కొద్ది రోజులుగా ఆంధ్రప్రదేశ్ ప్రజలను భయాందోళనలకు గురి చేస్తున్న దిత్వా తుఫాన్‌ ఆంధ్రప్రదేశ్ తీరంలోకి వచ్చే సరికి ఉధృతి తగ్గించుకోనుంది. తొలుత శ్రీలంక సముద్రంలో అల్పపీడనంగా ఆవిర్భవించి నైరుతి బంగాళాఖాతంలోకి ప్రవేశించి తుపానుగా బలపడింది. ఆపై అది తమిళనాడు, పుదుచ్చేరిల మీదుగా దక్షిణ ఆంధ్రప్రదేశ్‌ల తీరం వైపు కదులుతూ వస్తోంది. రెండ్రోజుల క్రితమే వాయుగుండం నుంచి తుఫాన్‌గా మారింది. సాధారణంగా సముద్రంలో తుఫాన్‌ ఏర్పడి కొనసాగితే తీరానికి దాటకముందే మరింత బలం పుంజుకుంటుంది. కానీ ఈ దిత్వా మాత్రం అందుకు భిన్నంగా తుఫాన్‌గానే కొనసాగుతోంది. ఆదివారం వేకువజామున ఇది తమిళనాడు తీరానికి చేరువగా వస్తుంది. అనంతరం అదే దిశలో ముందుకు సాగుతూ ఆంధ్రప్రదేశ్ తీరంలోకి ప్రవేశిస్తుంది. ఆపై క్రమంగా వాయుగుండంగా సముద్రంలోనే బలహీనపడుతుంది. అంటే.. ఆంధ్రప్రదేశ్ తీరంలోకి వచ్చే సరికి తుఫాన్‌ తీవ్రత తగ్గిపోతుంది. ఫలితంగా ఏపీకి పెను ముప్పు తప్పినట్టవుతుంది.
వాయుగుండంతో వర్షాలు కురిసినా..
తుఫాన్‌ దిత్వా వాయుగుండంగా బలహీనపడ్డాక కూడా వర్షాలు, గాలులు కొనసాగుతాయి. అయితే తుఫాన్‌తో పోల్చుకుంటే వీటి తీవ్రత తక్కువగా ఉంటుంది. తుఫాన్‌గా ఉంటే గంటకు 70–80, గరిష్టంగా 90 కి.మీల వేగంతో పెనుగాలులు వీస్తాయి. 15–20 సెం.మీల వర కు వర్షపాతం నమోదవుతుంది. అదే వాయుగుండమైతే గంటకు 40–50, గరిష్టంగా 60 కి.మీల వేగంతో గాలులు కొనసాగుతాయి. దీనిని బట్టి తుఫానుకంటే వాయుగుండం వల్ల నష్ట తీవ్రత తక్కువగా ఉంటుందన్న మాట! ఇప్పుడు తమిళనాడు వరకే దిత్వా తుఫాన్‌ కొనసాగి, రాష్ట్ర తీర ప్రాంతంలోకి వచ్చే సరికి తీవ్రత తగ్గి వాయుగుండంగా మారడం ఒకింత ఊరటనిచ్చే పరిణామంగా వాతావరణ నిపుణులు చెబుతున్నారు. లేదంటే ఏపీ తీరంలోనూ తుఫాన్‌ కొనసాగినట్టయితే దాని ప్రభావం ఎక్కువై ప్రాణ, ఆస్తినష్టాన్ని తెచ్చి పెడుతుందని వీరు పేర్కొంటున్నారు.
తుఫాన్‌ తీవ్రత తగ్గడానికి కారణమేంటి?
