పర్యటనల్లో పంథా మార్చిన చంద్రబాబు

కొత్త శైలితో నేరుగా ప్రజలతో సంబంధాలు

చంద్రబాబు నాయుడు గతంలో టెక్నాలజీ గవర్నెన్స్‌కు, ఐటీ రంగ అభివృద్ధికి, పెద్ద ఎత్తున ప్రాజెక్టులకు ప్రసిద్ధి చెందిన నాయకుడిగా గుర్తింపు పొందారు. అయితే 2024 ఎన్నికల అనంతరం ఆయన నాల్గవసారి ముఖ్యమంత్రిగా బాధ్యతలు చేపట్టిన తర్వాత, పర్యటనలు ప్రజలతో నేరుగా సంబంధం పెంచే దిశగా మళ్లాయి. ప్రతి గ్రామంలో ఒక కుటుంబాన్ని ఎంచుకుని, వారి జీవన విధానం, ఆదాయ వనరులు, పిల్లల చదువు, ఇంటి సౌకర్యాల గురించి వివరంగా అడిగి తెలుసుకుంటున్నారు. ఆ కుటుంబంతో కలిసి టీ లేదా కాఫీ తయారు చేసి, వారితో కూర్చుని తాగడం, వారి ఇంటి పనులకు సహాయం అందించడం వంటి సామాన్య చర్యల ద్వారా సన్నిహితత్వాన్ని పెంచుతున్నారు.

సెక్యూరిటీని దూరంగా ఉంచి ఒక ఫొటోగ్రాఫర్, వీడియోగ్రాఫర్‌తో మాత్రమే అటూ ఇటూ వెళుతూ ప్రజలు భయం లేకుండా మాట్లాడే వాతావరణాన్ని కల్పించారు. స్థానిక ఎమ్మెల్యేలు, అధికారులను ఈ సందర్శనలలో పాల్గొనకుండా చేయడం ద్వారా, ప్రజల నుంచి నేరుగా సమాచారం సేకరిస్తున్నారు. ఈ శైలి గతంలో ఆయన టెక్నాలజీ ఇమేజ్‌కు భిన్నంగా, ఒక సామాన్య నాయకుడిగా, ప్రజల సమస్యలను దగ్గరగా అర్థం చేసుకునే నాయకుడిగా కొత్త గుర్తింపును తెచ్చిపెడుతోంది.

జిల్లా పర్యటనల్లో ఆసక్తికర అంశాలు

చంద్రబాబు నాయుడు ఇటీవల జిల్లా పర్యటనలలో కొన్ని ఆసక్తికర అంశాలు ఈ కొత్త శైలిని స్పష్టంగా వెల్లడిస్తాయి. బాబూ జగ్జీవన్ రామ్ జయంతి సందర్భంగా ఎన్టీఆర్ జిల్లా ముప్పాళ్ల గ్రామంలో ఒక నిరుపేద కుటుంబాన్ని సందర్శించారు. ఈ సందర్శనలో ఆయన కుటుంబ సభ్యులతో కాఫీ తయారు చేసి, వారితో కలిసి తాగారు. ఈ కుటుంబ అభివృద్ధి కోసం ప్రభుత్వం యొక్క P4 (Public-Private-People Partnership) కార్యక్రమం గురించి వివరించి వారి బాధ్యతను తీసుకున్నారు. ఈ సందర్భంలో ఆయన స్థానిక అధికారులు, ఎమ్మెల్యేలను అనుమతించలేదు. కుటుంబ సభ్యులు భయం లేకుండా తమ సమస్యలను పంచుకునేలా చేశారు. ఒకే ఇంట్లో నలుగురు అన్నదమ్ములం ఉంటున్నామని చెప్పినప్పుడు దూరంగా ఉన్న కలెక్టర్ ను పిలిచి వీరికి వేరు వేరుగా ఇండ్లస్థలాలు ఇచ్చి ఇళ్లు నిర్మించి ఇవ్వాలని ఆదేశించారు.

