బెల్టు షాపులు తొలగించి..నీరా కేఫ్‌లు పెట్టాలి

బెల్టుషాపులు పెడితే.. పెట్టిన వారి తోలు తీస్తామని సీఎం చంద్రబాబు, మంత్రి కొల్లు రవీంద్రలు చెప్పారని, కానీ ఇంత వరకు ఎంత మంది తోలు ఒలుశారో చెప్పాలని డిమాండ్‌ చేశారు. ఎక్సైజ్‌ మంత్రి కొల్లు రవీంద్ర నియోజక వర్గంలో లెక్కలేనన్ని బెల్టు షాపులు ఉన్నాయని, వరదలా మద్యం ఏరులై పారుతోందని జుత్తిగ నరసింహమూర్తి మండిపడ్డారు. లక్షలాది మంది ఆధారపడి జీవిస్తున్న కల్లుగీత వృత్తిని కూటమి ప్రభుత్వం సర్వనాశనం చేస్తోందని మండిపడ్డారు. కల్లుగీత కార్మికుల ద్రోహం చేస్తున్న తీరు మీద, బెల్లుషాపులు తొలగించి, వాటికి బదులుగా నీరా కేఫ్‌లు ఏర్పాటు చేయాలనే దానిపై సెప్టెంబరు 30 వరకు దశల వారీగా ఆందోళనలు చేపడుతామని ఆయన స్పష్టం చేశారు. ఆగస్టు 2న అన్ని జిల్లాల్లో రౌండ్‌టేబుల్‌ సమావేశాలు నిర్వహించడంతో పాటు ఆగస్టు 30న అన్ని జిల్లాల్లోని ఎక్సైజ్‌ సూపరింటెండెంట్‌ కార్యాలయాలను ముట్టడించే ఆందోళన కార్యక్రమాలను నిర్వహించనున్నట్లు తెలిపారు. సెప్టెంబరు 10న ముఖ్యమంత్రి నారా చంద్రబాబుకి వినతి పత్రం సమర్పించనున్నట్లు చెప్పారు. సెప్టెంబరు 12న బెల్టుషాపులు, కల్లు పాలసీ, ఉపాధిపైన అన్ని జిల్లాల్లో సదస్సులు నిర్వహిస్తామన్నారు. సెప్టెంబరు 25న జిల్లాల్లో సమీక్షలు, సభలు నిర్వహించనున్నట్లు జుత్తిగ నరసింహమూర్తి వెల్లడించారు. తమ ఆందోళనలపై అప్పటికీ కూటమి ప్రభుత్వం, సీఎం చంద్రబాబు స్పందించకపోతే సెప్టెంబరు 30న మరో కార్యాచరణను ప్రకటిస్తామన్నారు. తెలంగాణ రాష్ట్రం మాదిరిగా ఏపీలో కూడా నీరా పరిశ్రమలు ఏర్పాటు చేయాలని ఆయన డిమాండ్‌ చేశారు.