కటిక దరిద్రంలో ఏపీ ఎస్టీలు

గత ప్రభుత్వ విధానాలే కారణమా?

పేదలను ఆదుకునేందుకు, వారికి ఆదాయ వనరులు కల్పించి ముందుకు అడుగులు వేయించేందుకు ప్రభుత్వాలు కృషి చేయాలి. కానీ ఉచితంగా నాలుగు మెతుకులు విదిల్చి ఈ రోజు తిను, రేపటి గురించి రేపు ఆలోచిద్దాం.. అనే విధానంతో పాలన సాగించినంత కాలం ముందడుగు వేసే అవకాశం ఉండదు. గత వైఎస్సార్సీపీ ప్రభుత్వం సామాజిక బాధ్యతలను మరిచిపోయింది. సామాజిక న్యాయ సేవా పథకాల గురించి ఆలోన చేయలేదు. పైగా సోషల్ జస్టిస్ కోసం కేటాయించిన నిధులు కూడా దారిమళ్లించింది. ఇది ప్రధాన మైన కారణంగా మేధావులు చెబుతున్నారు. ఆంధ్రప్రదేశ్ లో ఎక్కువ మంది గిరిజనులు విశాఖ, రంపచోడవరం ఏజెన్సీ లోనూ, నల్లమల అడవులు, సముద్ర తీర ప్రాంతాల్లోనూ ఉన్నారు. ఒక విధంగా వీరు సమాజానికి దూరంగా బతుకుతున్నారని చెప్పొచ్చు. తమ బాధలేవో తామే భరించుకుంటూ ఎవరి కంటా పడకుండా బతుకు సాగిస్తున్నారు. గిరిజన వర్గాన్ని ప్రభుత్వాలు పూర్తిగా మరిచిపోయాయి. అందుకే ఈ విధమైన పరిస్థితులు ఏర్పడ్డాయి.

జాతీయ గణాంక శాఖ సర్వే ఏమి చెప్పింది?

2023-2024 ఆర్థిక సంవత్సరంలో ఆగస్టు నుంచి జూలై మధ్య నిర్వహించిన సర్వేలో కఠోరమైన విషయాలు వెల్లడయ్యాయి. ప్రభుత్వాలు అందించే ఉచితాలు, సంక్షేమ పథకాలు పక్కన బెడితే ప్రజలు తమ సొంత ఆదాయ వనరులతో జాతీయ స్థాయిలో సగటున గ్రామీణ, పట్టణ ప్రాంతాల్లో ఎంత ఖర్చు చేస్తున్నారనే అంశంపై సర్వే జరిగింది. గ్రామీణ ప్రాంతాల్లో రూ. 4,122లు, పట్టణ ప్రాంతాల్లో రూ. 6,996 నెలసరి తలసరి ఖర్చు జరుగుతున్నట్లు తేలింది. ఇందులో ఆంధ్రప్రదేశ్ కు సంబంధించి ఎస్టీల పరిస్థితి ఘోరంగా ఉంది. జాతీయ స్థాయిలో గ్రామీణ ప్రాంతాల్లో ఎస్టీలు, పట్టణ ప్రాంతాల్లో ఎస్సీలు అందరి కంటే తక్కువ వ్యయం చేస్తున్నారు. ఏపీలో మాత్రం పట్టణ, గ్రామీణ ప్రాంతాలు రెండింటిలోనూ ఎస్టీలే తక్కువ ఖర్చు చేస్తున్నారు. గ్రామాల్లో ఇతరులు చేసే నెలవారీ తలసరి వ్యయంతో పోలిస్తే ఓబీసీలది 5.79, ఎస్సీలది 9.97, ఎస్టీలది 27.17 శాతం మేర తక్కువగా ఉంది. పట్టణ ప్రాంతాల్లో అయితే ఓబీసీలు 5.84శాతం, ఎస్సీలు 11.36 శాతం, ఎస్టీలు 17.22 శాతం తక్కువ ఖర్చు చేస్తున్నారు. అంటే ఎస్టీలకు ఆదాయ వనరులు చాలా తక్కువ ఉన్నాయి.

రిటైర్డ్ ఐఏఎస్ అధికారి ఏమన్నారంటే..