ముప్పాళ్ల సాంఘిక సంక్షేమ గురుకుల పాఠశాల సందర్శన (ఏప్రిల్ 5, 2025)

ఎన్టీఆర్ జిల్లా ముప్పాళ్ల గ్రామంలో సాంఘిక సంక్షేమ గురుకుల విద్యాలయాన్ని ఆయన సందర్శించారు. భవనం ఆరేళ్ల క్రితం నిర్మించింది కావడంతో అన్ని హంగులు ఉన్నాయి. పాఠశాలలో ఇద్దరు విద్యార్థులను ఎంచుకుని, వారితో మాట్లాడి, పాఠశాలలోని ప్రతి గదిని పరిశీలించారు. విద్యార్థులకు అందించే భోజనం రుచి చూసి, వారి విద్యా సౌకర్యాల గురించి వివరంగా అడిగి తెలుసుకున్నారు. ఈ సందర్శనలో కూడా ఆయన స్థానిక అధికారులను దూరంగా ఉంచి, విద్యార్థులతో స్వేచ్ఛగా మాట్లాడారు. గురుకులంలోని డార్మెట్రీ, డైనింగ్ హాలు, తరగతి గదులు బాగున్నాయని అభినందించారు.

బాపట్ల జిల్లా, పర్చూరు నియోపకవర్గం, పెదగంజాం (ఏప్రిల్ 1,2025)

ఎన్టీఆర్ భరోసా సామాజిక పింఛన్ ల పంపిణీ కార్యక్రమంలో పాల్గొన్న ముఖ్యమంత్రి నేరుగా మూడు ఇళ్లకు వెళ్లి వారితో మాట్లాడి పింఛన్ లు స్వయంగా అందజేశారు. 43 ఏళ్లుగా టీడీపీ జెండా మోస్తున్నది బలహీన వర్గాలేనని సీఎం ఈ సందర్భంగా అన్నారు. పర్చూరు నియోజకవర్గంలోని పెదగొల్లపాలెంలో మానశిక దివ్యాంగురాలైన వడ్లమూడి సుభాషిణి ఇంటికి సీఎం నేరుగా వెళ్లారు. అక్కడ ఆమెకు పింఛన్ అందించడంతో పాటు సుభాషిణి కుటుంబానికి ఇల్లు మంజూరు చేశారు. ఆమె తల్లికి ఒంటరి మహిళ పెన్షన్ మంజూరు చేస్తానని హామీ ఇచ్చారు. సుభాషిణ చెల్లెలు భరణి పక్కనే ఉన్నారు. ఆమెను చూస్తూ ఏమి చదువుకున్నావ్, ఏమి కావాలనుకుంటున్నావని సీఎం అడిగారు. తనకు పోలీస్ కావాలని ఉందని భరణి చెప్పారు. పోలీస్ అయితే జనాలను బాగా కొట్టొచ్చని అనుకుంటున్నావా అని నవ్వుతూ అన్నారు. చదివించేందుకు ఇబ్బంది పడుతున్నామని కుటుంబ సభ్యులు తెలుపగా ఆబాలికను కస్తూర్బా గాంధీ పాఠశాలలో చేర్పించాలని అధికారులను ఆదేశించారు. మరో లబ్ధిదారు జాలమ్మ ఇంటికి వెళ్లి పింఛన్ అందించారు. జాలమ్మకు ఇల్లు మంజూరు చేశారు. గ్యాస్ కనెక్షన్ ఇప్పించాలని ఆదేశించారు. బీసీ కార్పొరేషన్ ద్వారా రుణం ఇప్పించాలని ఆదేశించారు.

శ్రీకాకుళం జిల్లా, ఎచ్చెర్ల నియోజకవర్గం, బుడగట్లపాలెం (ఏప్రిల్ 26, 2025)

’మత్స్యకారుల సేవ‘లో పథకం ప్రారంభోత్సవం సందర్భంగా చంద్రబాబు సముద్రతీరంలోని మద్దు పోలేష్, రామలక్ష్మీ అనే మత్స్యకార కుటుంబంతో సమయం గడిపారు. ఆయన వారితో కలిసి తీరంలో తిరిగి, ఎండబెట్టిన చేపలను పరిశీలించి, వారి అమ్మకాలు, ఆర్థిక స్థితి, జీవన విధానం గురించి వివరంగా అడిగి తెలుసుకున్నారు. ఈ సందర్శనలో కూడా ఆయన సెక్యూరిటీని దూరంగా ఉంచి, కేవలం ఫొటోగ్రాఫర్, వీడియోగ్రాఫర్‌తో మాత్రమే వెళ్లారు. గత పాలకుల్లాగా నేను కూడా బటన్ నొక్కొచ్చు. కానీ నేను అలా చేయను ప్రజల మధ్యకు వచ్చి వాళ్ల సమస్యలు తెలుసుకుంటానని అన్నారు. ముందుగా మత్స్యకారులు తురాడ అప్పన్న, అలుపల్లి తవితాయ కుటుంబాలకు చెరో రూ. 20 వేలు చొప్పున ఆర్థిక సాయం అందజేశారు. మత్స్యకారుల పిల్లల చదువులకు ప్రత్యేకంగా రాష్ట్రంలో ఆరు గురుకుల విద్యాలయాలు ఏర్పాటు చేసినట్లు తెలిపారు.

