జగన్ 'డిజిటల్ బుక్'లో అడ్డంగా బుక్ అయిన మాజీ మంత్రి విడదల రజనీ

డిజిటల్ బుక్ లో వైసీపీ పార్టీ నేతలపైనే ఫిర్యాదులు అందుతున్నాయి. తాజాగా మాజీ మంత్రి విడదల రజినిపై డిజిటల్ బుక్ లో ఫిర్యాదు నమోదు అయింది. దీంతో ఆమె లబోదిబోమంటుండగా ఆమె ప్రత్యర్థులు- అటు సొంత పార్టీలో ఇటు టీడీపీలోని వారు- సంబరాలు చేసుకుంటున్నారు.

విడదల రజినీపై గతంలో కూడా కొందరు క్వారీ యజమానులు ఫిర్యాదులు చేశారు. వాటిపై కేసులు నడుస్తున్నాయి. ఈ నేపథ్యంలో నవతరం పార్టీ నాయకుడు ఫిర్యాదు చేయడం గమనార్హం. రావు సుబ్రమణ్యం ఫిర్యాదు ఇలా ఉంది. ‘2022లో చిలకలూరిపేటలోని నవతరం పార్టీ కార్యాలయం, నా ఇల్లు, కారుపై మాజీ మంత్రి విడదల రజిని దాడి చేయించారు. మాజీ మంత్రిపై చర్యలు తీసుకుని నాకు న్యాయం చేయాలని వైసీపీ అధ్యక్షుడు జగన్‌కి డిజిటల్‌ బుక్‌ యాప్‌ ద్వారా ఫిర్యాదు చేశా. ఈ ఫిర్యాదుపై నాకు న్యాయం చేస్తే జగన్‌ చెప్పినట్లు వైసీపీ కార్యకర్తలకూ న్యాయం జరుగుతుందనే నమ్మకం కలుగుతుంది’ అని రావు సుబ్రహ్మణ్యం కోరారు. వైసీపీ డిజిటల్‌ బుక్‌ యా‌ప్‌‌లో మాజీ మంత్రిపై ఫిర్యాదు చేసిన తర్వాత వచ్చిన టికెట్‌ను సుబ్రహ్మణ్యం మీడియాకు చూపించారు.