భారీ ధర్నాకు జగన్ ప్లాన్..వైసీపీ శ్రేణులలో జోష్

రాష్ట్రంలో మెడికల్ కాలేజీల పై కూటమి ప్రభుత్వం పీపీపీ విధానంలో ముందుకు వెళ్లాలని నిర్ణయించిన దగ్గరి నుంచి , ఈ నిర్ణయాన్ని వైసీపీ వ్యతిరేకిస్తోంది. జగన్ తన హయాంలో చేపట్టిన 17 మెడికల్ కాలేజీల నిర్మాణం గురించి ఇప్పటికే వివరించారు. పార్టీ నేతలు సైతం అదే జోరుతో ప్రభుత్వంపై ఆరోపణలు చేస్తున్నారు. ఇప్పటికే రాష్ట్రంలో ఆరోగ్యశ్రీని నిర్వీర్యం చేసారని విమర్శిస్తున్నారు. ఈ ఉద్యమాన్ని ప్రజలలోకి పూర్తిగా తీసుకెళ్లాలని , వైద్యాన్ని ప్రభుత్వం నిర్లక్ష్యం చేస్తోందనే భావనను అర్థం అయ్యేలా ప్రజలకు చెప్పాలని భావిస్తున్న వైసీపీ , పార్టీ అధినేత నేరుగా నిరసనలో పాల్గొంటే వచ్చే అడ్వాంటేజ్ వేరని చెబుతోంది..అన్నింటా ప్రైవేటుపరమనేలా ప్రభుత్వం వ్యవహరిస్తున్న తీరును ప్రజలలో ఎండగట్టాలని జగన్ భావిస్తున్నారు. నర్సీపట్నం కాలేజీ సందర్శన తరువాత అక్కడి నుంచే జగన్ తమ భవిష్యత్ కార్యాచరణ ప్రకటించనున్నారని చెబుతున్నారు. రాష్ట్ర స్థాయిలో ధర్నాకు జగన్ సిద్దం అవుతున్నట్లు తెలుస్తోంది. రాజమండ్రి లేదా నంద్యాల కేంద్రంగా ఈ ధర్నా ఉంటుందని పార్టీ వర్గాలు వెల్లడించాయి.దీంతో, 9న జరిగే జగన్ నర్సీపట్నం పర్యటన ఇప్పుడు రాజకీయంగా ఆసక్తి కరంగా మారుతోంది.మెడికల్ కాలేజీల అంశంలో జగన్ తదుపరి కార్యాచరణ ఎలా వుండబోతోందన్నిదీ చర్చకు దారితీస్తోంది. మిగిలిన అంశాలు , హామీల విషయం అట్లుంచితే మెడికల్ కళాశాలల ప్రైవేటీకరణను తప్పుబడుతూ ప్రజలే చర్చించుకుంటున్నారని ,ఈ సందర్భాన్ని తమకు అనుకూలంగా మార్చుకోవాలని వైసీపీ నేతలు చూస్తున్నారు.