పోలీసులు అరెస్ట్ చేసిన కామాక్షమ్మ
కామాక్షక్క కత్తెత్తితే పీక తెగాల్సిందే!
గంజాయి వద్దన్నందుకు పెంచలయ్యను చంపించింది ఈమెనని పోలీసుల అనుమానం
మాదక ద్రవ్యాలపై యుద్ధం ప్రకటిస్తే చంపేస్తారా? గంజాయి వద్దన్నందుకు గుండాలు గండ్రగొళ్లతో దాడి చేస్తారా? నెల్లూరు జిల్లాలో జరిగిన హత్యే ఇందుకు ప్రత్యక్ష సాక్ష్యం. నెల్లూరు జిల్లా కల్లూరుపల్లిలో ఈనెల 28న ఉద్యమకారుడు, సీపీఎం నాయకుడు పెంచలయ్య హత్య ప్రస్తుతం రాష్ట్రవ్యాప్తంగా కలకలం రేపింది. ఈ కేసులో తొవ్వేకొద్ది సంచలన విషయాలు వెలుగులోకి వస్తున్నాయి. మాదక ద్రవ్యాలపై ఉక్కుపాదం మోపాలని నినదిస్తున్న వ్యక్తులు, సంస్థలు ఈ హత్యపై గొంతెత్తి నినదిస్తున్నాయి. నిందితులను కఠినంగా శిక్షించాలని డిమాండ్ చేస్తున్నాయి. ఈ నేపథ్యంలో పెంచలయ్య హత్యను పోలీసులు కూడా తీవ్రంగానే పరిగణిస్తున్నారు.
ఈ కేసుకు సంబంధించిన వివరాలను నెల్లూరు రూరల్ డీఎస్పీ శ్రీనివాసరావు మీడియాకు వెల్లడించారు. ప్రధాన నిందితురాలు అరవ కామాక్షిని అరెస్టు చేశారు. దీంతో ఈ కేసులో ఇప్పటికి అరెస్ట్ చేసిన వారి సంఖ్య 8కి చేరింది. ఇంకా కొందర్ని అరెస్ట్ చేసే అవకాశం ఉంది.
పెంచలయ్యను ఎందుకు చంపారంటే...
కల్లూరుపల్లిలో ఈ నెల 28వ తేదీన పెంచలయ్యని హత్య చేశారు. పెంచలయ్య ఆర్డీటీ కాలనీలో ఉంటారు. ఆ కాలనీని ఆదర్శంగా తీర్చిదిద్దాలన్నది ఆయన ఆశయం. క్రిమినల్ బ్యాక్ గ్రౌండ్ ఉన్న వారు ఆర్డీటీ కాలనీలో ఉండకూడదనే నిబంధన ఉంది. ప్రజా సమస్యల పరిష్కారం కోసం పెంచలయ్య పోరాడేవారు. ఆర్డీటీ కాలనీలో ఉండే అరవ కామాక్షమ్మ, ఆమె అనుచరులు నేర కార్యకలాపాలు కొనసాగిస్తుండేవారు.
ఈ క్రమంలోనే పెంచలయ్య వీరి అరాచకాలను ఎదిరించారు. దీంతో పెంచలయ్యపై అరవ కామాక్షమ్మ, ఆమె అనుచరులు కక్ష పెంచుకున్నారు. హత్య చేశారు. ఈ కేసులో పోలీసు బృందాలు ఏడుగురు నిందితులను అదుపులోకి తీసుకున్నారు. నిందితుల దగ్గరి నుంచి ఏడు కత్తులు, మూడు బైకులు స్వాధీనం చేసుకున్నామని డీఎస్సీ శ్రీనివాసరావు వివరించారు. పెంచలయ్య కేసులో మొత్తం 14 మంది నిందితులు ఉన్నారని తెలిపారు.
కామాక్షమ్మను గంజాయి కేసులో అరెస్ట్ చేశామని, మరో నిందితుడు జేమ్స్ ఆస్పత్రిలో చికిత్స పొందుతున్నారని.. మరో ఐదుగురు నిందితులను అరెస్ట్ చేయాల్సి ఉందని చెప్పారు. ప్రజలందరూ పోలీసులకు సహకరించి నేరస్థుల వివరాలు అందించాలని సూచించారు. సమాచారం ఇచ్చే వారికి రివార్డులూ అందిస్తామని నెల్లూరు రూరల్ డీఎస్పీ శ్రీనివాసరావు పేర్కొన్నారు.
ఎవరీ కామాక్షమ్మ..
అరవ కామాక్షమ్మ ఓ లేడీ డాన్ అనే చెప్పాలి. మహాఅయితే 36,37 ఏళ్లు ఉంటాయి. ఎంతో సంప్రదాయబద్ధంగా కనిపిస్తుంది. నెల్లూరులోని బోడిగాడితోటలో ఆమె మకాం. పెళ్లి అయింది. భర్త కూడా ఏదో సాదా సీదాగా ఉంటుంటారు. గంజాయి విక్రయాలు సాగిస్తుంది. ఇందుకోసం ఆమె వద్ద సుమారు పది ముఠాలు పని చేస్తాయి. ప్రశ్నించిన వారిపై దాడులు, దౌర్జన్యాలకు పాల్పడడం ఆమె నైజం. నగర శివారులో శుక్రవారం సీపీఎం నాయకుడు పెంచలయ్య హత్యకు కామాక్షమ్మ ముఠాయే కారణమని ఇప్పటికే పోలీసులు గుర్తించారు. ఆమెతో పాటు, ఆమె ముఠాపై ఇప్పటికే హత్యాయత్నం, గంజాయి విక్రయాలు, రైల్వే ఆస్తుల చోరీ కేసులు, సస్పెక్ట్‌ షీట్లు ఉన్నట్లు పోలీసులు చెబుతున్నారు.
