లక్ బాగుంది..ప్రాణాపాయం తప్పింది

శనివారం సాయంత్రం బి-షిఫ్ట్ జరుగుతున్న సమయంలో ఈ ప్రమాదం చోటుచేసుకుంది. తొలుత కంపెనీలోని ఒక విభాగంలో మంటలు వ్యాపించి, అనంతరం రియాక్టర్ భారీ శబ్దంతో పేలిపోయింది. ఈ క్రమంలో అక్కడే ఉన్న సాల్వెంట్ ఆయిల్ పీపాలు కూడా వరుసగా పేలడంతో మంటలు ఆకాశాన్నంటాయి. దట్టమైన నల్లటి పొగ కిలోమీటర్ల మేర వ్యాపించడంతో స్థానిక గ్రామస్తులు, ఇతర పరిశ్రమల కార్మికులు భయాందోళనకు గురయ్యారు.

ప్రమాదం జరిగిన సమయంలో పరిశ్రమలో సుమారు 14 నుండి 18 మంది కార్మికులు ఉన్నట్లు సమాచారం. రియాక్టర్ పేలిన వెంటనే అప్రమత్తమైన కార్మికులు ప్రాణరక్షణ కోసం బయటకు పరుగులు తీశారు. కంపెనీ ప్రతినిధులు, ప్రాథమిక సమాచారం ప్రకారం, ఈ ఘటనలో ఎవరికీ ఎటువంటి గాయాలు కాలేదు. ప్రాణనష్టం తప్పడంతో అందరూ ఊపిరి పీల్చుకున్నారు.

సమాచారం అందుకున్న వెంటనే అగ్నిమాపక సిబ్బంది పలు ఫైర్ ఇంజన్లతో ఘటనా స్థలానికి చేరుకున్నారు. మంటలు పక్కనే ఉన్న ఇతర పరిశ్రమలకు వ్యాపించకుండా సాల్వెంట్ నిల్వలను అదుపు చేస్తూ ఫైర్ రెస్క్యూ ఆపరేషన్ చేపట్టారు. గంటల తరబడి శ్రమించి మంటలను అదుపులోకి తెచ్చారు.

ఈ ప్రమాదంపై రాష్ట్ర హోంమంత్రి వంగలపూడి అనిత వెంటనే అధికారులతో సమీక్ష నిర్వహించారు. ఘటనకు గల కారణాలపై విచారణ జరపాలని జిల్లా అధికారులను ఆదేశించారు. క్షేత్రస్థాయిలో అందుబాటులో ఉండి సహాయక చర్యలు పర్యవేక్షించాలని సూచించారు. పరిశ్రమల్లో ఇలాంటి ఘటనలు పునరావృతం కాకుండా కఠినమైన భద్రతా ప్రమాణాలు పాటించేలా చర్యలు తీసుకోవాలని అధికారులను ఆదేశించారు. ప్రస్తుతం అగ్నిమాపక అధికారులు, పోలీసులు ప్రమాద స్థలాన్ని పరిశీలిస్తున్నారు. రియాక్టర్ పేలడానికి సాంకేతిక లోపమా లేక అజాగ్రత్తా అనే కోణంలో దర్యాప్తు కొనసాగుతోంది.