లోకేష్‌ రెడ్‌ బుక్‌లో సుగాలి ప్రీతి హంతకుల పేర్లు ఉన్నాయా

సెప్టెంబరులో జరిగే ఆంధ్రప్రదేశ్‌ అసెంబ్లీ సమావేశాల్లో సుగాలి ప్రీతి కేసు మీద చర్చించాలని ఆమె డిమాండ్‌ చేశారు. చర్చించి న్యాయం చేసే దిశగా చర్యలు తీసుకోవాలని కోరారు. కేంద్రం మీద ఒత్తిడి తెచ్చి సీబీఐకి సుగాలి ప్రీతి కేసును అప్పగించాలని కోరారు. లేదంటే ప్రత్యేక దర్యాప్తు బృందాన్ని అయినా ఏర్పాటు చేసి విచారణ చేపట్టాలని కోరారు. హంతకులను గుర్తించి వారిని శిక్షించాలని కోరారు. డ్రైవర్‌ హత్య చేసి డోర్‌డెలివరీ చేసిన ఎమ్మెల్సీ అనంతబాబు కేసులో ప్రత్యేక శ్రద్ద తీసుకొని, బాధితుల ఇంటికెళ్లి పరామర్శించిన హోం మంత్రి అనితకు అతికిరాతంగా అత్యాచారానికి గురై చంపబడిన తన కుమార్తె కేసు ఎందుకు కనిపించడం లేదని ప్రశ్నించారు. సుగాలి ప్రీతి కేసులో తమకు న్యాయం చేయాలని అలా జరగని పక్షంలో గవర్నర్‌ను కలిసి తమకు జరిగిన అన్యాయాలను, అక్రమాల గురించి తమ గోడును తెలియజెప్పుకుంటామని పార్వతి వెల్లడించారు. దాని కంటే ముందు సుగాలి ప్రీతికి జరిగిన అన్యాయంపై రాష్ట్ర వ్యాప్తంగా డిజిటల్‌ క్యాంపెయిన్‌ కూడా చేపట్టనున్నట్లు తెలిపారు. తమకు న్యాయం జరక్కపోతే నిరాహార దీక్ష కూడా చేపడుతామన్నారు. ఎనిమిదేళ్లుగా ఓ దివ్యాంగురాలైన తాను తన కుమార్తె కేసులో న్యాయం కోసం పోరాటం చేస్తుంటే ఎందుకు ప్రభుత్వాలు పట్టించుకోవడం లేదని ఆమె కన్నీటి పర్యంతమయ్యారు. చదువుకోవడానికి పాఠశాలకు పంపిన మైనర్‌ బాలిక సుగాలి ప్రీతిని అన్యాయంగా చంపేసిన నిందితుల మీద ప్రభుత్వానికి ఎందుకు అంత ప్రేమ అని ఆమె ప్రశ్నించారు. ఈ కేసులో న్యాయం జరిగేంత వరకు తన పోరాటం ఆగదన్నారు.