కిర్లంపూడిలో కారు బీభత్సం, ముగ్గురు స్పాట్ డెడ్
కిర్లంపూడి పోలీసులు కేసు నమోదు చేసి దర్యాప్తు చేపట్టారు.
కాకినాడ జిల్లా కిర్లంపూడిలో కారు బీభత్సం సృష్టించింది. కిర్లంపూడి మండలం సోమవరం గ్రామం సమీపంలో జాతీయ రహదారిపై ఘోర రోడ్డు ప్రమాదం జరిగింది. అన్నవరం వద్ద పెళ్లి కార్యక్రమం ముగించుకుని జగ్గంపేటకు తిరిగి వెళ్తున్న కారుకు ఫ్రంట్ టైర్ పేలి అదుపు తప్పింది. రోడ్డు పక్కన బస్సు షెల్టర్‌లో వేచి ఉన్న ఆరుగురు ప్రయాణికులపై కారు దూసుకెళ్లింది. ఈ దుర్ఘటనలో ముగ్గురు స్పాట్‌లోనే మృతి చెందగా, మరో ముగ్గురికి తీవ్ర గాయాలయ్యాయి.
మృతులు విద్యార్థులు, స్థానిక ప్రయాణికులు కాగా, గాయపడినవారిని తక్షణమే సమీప ఆసుపత్రికి తరలించారు. ఎమ్మెల్యే జ్యోతుల నెహ్రూ సమాచారం అందుకుని హుటాహుటిన ఘటనాస్థలికి చేరుకుని క్షతగాత్రులను ఆసుపత్రికి పంపించారు. వైద్యులు వారికి అవసరమైన చికిత్స అందిస్తున్నారు.
ప్రమాదం జరిగిన ప్రాంతంలో ట్రాఫిక్ సమస్య ఏర్పడింది. కిర్లంపూడి పోలీసులు కేసు నమోదు చేసి దర్యాప్తు చేపట్టారు. డ్రైవర్ నిర్లక్ష్యం, అధిక వేగం కారణంగా ఈ ప్రమాదం జరిగినట్లు ప్రాథమిక దర్యాప్తులో తేలింది. రోడ్డు భద్రతపై మరింత అప్రమత్తత అవసరమని స్థానికులు డిమాండ్ చేస్తున్నారు. రాష్ట్రంలో వరుస రోడ్డు ప్రమాదాలు ఆందోళన కలిగిస్తున్న నేపథ్యంలో ట్రాఫిక్ నిబంధనలు కఠినంగా అమలు చేయాలని నిపుణులు సూచిస్తున్నారు.
