ద్రాక్షారామం నిందితుడు అరెస్ట్.. మంత్రి ఆనం షాకింగ్ కామెంట్స్

కక్ష సాధింపు కోసమే శివలింగం ధ్వంసం

ఎస్పీ తెలిపిన వివరాల ప్రకారం.. ద్రాక్షారామ భీమేశ్వరాలయ ఉత్తర గోపురం వద్ద, సప్తగోదావరి ఒడ్డున ఉన్న కపాలేశ్వర స్వామి లింగాన్ని సోమవారం అర్ధరాత్రి నిందితుడు ధ్వంసం చేశాడు. డ్రైనేజీ వివాదంలో ఆలయ సిబ్బందిపై ఉన్న కక్షతో, వారిని ఇబ్బందులకు గురిచేయాలనే ఉద్దేశంతోనే నిందితుడు ఈ పనికి ఒడిగట్టాడు. ఘటన జరిగిన చోట సీసీ కెమెరాలు లేకపోయినా, పరిసర ప్రాంతాల్లోని ఫుటేజీని విశ్లేషించి, క్లూస్ టీమ్ మరియు డాగ్ స్క్వాడ్ సాయంతో నిందితుడిని పట్టుకున్నారు. ఇప్పటికే దేవాదాయ శాఖ అధికారులు అక్కడ నూతన శివలింగాన్ని ప్రతిష్ఠించి పూజా కార్యక్రమాలు నిర్వహించారు.

తప్పు చేస్తే ఎంతటివారైనా ఉపేక్షించం: మంత్రి ఆనం

ఆలయాల్లో జరుగుతున్న వరుస ఘటనలపై దేవాదాయ శాఖ మంత్రి ఆనం రాంనారాయణ రెడ్డి తీవ్రంగా స్పందించారు. ఆత్మకూరులో మీడియాతో మాట్లాడిన ఆయన.. ద్రాక్షారామం, నంద్యాల, సింహాచలం ఘటనలపై వివరణ ఇచ్చారు.

నంద్యాల వెండి వస్తువుల మాయం: నంద్యాల శ్రీవేంకటేశ్వరస్వామి ఆలయంలో అసలు వెండి వస్తువుల స్థానంలో నకిలీవి పెట్టిన వ్యవహారంపై కర్నూలు దేవాదాయ శాఖ డిప్యూటీ కమిషనర్‌తో విచారణకు ఆదేశించామన్నారు. స్వామివారి ఆభరణాలు తిరిగి వచ్చే వరకు నిందితులను వదిలిపెట్టే ప్రసక్తే లేదని స్పష్టం చేశారు.

సింహాచలం ప్రసాదం వివాదం: సింహాచల అప్పన్న ప్రసాదంలో పురుగు వచ్చినట్లు ఫిర్యాదు చేసిన భక్తుడిపై దురుసుగా ప్రవర్తించిన ఉద్యోగిపై కఠిన చర్యలు తీసుకోవాలని ఈవోను ఆదేశించారు. ఇప్పటికే సదరు ఉద్యోగిపై ఎఫ్‌ఐఆర్ నమోదైందని తెలిపారు.

కూటమి ప్రభుత్వ లక్ష్యం అదే

ఆలయాల పరిరక్షణకు పటిష్ఠ చర్యలు తీసుకుంటున్నామని మంత్రి తెలిపారు. "సామాన్య భక్తుల భద్రత, ఆలయాల పవిత్రతను కాపాడటమే కూటమి ప్రభుత్వ ప్రధాన లక్ష్యం. గతంలో ఎన్నడూ లేని విధంగా ముక్కోటి ఏకాదశికి భక్తులు భారీగా తరలివచ్చారు. భవిష్యత్తులో ఇలాంటి అపచారాలు పునరావృతం కాకుండా అధికారులు నిరంతరం అప్రమత్తంగా ఉండాలి" అని హెచ్చరించారు.