సాక్షి చర్చపై చంద్రబాబు సీరియస్‌
మీడియా ముసుగులో వికృత పోకడలకు పోతున్నారంటూ సీఎం చంద్రబాబు ఆగ్రహం వ్యక్తం చేశారు,
అమరావతి మహిళల ఆగ్రహాలు, ఆందోళనలు తీవ్రతరం అవుతున్న నేపథ్యంలో ముఖ్యమంత్రి చంద్రబాబు రియాక్ట్‌ అయ్యారు. సాక్షి చర్చలో అమరావతి మహిళలపై సీనియర్‌ జర్నలిస్టు వివిఆర్‌ కృష్ణంరాజు అభ్యంతరకర వ్యాఖ్యలు చేశారంటూ శనివారం నుంచి పెద్ద ఎత్తున ఆందోళనలు, నిరసనలు చేపడుతున్నారు. ఈ నేపథ్యంలో సీఎం చంద్రబాబు స్పందించారు. మాజీ ముఖ్యమంత్రి వైఎస్‌ జగన్‌మోహన్‌రెడ్డి స్త్రీ జాతికి క్షమాపణలు చెప్పాలని సీఎం చంద్రబాబు డిమాండ్‌ చేశారు. సాక్షి వేదికగా చేసిన వ్యాఖ్యలను ఇప్పటికీ జగన్‌ ఖండించలేదని, రాజధాని అమరావతిపై విషం చిమ్మే కుట్రలో ఇది కూడా ఒక భాగమని చంద్రబాబు వ్యాఖ్యానించారు. ఆ మేరకు సోషల్‌ మీడియా వేదికగా ఆయన స్పందించారు.
చంద్రబాబు ఏమన్నారంటే..
ఆడబిడ్డలను గౌరవించే సంçస్కృతి మనది. స్త్రీమూర్తులను ఆరాధించే సమాజం మనది. ఇది మన సంప్రదాయం. మన భారతీయ జీవన విధానం. ముఖ్యంగా మన తెలుగు ప్రజల విషయానికి వస్తే ఆడబిడ్డను, అమ్మను ఎంతో ఆదరణతో చూస్తాం. అలాంటి మన రాష్ట్రంలో రాజకీయ కక్షతో, మీడియా విశ్లేషణల పేరుతో నిస్సిగ్గుగా ఏకంగా మన తల్లులు, చెల్లెళ్లపై దారుణ వ్యాఖ్యలు చేయడం క్షమించరాని నేరం. వాళ్లు ఎప్పుడూ అనుసరించే ఈ విష సంçస్కృతిపై తిరుగుబాటుగా గత ఎన్నికల్లో ప్రజలు తీర్పు ఇచ్చినా వారి వైఖరిలో మార్పు రాలేదనేది సుస్ఫష్టం. రాజధాని గురించి, ఆ ప్రాంత మహిళల వ్యక్తిత్వాలను అవమానించేలా వేశ్యలు అంటూ చేసిన దారుణ వ్యాఖ్యలను ఉపేక్షించే ప్రసక్తే లేదు.
రాజకీయ, మీడియా ముసుగులో జరుగుతున్న ఇటువంటి వికత పోకడలను తీవ్రంగా ఖండిస్తున్నాను. తన సొంత మీడియా చానల్‌ ద్వారా జరిగిన ఈ దారుణాన్ని ఒక మాజీ ముఖ్యమంత్రిగా ఉన్న వ్యక్తి ఇప్పటికీ ఖండించకపోవడం, స్త్రీ జాతికి క్షమాపణ చెప్పకపోవడం మరింత విచారకరం. రాజధానిపై విషం చిమ్మే కుట్రలో గట్టు దాటి మహిళల మనోభావాలను గాయపరచిన వారిపై అత్యంత కఠిన చర్యలు తీసుకుంటాం. గత విధ్వంస ప్రభుత్వం పై రాజధాని మహిళల పోరాటాన్ని మనసులో పెట్టుకుని ఆ ప్రాంత మహిళలపై ఉద్దేశ్యపూర్వకంగా, నీచాతినీచంగా చేసిన ఈ వ్యాఖ్యలు మొత్తం మహిళా సమాజాన్నే అవమానించడం. మహిళలను గౌరవించే, వారి ఆత్మగౌరవానికి అండగా నిలిచే కూటమి ప్రభుత్వం ఈ నీచ సంçస్కృతికి చెక్‌ పెట్టే బాధ్యత తీసుకుంటుంది. అంటూ ఎక్స్‌ వేదికగా సీఎం చంద్రబాబు పేర్కొన్నారు.
Next Story