కల్తీ నెయ్యితో ఆ ముగ్గురూ రూ.250 కోట్లు దోచుకున్నారా?

తిరుమల తిరుపతి లడ్డూ తయారీలో వినియోగించే నెయ్యి టెండర్ల ఖరారులో కమీషన్ల కక్కుర్తి ఉందా? ఇంత చిన్న మొత్తాలకు కూడా వైఎస్ జగన్ మోహన్ రెడ్డి నియమించిన టీటీడీ ఛైర్మన్లు పాల్పడ్డారా? తమ అనుకూల కంపెనీలకు ఆనాటి బోర్డు ఛైర్మన్లు వైవీ సుబ్బారెడ్డి, కరుణాకరరెడ్డి, ఈఓ ధర్మారెడ్డి కాంట్రాక్టులు ఇచ్చారా? అంటే అవుననే ఆరోపిస్తోంది తెలుగుదేశం. టీడీపీ అధికార ప్రతినిధి నీలాయపాలెం విజయ్ కుమార్ ఆరోపించిన దాని ప్రకారం ఈ ముగ్గురు కలిసి రూ.250 కోట్లు దోచుకున్నారు. కొన్ని సంస్థలతో కుమ్మక్కయ్యారు. వాళ్లకే వేర్వేరు పేర్లతో నెయ్యి సరఫరా కాంట్రాక్టులు ఇచ్చారని, ఆ పేరిట కమీషన్లు తీసుకున్నారని విజయ్ కుమార్ అక్టోబర్ 5న పత్రికా విలేఖరుల సమావేశంలో ఆరోపించారు. . ‘‘రివర్స్‌ టెండరింగ్ పేరిట తిరుమల నెయ్యి టెండర్లలోనూ జగన్‌ మోహన్ రెడ్డి, ఆయన అనుయాయులు దోపిడీకి పాల్పడ్డారు. తమకు నచ్చినవారిని తక్కువ ధర కోట్‌ చేయాలని... ఎల్‌1, ఎల్‌2లను నిర్ణయించారు. వారికే కాంట్రాక్టులు కట్టబెట్టారు’’ అన్నారు విజయ్ కుమార్. ఆయన ఇంకా ఏమని ఆరోపించారంటే..

‘‘తిరుమలలో ప్రసాదాల తయారీకి రోజుకు 15వేల కేజీల నెయ్యి అవసరం. అంటే ఏడాదికి సుమారు 54 లక్షల కేజీలు. కానీ, టీటీడీకి వైసీపీ అధికారంలో ఉన్న 5 ఏళ్లలో 9 సంస్థలే నెయ్యి సరఫరా చేశాయి. 2019-24 మధ్య నెయ్యి సరఫరాకు 15సంస్థలు టెండర్‌ వేశాయి. టీటీడీ నిర్ణయించిన ధర, కమీషన్లు చెల్లించలేక.. ఆంధ్రాకు చెందిన విజయ, విశాఖ, తిరుమల, సంగం, పరాగ్, కర్ణాటకకు చెందిన నందిని తప్పుకొన్నాయి. మిగిలిన 10 సంస్థల్లో 9 సంస్థలు కాంట్రాక్టులు దక్కించుకొన్నాయి. వీటిలో తొమ్మిది ఇతర రాష్ట్రాలవి కాగా.. వైష్ణవి ఫుడ్స్‌ మాత్రమే ఆంధ్రా సంస్థ’’ అన్నారు విజయ్‌కుమార్. ఉత్తరప్రదేశ్ కి చెందిన ప్రీమియర్‌ అత్యధికంగా ఆరుసార్లు కాంట్రాక్టు దక్కించుకుంది. ఏపీకి చెందిన వైష్ణవి ఫుడ్స్, ఉత్తరప్రదేశ్ కి చెందిన ఆల్ఫా మిల్క్, మహారాష్ట్రకు చెందిన మల్‌గంగా అగ్రి ప్రొడక్ట్స్‌ నాలుగేసి సార్లు, ఇందాపూర్‌ డెయిరీ రెండుసార్లు, భోలేబాబా ఆర్గానిక్‌ డెయిరీ ఒకసారి, మధ్యప్రదేశ్‌కు చెందిన జయశ్రీ గాయత్రి ఫుడ్స్‌ ఒకసారి, రాజస్థాన్‌కు చెందిన దావూజీ, తమిళనాడుకు చెందిన ఏఆర్‌ డెయిరీ ఒకసారి చొప్పున నెయ్యి సరఫరా చేశాయి’’ అన్నారు విజయ్‌కుమార్‌.