దిత్వా తుఫాన్‌ ఆంధప్రదేశ్‌ తీరంలోకి ప్రవేశించడానికి ముందే క్రమేపీ బలహీన పడనుంది. తొలుత వాయుగుండంగా, ఆపై అల్పపీడనంగాను సముద్రంలోనే తీవ్రతను తగ్గించుకోనుంది. సాధారణంగా వాయుగుండమైనా, తుఫానైనా సముద్రంలో బలపడాలంటే ఎనర్జీ ఫీడ్‌ బ్యాక్‌ ఉండాలి. ట్రాపికల్‌ సైక్లోన్‌ ఫీడ్‌ పొటన్షియల్‌ (సముద్రంలోని నీటి పొరల్లో వేడి శాతం) 50కి పైగా ఉంటే అవి బలం పుంజుకుంటాయి. కానీ ప్రస్తుతం అది 30 మాత్రమే ఉంది. అందువల్ల తుఫాను శక్తిమంతకం కాకుండా బలహీనపడుతోందని వాతావరణ అధికారి ఒకరు ‘ద ఫెడరల్‌ ఆంధ్రప్రదేశ్ ప్రతినిధి’కి చెప్పారు. దిత్వా తుఫాన్‌ నాలుగు రోజుల పాటు నైరుతి బంగాళాఖాతంలో కొనసాగుతున్నా బలపడకపోవడానికి కారణం ఇదేనని ఆయన విశ్లేషించారు. ట్రాపికల్‌ సైక్లోన్‌ ఫీడ్‌ పొటన్షియల్‌ 50కి మించి ఉంటే తీవ్ర తుఫాన్‌ (సివియర్‌ సైక్లోన్‌)గా ఉధృతమయ్యేదని చెప్పారు. గత నెలలో సంభవించిన మొంథా తీవ్ర తుఫాన్‌ అంతటి ప్రభావం దిత్వా చూపే అవకాశం లేదని వాతావరణ నిపుణులు చెబుతున్నారు.
ఈ జిల్లాల్లో పెనుగాలులు, అతి భారీ వర్షాలు..
నైరుతి బంగాళాఖాతంలో కొనసాగుతున్న దిత్వా తుఫాన్‌ ప్రభావంతో ఆదివారం రోజంతా అనంతపురం, శ్రీసత్యసాయి, కర్నూలు, నంద్యాల, పల్నాడు, బాపట్ల, గుంటూరు జిల్లాల్లో ఒకట్రెండు చోట్ల భారీ వర్షాలు, ప్రకాశం, అన్నమయ్య, కడప జిల్లాల్లో అక్కడక్కడ భారీ నుంచి అతి భారీ వర్షాలు, నెల్లూరు, చిత్తూరు, తిరుపతి జిల్లాల్లో అత్యంత భారీ వర్షాలు కురిసే అవకాశం ఉందని భారత వాతావరణ విభాగం (ఐఎండీ) వెల్లడించింది. ఈ జిల్లాల్లో రెడ్‌ అలెర్ట్‌ ప్రకటించింది. సోమవారం ప్రకాశం, నెల్లూరు జిల్లాల్లో ఒకట్రెండు ప్రాంతాల్లో భారీ నుంచి అతి భారీ వర్షాలు, కోనసీమ, తూర్పు, పశ్చిమ గోదావరి, ఏలూరు, ఎన్టీఆర్, కృష్ణా, గుంటూరు, పల్నాడు, బాపట్ల జిల్లాల్లో అక్కడక్కడ భారీ వర్షాలకు ఆస్కారం ఉందని తెలిపింది. అదే సమయంలో ఆయా జిల్లాల్లో గంటకు 60–70 కి.మీలు, గరిష్టంగా 80 కి.మీల వేగంతో పెనుగాలులు వీస్తాయని పేర్కొంది. సోమవారం వరకు మత్స్యకారులు సముద్రంలో చేపలవేటకు వెళ్లవద్దని హెచ్చరించింది. కృష్ణపట్నం ఓడరేవులో మూడో నంబరు, విశాఖపట్నం, మచిలీపట్నం, నిజాంపట్నం పోర్టుల్లో రెండో నంబరు ప్రమాద హెచ్చరిక జెండాలను ఎగురవేశారు.
