బంగాళాఖాతంలో బలపడిన మరో అల్పపీడనం
ఐఎండీ సూచనల ప్రకారం తూర్పుమధ్య బంగాళాఖాతం, దానికి ఆనుకుని ఉన్న ఉత్తర అండమాన్‌ సముద్రంలో ఏర్పడిన అల్పపీడనం బలపడింది.
ఐఎండీ సూచనల ప్రకారం తూర్పుమధ్య బంగాళాఖాతం, దానికి ఆనుకుని ఉన్న ఉత్తర అండమాన్‌ సముద్రంలో సోమవారం తెల్లవారుజామున ఏర్పడిన అల్పపీడనం బలపడిందని రెవెన్యూ శాఖ (ల్యాండ్స్, విపత్తుల నిర్వహణ, స్టాంప్స్‌అండ్ రిజిస్ట్రేషన్‌) స్పెషల్‌ సీఎస్‌ ఆర్పీ సిసోడియా తెలిపారు. ఇది అక్టోబర్‌ 22 నాటికి పశ్చిమ–వాయవ్య దిశగా కదులుతూ వాయుగుండంగా మారి, బుధవారం నాటికి తూర్పుమధ్య బంగాళాఖాతంలో తుపానుగా బలపడి ఆ తర్వాత వాయువ్య దిశగా పయనించి గురువారం ఉదయానికి ఒడిశా–పశ్చిమ బెంగాల్‌ తీరాలకు ఆనుకుని వాయవ్య బంగాళాఖాతంకి చేరుకునే అవకాశం ఉందని తెలిపారు. ఇది అక్టోబర్‌ 24వ తేదీ రాత్రి శుక్రవారం తెల్లవారుజాము నాటికి తీవ్రతుపానుగా మారి ఉత్తర ఒడిశా, పశ్చిమ బెంగాల్‌ తీరాల సమీపంలో పూరీ, సాగర్‌ ద్వీపం మధ్య తీరం దాటే అవకాశం ఉందని తెలిపారు. దీని ప్రభావంతో గురు,శుక్రవారాల్లో శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, విశాఖపట్నం, అనకాపల్లి జిల్లాల్లోని కొన్ని చోట్ల భారీ వర్షాలు కురిసే అవకాశం ఉందన్నారు. మిగిలిన చోట్ల విస్తారంగా తేలికపాటి నుంచి మోస్తారు వర్షాలు కురిసే అవకాశం ఉందని తెలిపారు. అక్టోబరు 25 వరకు మత్స్యకారులు సముద్రంలోకి వేటకు వెళ్లరాదని సూచించారు. ప్రజలు అప్రమత్తంగా ఉండి తగిన జాగ్రత్తలు తీసుకోవాలన్నారు.