గత ప్రభుత్వం కార్పొరేషన్ లకు పైసా డబ్బులు ఇవ్వలేదు. నవరత్నాల పేరుతో షోషల్ జస్టిస్ లేకుండా పోయింది. పేదలు బాగు పడాలంటే రెగ్యులర్ ఇన్వెస్టిమెంట్ ఉండాలి. అది లేనప్పుడు వారు ముందుకు అడుగులు వేయలేరని రిటైర్డ్ ఐఏఎస్ అధికారి ఈఏఎస్ శర్మ అభిప్రాయ పడ్డారు. ఏ కులాల వారైతే వెనుబడి ఉన్నారో వారికి కావాల్సిన అసెట్స్ పై ఎప్పటికప్పుడు మెయింటెనెన్స్ ఉండాలి. అలాగే కొత్తగా అసెట్స్ క్రియేట్ చేయాలి. వాటి ద్వారా ఆదాయాన్ని పెంచుకునేందుకు ఆర్థికంగా వెనుక బడిన కులాల వారికి దోహద పడాలి. గత ప్రభుత్వంలో అలాంటివేమీ జరగలేదు. ఇండియా అంటేనే వెల్ఫేర్ స్టేట్. రాజ్యాంగం అదే చెప్పింది. ఆ ప్రాథమిక సూత్రాలను మరిచి పాలకులు పాలన సాగిస్తున్నారు. ఈ పాలనలో పేద వాడు పేదవాడిగానే ఉంటాడన్నారు.

ప్రస్తుత ప్రభుత్వం కూడా అమరావతిపై విపరీతంగా ఫోకస్ పెట్టి ఖర్చు చేస్తోంది. అమరావతి కోసం ఉత్తరాంధ్ర, రాయలసీమలను నిర్లక్ష్యం చేస్తారు. అందువల్ల పేదలు పేదలుగానే ఉంటారన్నారు. అమరావతిలో పెద్ద భవంతులు వస్తాయి. రియల్ ఎస్టేట్ పెరుగుతుంది. కాంట్రాక్టర్లు బాగు పడతారు. పేదవారికి దీని వల్ల పైసా ఉపయోగం కూడా ఉండదు.

కేంద్ర ప్రభుత్వం కూడా పేదరిక నిర్మూలనా పథకాలపై పెద్దగా దృష్టి పెట్టడం లేదు. ఎంజీఎన్ఆర్ఈజీఎస్ పథకం కింద కేటాయించే నిధులు కూడా తగ్గించింది. ప్రైవేట్ పెట్టుబడి దారులకు ఇచ్చే ప్రాధాన్యత ఈ దేశంలో పేదవాడికి ఇవ్వడం లేదన్నారు. పేదలకు ఫుడ్ సెక్యూరిటీ లేకుండా పోయిందన్నారు. గుజరాత్ లో మైక్రాన్ కంపెనీ పెట్టేందుకు పెట్టుబడి దారు ముందుకు వస్తే ఆ కంపెనీకి అయ్యే ఖర్చులో రూ. 13 వేల కోట్లు సబ్సిడీ కింద కేంద్రం ఇస్తోందంటే పాలన ఎటువైపు వెళుతుందో అర్థం చేసుకోవచ్చన్నారు.

గిరిజనులకు ప్రాధాన్యత ఎప్పుడు?

ఆంధ్రప్రదేశ్ లో గిరిజనులను ఆర్థికంగా ఆదుకునేందుకు ఇప్పటి వరకు ఎటువంటి ప్రత్యేక ప్రాధాన్యతలు చేపట్టలేదు. ఎప్పుడో 30 ఏళ్ల క్రితం నాటి ప్రభుత్వాలు ఏర్పాటు చేసిన ఇంటిగ్రేటెడ్ ట్రైబల్ డెవలప్ మెంట్ ఏజెన్సీలు (ITDA) తప్ప వేరేవేమీ లేవు. ఐటీడీఏలకు గత ఐదేళ్ల కాలంలో పైసా డబ్బులు ఇవ్వలేదు. ప్రభుత్వం నుంచి గిరిజనులకు ఆదాయ వనరులు పెంచే పథకాలు చేపట్టలేదు. అందువల్లే వారి పరిస్థితి రోజురోజుకూ దిగజారి పోతోందని పలువురు గిరిజన నాయకులు, ఆర్థిక వేత్తలు వాపోతున్నారు. విశాఖపట్నం ఆంధ్ర యూనివర్శిటీ పబ్లిక్ అడ్మినిస్ట్రేషన్ అసిస్టెంట్ ఫ్రొఫెసర్ వీర్రాజు మాట్లాడుతూ పాలకుల తీరు మారనంత కాలం పరిస్థితులు ఇలాగే ఉంటాయన్నారు.