కడప జిల్లా, మైదుకూరు మున్సిపాలిటీ (జనవరి 2025)

స్వర్ణ ఆంధ్ర, స్వచ్ఛ ఆంధ్రప్రదేశ్ కార్యక్రమంలో భాగంగా చంద్రబాబు వినాయకనగర్‌లోని వేల్తుర్ల విష్ణు వందన కుటుంబాన్ని సందర్శించారు. వారి కుటుంబ జీవన స్థితిగతులు, విద్య, ఉద్యోగ అవకాశాలు, ఆదాయ వనరుల గురించి వివరంగా తెలుసుకున్నారు. ఈ సందర్శన కూడా సామాన్య స్థాయిలో ఎటువంటి అధికారిక హంగు లేకుండా జరిగింది.

కర్నూలు జిల్లా, పత్తికొండ నియోజకవర్గం, పుచ్చకాయలమాడ (అక్టోబర్ 2024)

పింఛన్ల పంపిణీ కార్యక్రమంలో భాగంగా చంద్రబాబు స్వయంగా లబ్ధిదారుల ఇళ్లకు వెళ్లి పింఛన్లు అందజేశారు. ఈ సందర్భంలో ఆయన పిల్లలతో సరదాగా ముచ్చటించి, కుటుంబ యోగక్షేమాలు అడిగి తెలుసుకున్నారు. ఆయన స్థానిక నాయకులు, అధికారులను దూరంగా ఉంచి వృద్ధులతో ఆప్యాయంగా మాట్లాడారు.

ఈ పంథా దేనికి సంకేతం?

చంద్రబాబు నాయుడు ఈ కొత్త శైలి ద్వారా రాజకీయ, సామాజిక, పరిపాలనా రంగాలలో బహుముఖ లక్ష్యాలను సాధించడానికి ప్రయత్నిస్తున్నారు. ఈ పంథా ఉద్దేశ్యాలు, దాని సంకేతాలను ఈ విధంగా అర్థం చేసుకోవచ్చు. ఈ సందర్శనలు ప్రజలలో విశ్వాసాన్ని పెంచి, ప్రభుత్వంపై ఆధారపడే భావనను కలిగిస్తాయి. స్థానిక ఎమ్మెల్యేలు, అధికారులను దూరంగా ఉంచడం ద్వారా, చంద్రబాబు ప్రజల నుంచి నేరుగా, ఫిల్టర్ చేయని సమాచారాన్ని సేకరిస్తున్నారు. ఇది పరిపాలనలో పారదర్శకతను పెంచడంతో పాటు స్థానిక నాయకుల ప్రభావాన్ని తగ్గిస్తుంది. ఈ విధానంలో గ్రామీణ స్థాయిలో ప్రజలు ఎదుర్కొంటున్న నిజమైన సమస్యలను అర్థం చేసుకుని, వాటిని పరిష్కరించేందుకు వీలవుతుంది.

చంద్రబాబు ప్రవేశపెట్టిన P4 (Public-Private-People Partnership) మోడల్‌లో ప్రజలు పాల్గొనడం కీలకం. ఈ మోడల్‌ను గ్రామీణ స్థాయిలో ప్రచారం చేయడానికి, ప్రజలను ఈ కార్యక్రమంలో భాగస్వాములుగా చేయడానికి ఉపయోగపడుతున్నాయి. ముప్పాళ్ల గ్రామంలో ఒక కుటుంబ అభివృద్ధి బాధ్యతను తీసుకోవడం ఈ మోడల్ ప్రాముఖ్యతను సూచిస్తుంది. సామాజికంగా వెనుకబడిన వర్గాలు, మత్స్యకారులు, గిరిజనులు, వృద్ధులపై దృష్టి సారిస్తున్నాయి. ఇది సమాజంలోని అన్ని వర్గాలకు చేరువయ్యే ప్రయత్నంగా కనిపిస్తుంది. ఈ శైలి 2024 ఎన్నికలలో కూటమికి లభించిన భారీ మెజారిటీని దీర్ఘకాలికంగా నిలబెట్టడానికి ఉపయోగపడుతుంది.

