తున్నారని ఆరోపిస్తూ వైఎస్సార్‌సీపీ నేతలు జిల్లా ఎస్పీకి ఫిర్యాదు చేసి భద్రత కల్పించాలని విజ్ఞప్తి చేశారు. అయితే, వైఎస్సార్‌సీపీ అధిష్టానం తమ సభ్యులకు విప్ జారీ చేయడంతో, ఎలాంటి ప్రలోభాలకు గురికాకుండా సభ్యులు ఓటేశారు. దీంతో ముద్దనూరు ఎంపీపీ పీఠం వైఎస్సార్‌సీపీకే దక్కింది. ఇక ఎన్టీఆర్ జిల్లా విస్సన్నపేట ఏకగ్రీవమైంది. ఎన్టీఆర్ జిల్లాలోని విస్సన్నపేట ఎంపీపీ పదవి కూడా వైఎస్సార్‌సీపీ వశమైంది. ఇక్కడ గద్దల మల్లయ్య ఎంపీపీగా ఏకగ్రీవంగా ఎన్నికయ్యారు. ఈ రెండు స్థానాల్లో వైఎస్సార్‌సీపీ విజయం సాధించడంతో ఆయా జిల్లాల్లో పార్టీ శ్రేణులు సంబరాలు చేసుకున్నాయి.