కస్టడీకి ఆంజనేయలు ఐపీఎస్‌

డీజీపీ ర్యాంకులో ఉన్న పీఎస్‌ఆర్‌ ఆంజనేయులును ముంబాయి సినీ నటి కాదంబరీ జెత్వానీ వేధింపుల కేసులో పోలీసులు అరెస్టు చేశారు. హైదరాబాద్‌లో అరెస్టు చేసి విజయవాడకు తీసుకొచ్చారు. వైద్య పరీక్షల అనంతరం ఆయనను విజయవాడ కోర్టు ముందు హాజరు పరిచారు. దీనిపై విచారణ చేపట్టిన కోర్టు ఆంజనేయులుకు 14 రోజుల పాటు రిమాండ్‌ విధించింది.

పీఎస్‌ఆర్‌ ఆంజనేయులును విచారించాల్సిన అవసరం ఉంది, కేసుకు సంబంధించి మరిన్ని వివరాలు రాబట్టాల్సి ఉంది, ఈ నేపథ్యంలో వారం రోజుల పాటు కస్టడీకి తీసుకునేందుకు అనుమతులు ఇవ్వాలని సీఐడీ పోలీసులు కోర్టులో పిటీషన్‌ దాఖలు చేశారు. దీనిపైన విచారణ చేపట్టిన కోర్టు వారం రోజులకు బదులుగా మూడు రోజులు కస్టడీకి తీసుకునేందుకు అనుమతులు మంజూరు చేస్తూ ఆదేశాలు జారీ చేసింది. ఆదివారం, సోమవారం, మంగళవారం ఉదయం 10 గంటల నుంచి సాయంత్రం 5 గంటల వరకు విచారించేందుకు అనుమతులిచ్చింది. అయితే న్యాయవాదుల సమక్షంలో పీఎస్‌ఆర్‌ ఆంజనేయులను విచారించాల్సి ఉంటుందని సీఐడీ అధికారులను కోర్టు ఆదేశించింది. ఈ నేపథ్యంలో పీఎస్‌ఆర్‌ ఆంజనేయులును సీఐడీ అధికారులు మూడు రోజుల పాటు విచారించేందుకు కస్టడీకి తీసుకున్నారు.