కొత్త ఇమేజ్ ను అందించడం..

ఈ పర్యటనలను ఫొటోగ్రాఫర్, వీడియోగ్రాఫర్ ద్వారా రికార్డ్ చేయడం, సోషల్ మీడియాలో వీటిని ప్రచారం చేయడం ద్వారా, చంద్రబాబు తన కొత్త ఇమేజ్‌ను విస్తృతంగా ప్రజలకు చేరవేస్తున్నారు. ఈ విధానం ఆయన గతంలో ప్రారంభించిన "ప్రజలతో ముఖ్యమంత్రి" లాంటి కార్యక్రమాలకు ఆధునిక రూపంగా కనిపిస్తుంది.

గతంతో పోలిస్తే భిన్నమైన మార్పు

గతంలో చంద్రబాబు నాయుడు పర్యటనలు అధికారిక సభలు, పెద్ద ఎత్తున ప్రకటనలు, ప్రాజెక్టులపై దృష్టి సారించాయి. అయితే ఈ కొత్త శైలి అందుకు భిన్నంగా ఉంది గతంలో పరిపాలనా అంశాలు ప్రధానంగా ఉండగా, ఇప్పుడు ప్రజల జీవన విధానంపై దృష్టి ఉంది. అధికారిక సమావేశాల స్థానంలో, సామాన్య కుటుంబాలతో సహజమైన సంభాషణలు జరుగుతున్నాయి. ఎమ్మెల్యేలు, అధికారులను దూరంగా ఉంచడం ద్వారా, సీఎం నేరుగా ప్రజలతో సంబంధం పెంచుకుంటున్నారు. ప్రజలతో చేసిన ముచ్చట్లను సోషల్ మీడియా ద్వారా విస్తృతంగా ప్రచారం చేస్తూ ఆధునిక రాజకీయ వ్యూహాన్ని అనుసరిస్తున్నారు.

ఇందులో సవాళ్లు ఉంటాయా?

ఈ కొత్త పంథా అనేక ప్రయోజనాలను అందిస్తున్నప్పటికీ, కొన్ని సవాళ్లు కూడా ఉన్నాయి. ప్రతి గ్రామంలో ఒక కుటుంబాన్ని సందర్శించడం సమయం తీసుకునే పని. ఇది ఇతర పరిపాలనా బాధ్యతలపై ప్రభావం చూపవచ్చు. ఎమ్మెల్యేలు, స్థానిక నాయకులను దూరంగా ఉంచడం వల్ల, వారిలో అసంతృప్తి పెరిగే అవకాశం ఉంది. ఈ సందర్శనలు ప్రజలలో అధిక అంచనాలను రేకెత్తించవచ్చు, వీటిని నెరవేర్చడం సవాలుగా ఉండవచ్చు ననే చర్చ కూడా అధికార కూటమిలోనే జరుగుతోంది.

రాజకీయ మార్పులకు నాంది...

చంద్రబాబు నాయుడు ఈ కొత్త పర్యటనల శైలి ఆయన రాజకీయ వ్యూహంలో ఒక సమూల మార్పును సూచిస్తుంది. గతంలో టెక్నాలజీ గవర్నెన్స్‌పై దృష్టి సారించిన ఆయన, ఇప్పుడు ప్రజలతో సన్నిహిత సంబంధాన్ని పెంచడం ద్వారా, సామాన్య నాయకుడిగా కొత్త గుర్తింపును సృష్టిస్తున్నారు. ఈ శైలి ప్రజల్లో విశ్వాసాన్ని పెంచడమే కాక, పరిపాలనలో పారదర్శకతను, P4 మోడల్‌ను ప్రోత్సహించడంలో కీలక పాత్ర పోషిస్తోంది. శ్రీకాకుళం, ఎన్టీఆర్, కర్నూలు, కడప జిల్లాల్లో ఇటీవలి సందర్శనలు ఈ పంథా ఆసక్తికర అంశాలను వెల్లడిస్తాయి. అయితే ఈ విధానం దీర్ఘకాలికంగా ఎంతవరకు సఫలమవుతుందనేది ప్రజల అంచనాలను నెరవేర్చడంపై, స్థానిక నాయకుల మధ్య సమతుల్యతను కాపాడడంపై ఆధారపడి ఉంటుంది.