ఈ జిల్లాల్లో భారీ వర్షాలు..ప్రకాశం బ్యారేజీకి పోటెత్తిన వరద

గత కొద్ది రోజులుగా ఆంధ్రప్రదేశ్‌తో పాటు తెలంగాణ రాష్ట్రాల్లో భారీ వర్షాలు కురుస్తున్న నేపథ్యంలో కృష్ణా నదికి వరద ఉధృతి భారీగా పెరుగుతోంది. దీని వల్ల విజయవాడ ప్రకాశం బ్యారేజీకి భారీగా వరద నీరు వచ్చి చేరుతోంది. ఎగువ ప్రాంతాల నుంచి వరద తాకిడి పెరుగుతుండటంతో ప్రకాశం బ్యారేజీ గేట్లు ఎత్తి దిగువకు నీటిని విడుదల చేస్తున్నారు. 70 గేట్లను పూర్తి స్థాయిలో ఎత్తివేసి దాదాపు 4,68,720 క్యూసెక్కుల వరద నీటిని సముద్రంలోకి విడుదల చేస్తున్నారు. అయితే ఇలా బ్యారేజీ 70 గేట్లను పూర్తి స్థాయిలో ఎత్తివేయడం అనేది ఈ ఏడాదిలో ఇదే మొదటి సారి. గత రెండు రోజులుగా భారీగా వచ్చి చేరుతున్న వరద నీటి ప్రవాహం వల్ల ప్రకాశం నీటి మట్టం 13.5 అడుగులుగా ఉంది. మరో వైపు వరద నీటి ప్రవాహం ఎక్కువుగా ఉండటంతో ప్రకాశం బ్యారేజీ వద్ద మొదటి ప్రమాద హెచ్చరికను కూడా అధికారులు జారీ చేశారు. ఫ్లడ్‌ వాటర్‌ భారీగా పెరుగుతున్న క్రమంలో లోతట్టు ప్రాంతాల ప్రజలను అప్రమత్తం చేశారు. బుధవారం సాయంత్రం 70 గేట్లను ఎత్తగా వీటిల్లో 39 గేట్లను పూర్తిగాను, మరో 31 గేట్లను 8 అడుగుల మేర ఎత్తిన అధికారులు సుమారు 3,63,438 క్యూసెక్కుల నీటని సముద్రంలోకి వదిలారు.