పోసానికి బెయిలా? జైలా? మరో 48 గంటలు ఉత్కంఠ

సినీనటుడు పోసాని కృష్ణ మురళి బెయిల్ పిటీషన్ పై మార్చి 21న తీర్పు వెలువడుతుంది. ఆయన బెయిల్ పిటీషన్ పై మార్చి 19 బుధవారం గుంటూరు కోర్టులో జరిగిన వాదనలు ముగిశాయి. తీర్పును 21వ తేదీకి వాయిదా వేశారు. ముఖ్యమంత్రి చంద్రబాబు నాయుడు (CM Chandrababu Naidu), ఉపముఖ్యమంత్రి పవన్ కళ్యాణ్ (Deputy CM Pawan Kalyan), మంత్రి నారా లోకేష్‌పై (Minister Lokesh) అనుచిత వ్యాఖ్యలు చేశారనే ఆరోపణపై ఆయన్ను పోలీసులు అరెస్ట్ చేశారు. ప్రస్తుతం ఆయన గుంటూరు జిల్లా జైల్లో రిమాండ్‌లో ఉన్నారు. ముందు అన్నమయ్య జిల్లా పోలీసులు ఆయన్ను అరెస్ట్ చేశారు. ఆ తరువాత వివిధ జిల్లాలలో కేసులు నమోదు అయ్యాయి.

వైసీపీ ప్రభుత్వ హయాంలో పోసాని హైదరాబాద్‌లో మీడియా సమావేశం ఏర్పాటు చేసి చంద్రబాబుపై అనుచిత వ్యాఖ్యలు చేశారు. దీనిపై తీవ్రంగా అభ్యంతరం వ్యక్తం చేస్తూ టీడీపీ కార్యకర్త బండారు వంశీకృష్ణ గత ఏడాది అక్టోబర్‌లో సీఐడీకి ఫిర్యాదు చేయడంతో వారు కేసు నమోదు చేశారు. ఈ క్రమంలో ఈనెల 12న కర్నూలు జిల్లాలో ఉన్న పోసానిని పీటీ వారెంట్‌పై గుంటూరుకు తీసుకువచ్చి కోర్టులో హాజరుపర్చడంతో ఆయనకు రిమాండ్ విధించింది కోర్టు. ఆ తర్వాత పవన్ కల్యాణ్ పై కూడా అనుచిత వ్యాఖ్యలు చేశారు. దీనికి సంబంధించి కూడా వివిధ జిల్లాలలో కేసులు నమోదు అయ్యాయి.