2026లోనైనా జగన్ అసెంబ్లీ మొహం చూస్తారా, తాడేపల్లి నుంచే 'యుద్ధమా'?

కూటమి ప్రభుత్వం అధికారం చేపట్టి 18 నెలలైంది. మాజీ ముఖ్యమంత్రి వై.ఎస్. జగన్ మోహన్ రెడ్డి అసెంబ్లీ మొహం చూడడం లేదు. ఎమ్మెల్యేగా ప్రమాణ స్వీకారం చేసిన తర్వాత అసెంబ్లీలో తన సీట్లో కూర్చున్నదే లేదు. రాష్ట్రంలో ఇదో హాట్ టాపిక్కే. దీని వెనుక కేవలం ప్రతిపక్ష హోదా వివాదం మాత్రమే కాదు, లోతైన రాజకీయ వ్యూహాలు, అధికార, ప్రతిపక్షాల మధ్య సాగుతున్న 'మైండ్ గేమ్' స్పష్టంగా కనిపిస్తోంది.

ఇక, రాజ్యాంగంలోని ఆర్టికల్ 190(4) ప్రకారం 60 రోజులు గైర్హాజరైతే సభ్యత్వం రద్దు చేసే అవకాశం ఉన్నా, జగన్ దానిని ఏమాత్రం ఖాతరు చేయరు. పట్టించుకోరు. అది కేవలం సాంకేతిక వెసులుబాటు అని జగన్ కి స్పష్టత ఉంది. ఆయన నిరంతరాయంగా 60 రోజులు అసెంబ్లీకి వెళ్లకుండా లేరు. ఒకసారి ప్రమాణ స్వీకారానికి వచ్చారు. మరోసారి రాజ్యసభ ఎన్నికలపుడు వచ్చారు. కనుక అనర్హత వేటు వేయడం స్పీకర్‌కు చట్టపరంగా ఇబ్బందే అవుతుంది. గతంలో చంద్రబాబు సభలో భీష్మప్రతిజ్ఞ చేసి ఏకంగా రెండేళ్లపాటు సభకు వెళ్లకపోయినా వైసీపీ వేటు వేయలేకపోయింది. ఇప్పుడూ అదే జరుగుతుందన్నది జగన్ ధీమా అని సాక్షాత్తు టీటీడీ నేతలే చెబుతున్నారు.

చాలా చోట్ల పోలీసులు పరిమిత సంఖ్యలో అనుమతులు ఇచ్చినా, జనం వేల సంఖ్యలో తరలివస్తున్నారు. ట్రాఫిక్ జామ్ అవుతున్నా, ప్రజలు రోడ్ల మీద వేచి చూడటం ఆయనకున్న 'మాస్ అప్పీల్'కు నిదర్శనంగా కనిపిస్తోంది.

సూపర్ సిక్స్ వైఫల్యాలే ఆయుధాలుగా ప్రభుత్వ వైఫల్యాలను ఎట్టగట్టడానికి ప్రజల్లోకి వెళ్లాలన్నది తన వ్యూహంగా ఉన్నట్టు ఆయన సన్నిహిత సహచరుడొకరు చెప్పారు. తద్వార అటు తన గైర్హాజరీని ప్రశ్నిస్తున్న చెల్లెలు షర్మిలకు ఇటు టీడీపీ, జనసేన నేతలకు- ప్రజా క్షేత్రంలో బలం నిరూపించుకోవడం ద్వారా సమాధానం చెప్పాలనుకుంటున్నారు.

ప్రస్తుతానికి అసెంబ్లీలో అధికార పక్షం, బయట ప్రతిపక్షం.. ఎవరి దారిలో వారు పోరాడుతున్నారు. 2026లో జగన్ అసెంబ్లీకి రాకపోతే అది ఒక రికార్డు అవుతుంది. కానీ, రాజ్యాంగ వేదికను వదులుకుని కేవలం ప్రజా క్షేత్రంపైనే ఆధారపడటం ఓ సాహసమే. ప్రభుత్వంపై వ్యతిరేకత పెరిగే వరకు వేచి చూసే ఈ "మౌన వ్యూహం" జగన్‌కు ఎంతవరకు ఫలిస్తుందో కాలమే నిర్ణయించాలి.