ఆమెకు వివిధ రాజకీయ పార్టీల నేతలతో సంబంధాలు ఉన్నాయి. ఓ రాజకీయ పార్టీ నాయకుని తరఫున ఆమె ఈ గంజాయి వ్యాపారం సాగిస్తారని తెలుస్తోంది. యువతకు, విద్యార్థులకు గంజాయి విక్రయించడాన్ని వృత్తిగా మార్చుకుంది. నవాబుపేట పోలీసు స్టేషన్‌లో ఆమెపై సస్పెక్ట్‌ షీట్, ఇతర కేసులు ఉన్నాయి. కామాక్షమ్మ సోదరుడు జేమ్స్‌పై నవాబుపేట తదితర పోలీస్‌ స్టేషన్లలో కేసులు ఉన్నాయి. వారికి హౌసింగ్‌ బోర్డు కాలనీలోని ఆర్డీటీ కాలనీలో ఇల్లు ఇవ్వడంతో అక్కడకు మకాం మార్చారు. పాత ఇనుము, చిత్తు కాగితాలను సేకరించే దుకాణం నిర్వహిస్తున్న ఆమె చిత్తు కాగితాలు ఏరుకునే యువకులు, ఆకతాయిలను చేరదీసి వారితో గంజాయి విక్రయాలు సాగిస్తున్నట్లు సమాచారం.
పోలీసులకు తెలిసినా..
సీపీఎం నాయకుడు పెంచలయ్య గంజాయి, మత్తు పదార్థాలకు వ్యతిరేకంగా అవగాహన కల్పిస్తుంటారు. ఈ విషయంలో కామాక్షమ్మ ముఠాను వారించడంతో పాటు స్థానిక దేవాలయంలో పెంచలయ్య పెత్తనం పెరగడాన్ని ఆమె తట్టుకోలేకపోయింది. అందుకే హత్య చేయించిందని పోలీసులు గుర్తించారు. కామాక్షమ్మ, ఆమె భర్త జోసెఫ్‌తో పాటు సోదరులు జేమ్స్, కార్తిక్, చెల్లెలు భర్త ఈ హత్య కేసులో ఉన్నట్లు సమాచారం. కామాక్షమ్మపై పోలీసులకు ఫిర్యాదు చేయడమే పెంచలయ్య హత్యకు కారణమని స్థానికులు చెబుతున్నారు.
కామాక్షమ్మ లేడీడాన్‌లా ఎదగడానికి పోలీసులే కారణమనే ఆరోపణలు వినిపిస్తున్నాయి. ఆర్డీటీ కాలనీ నేరాలకు కేంద్రంగా మారిందని.. ఫిర్యాదు చేసినా పట్టించుకోలేదని స్థానికులు ఆరోపిస్తున్నారు. ఫిర్యాదు చేసిన వారి సమాచారం నిందితులకు చేరవేస్తుంటారనే విమర్శలు వినిపిస్తున్నాయి.
పెంచలయ్యను హతమార్చిన గంజాయి ముఠాని అరెస్ట్ చేసి కఠినంగా శిక్షించాలని సిపిఎం నాయకులు గోవిందు, సురేష్‌ డిమాండ్ చేశారు. సిపిఎం, డివైఎఫ్‌ఐ ఆధ్వర్యంలో నెల్లూరు జిల్లా లో నిరసన చేపట్టింది. యువకులను మత్తు పదార్థాలకు బానిసలుగా చేస్తూ గంజాయి విక్రయిస్తున్న ముఠాను అడ్డుకునేందుకు పెంచలయ్య వారిపై పోలీసులకు పిర్యాదు చేయడం జరిగిందని అన్నారు. ఆ ప్రాంతంలో యువకులకు గంజాయి అందకుండా మత్తు పదార్థాలకు బానిసవ్వకుండా గంజాయి ముఠా పై పోరాటం చేశాడని అన్నారు. దీంతో ఆగ్రహించిన గంజాయి ముఠా కక్షతో దారిలో కాపు కాచి పెంచలయ్యను హతమార్చారని అన్నారు.
రాష్ట్రంలో పెచ్చుపెరిగిన గంజాయి ముఠాలు...
రాష్ట్రంలో గంజాయి డ్రగ్స్‌ ముఠా అరాచకాలు ఎక్కువయ్యాయి. వీటిని అరికట్టడంలో పాలకవర్గం పూర్తిగా విఫలమైందని సీపీఎం ఆరోపించింది. నిందితులను పట్టుకోవడానికి వెళ్లిన పోలీసులపై దాడులకు తెగబడే స్థాయికి గంజాయి బ్యాచ్‌ వెళ్లిందంటే రాష్ట్రంలో శాంతిభద్రతలు ఏ స్థాయిలో ఉన్నాయో అర్థం చేసుకోవచ్చన్నారు. డ్రగ్స్‌ గంజాయి పైన డివైఎఫ్‌ఐ పోరాటం కొనసాగుతుందని, దాడులకు భయపడేది లేదని హెచ్చరించారు. భవిష్యత్తులో వీటిపైన మరింత తీవ్రస్థాయిలో పోరాటాలు సాగిస్తామని అన్నారు. డ్రగ్స్‌ అంతం డివైఎఫ్‌ఐ పంతంగా ముందుకు సాగుతామని ప్రతిజ్ఞ చేశారు. నెల్లూరులో డివైఎఫ్‌ఐ నాయకులు పెంచలయ్య ను హతమార్చిన గంజాయి ముఠాను తక్షణమే అరెస్టు చేసి కఠినంగా శిక్షించాలని లేకుంటే రాష్ట్రవ్యాప్తంగా ఆందోళన చేస్తామని వారు హెచ్చరించారు.
Next Story