న్యూజిలాండ్ ను ఉతికి ఆరేసిన టీమ్ ఇండియా

న్యూజిలాండ్‌తో గౌహతీలో ఇవాళ రాత్రి జరిగిన నిర్ణయాత్మక టీ20 మ్యాచ్‌లో టీమ్ ఇండియా విశ్వరూపం ప్రదర్శించింది. కివీస్ నిర్దేశించిన లక్ష్యాన్ని భారత బ్యాటర్లు సునాయాసంగా ఛేదించి, ప్రత్యర్థి బౌలర్లను ఉతికి ఆరేశారు. 10 ఓవర్లు మిగిలి ఉండగానే ఇండియా తన టార్గెట్ 153 పరుగుల లక్ష్యాన్ని రెండు వికెట్లు మాత్రమే కోల్పోయి అద్భుత విజయాన్ని నమోదు చేసింది. ముఖ్యంగా యంగ్ సెన్సేషన్ అభిషేక్ శర్మ విధ్వంసకర బ్యాటింగ్, సూర్యకుమార్ యాదవ్ క్లాస్ ఇన్నింగ్స్‌తో భారత్ అద్భుత విజయాన్ని అందుకుంది.

టాస్ గెలిచి మొదట బ్యాటింగ్ చేసిన న్యూజిలాండ్ నిర్ణీత 20 ఓవర్లలో 9 వికెట్ల నష్టానికి 153 పరుగులు చేసింది. గ్లెన్ ఫిలిప్స్ (48), మార్క్ చాప్‌మన్ (32) రాణించినప్పటికీ, భారత బౌలర్ల ధాటికి కివీస్ భారీ స్కోరు చేయలేకపోయింది. జస్‌ప్రీత్ బుమ్రా తన పదునైన బౌలింగ్‌తో 3 వికెట్లు పడగొట్టగా, రవి బిష్ణోయ్, హార్దిక్ పాండ్య చెరో రెండు వికెట్లు తీసి ప్రత్యర్థిని దెబ్బతీశారు.

154 పరుగుల లక్ష్యంతో బరిలోకి దిగిన భారత్‌కు తొలి బంతికే షాక్ తగిలింది. ఓపెనర్ సంజు శాంసన్ డకౌట్‌గా వెనుదిరిగాడు. అయితే, ఆ ఒత్తిడిని ఏమాత్రం కనిపించనీయకుండా ఇషాన్ కిషన్ (28) విరుచుకుపడ్డాడు. మ్యాట్ హెన్రీ వేసిన తొలి ఓవర్లోనే వరుసగా 6, 6, 4 బాది ఇన్నింగ్స్‌కు ఊపు తెచ్చాడు.

అభిషేక్ శర్మ సునామీ.. 14 బంతుల్లోనే హాఫ్ సెంచరీ!

ఈ మ్యాచ్‌లో హైలైట్ అంటే అభిషేక్ శర్మ బ్యాటింగ్‌ అనే చెప్పాలి. కివీస్ బౌలర్లను ఫోర్లు, సిక్సర్లతో చెడుగుడు ఆడుకున్న అభిషేక్, కేవలం 14 బంతుల్లోనే అర్ధ శతకం పూర్తి చేసుకుని రికార్డు సృష్టించాడు. జాకబ్ డఫీ వేసిన 6వ ఓవర్‌లో అభిషేక్, సూర్య కలిసి ఏకంగా 22 పరుగులు రాబట్టారు. దీంతో పవర్ ప్లే ముగిసేసరికి భారత్ 94 పరుగుల భారీ స్కోరు సాధించింది.

అభిషేక్ శర్మ (67 నాటౌట్) ఒకవైపు సిక్సర్లతో విరుచుకుపడుతుంటే, మరోవైపు మిస్టర్ 360 సూర్యకుమార్ యాదవ్ (42 నాటౌట్) తనదైన శైలిలో స్కోరు బోర్డును పరిగెత్తించాడు. శాంట్నర్ వేసిన 9వ ఓవర్‌లో 17 పరుగులు రావడంతో భారత్ విజయం దాదాపు ఖాయమైంది.

9 ఓవర్ల ముగిసేసరికి భారత్ స్కోరు: 139/2

విజయానికి కావాల్సిన పరుగులు: 66 బంతుల్లో కేవలం 15 పరుగులు.

సరిగ్గా పది ఓవర్లు పూర్తయ్యే సరికి మ్యాచ్ విజయానికి కావాల్సిన 154 పరుగుల లక్ష్యానికి మించి మూడు పరుగులు అదనంగా వచ్చాయి.

భారత బ్యాటర్ల ధాటికి కివీస్ బౌలర్లు నిస్సహాయంగా ఉండిపోయారు. గ్రౌండ్ నలుమూలలా షాట్లు ఆడుతూ భారత్ మరో ఘన విజయాన్ని తన ఖాతాలో వేసుకుంది.