ఒక్క పరుగు తేడాతో ట్రిపుల్ సెంచరీ మిస్ అయిన ఘరామీ
ఒక్క పరుగుతో ట్రిపుల్ సెంచరీ మిస్, ఘరామీ కలకు గుంటూరు కుర్రాడి బ్రేక్
రంజీ క్వార్టర్స్ లో సంచలనాలు, బెంగాల్ కుర్రాణ్ణి ఓదార్చిన ఆంధ్ర రంజీ ప్లేయర్లు
సంచలనాలు, అద్భుతాలు క్రికెట్ లోనే సాధ్యమేమో.. కొన్ని వికెట్లు స్కోర్కార్డులో కనిపిస్తాయి. కొన్ని వికెట్లు మాత్రం కాలాన్ని ఆపేస్తాయి. పశ్చిమ బెంగాల్ లోని కల్యాణిలో జరుగుతున్న 2025–26 రంజీ ట్రోఫీ క్వార్టర్ ఫైనల్లో అటువంటి ఒక క్షణం ఇవాళ నమోదైంది. బెంగాల్ యువ బ్యాటర్ సుదిప్ కుమార్ ఘరామీ 299 పరుగుల వద్ద ఔటై, ట్రిపుల్ సెంచరీకి ఒక్క పరుగు దూరంలో నిలిచిపోయాడు. ఆ వికెట్ తీసిన బౌలర్- 21 ఏళ్ల ఆంధ్ర కుర్రాడు, గుంటూరు నుంచి వచ్చిన షేక్ రషీద్.
కష్టాల్లో బెంగాల్… క్రీజ్లో ఘరామీ
బెంగాల్ తొలి ఇన్నింగ్స్లో 43/3. మ్యాచ్ చేయి దాటిపోతున్న వేళ, వన్డౌన్లో బ్యాటింగ్కు దిగిన ఘరామీ, ఒక్కసారిగా బాధ్యతను భుజాలపై వేసుకున్నాడు. అది దూకుడైన ఇన్నింగ్స్ కాదు. పరుగుల వరద కాదు. అది సహనం, ఏకాగ్రత, దీక్షతో కూడిన మారథాన్.
596 బంతులు, 31 ఫోర్లు, 6 సిక్సర్లు. 12 గంటలకు పైగా క్రీజ్పై నిలిచి పోరాటం.
A knock worthy of a 𝐒𝐓𝐀𝐍𝐃𝐈𝐍𝐆 𝐎𝐕𝐀𝐓𝐈𝐎𝐍 👏
— BCCI Domestic (@BCCIdomestic) February 9, 2026
Sudip Gharami walks back after a marathon inning of 299 (596) to keep Bengal ahead in the #RanjiTrophy quarter final!@IDFCFIRSTBank pic.twitter.com/DK7hMTyqPI
ఆరో వికెట్కు సుమంత్ గుప్తాతో 165 పరుగులు, ఏడో వికెట్కు హబీబ్ గాంధీతో 221 పరుగుల భాగస్వామ్యం. ఈ ఇన్నింగ్స్తో బెంగాల్ కేవలం ఊపిరిపోసుకోవడమే కాదు ఆధిపత్యమూ చూపించింది.
298… 299… స్టేడియం ఊపిరి బిగపట్టింది. 298 దాటింది. తర్వాతి బంతికి సింగిల్. 299.
స్టేడియం మొత్తం లేచి నిలబడింది. డ్రెస్సింగ్ రూమ్లో ఉత్కంఠ. ప్రేక్షకుల హర్షధ్వానాలు.. ఇంకో పరుగు ఎప్పుడు?
అప్పుడే బంతి చేతిలోకి తీసుకున్నాడు షేక్ రషీద్. గుంటూరు కుర్రాడు.. 21 ఏళ్ల ఆంధ్ర బ్యాట్స్మెన్ ప్లస్ యువ బౌలర్.
తన ముందు నిలబడ్డవాడు.. ట్రిపుల్ సెంచరీ అంచున ఉన్న బ్యాటర్.
రషీద్ బంతి… ఆగిపోయిన చరిత్ర
రషీద్ బంతి విసిరాడు. ఘరామీ షాట్ ఆడాడు. బంతి గురితప్పింది. నేరుగా వికెట్స్ ను తాకింది. బేల్స్ ఎగిరిపోయాయి. ఆ క్షణంలో స్కోర్బోర్డు ఆగిపోయింది.
299 పరుగుల వద్ద ఘరామీ ఔట్... ఘరామీ తల వంచుకున్నాడు. హెల్మెట్ తీసి నేలవైపు చూశాడు. కళ్లలో నిరాశ. అతను పెవిలియన్ వైపు నడుస్తుంటే -ఆంధ్ర ఆటగాళ్లు దగ్గరకు వచ్చి ఓదార్చారు.
ప్రేక్షకులు లేచి నిలబడి స్టాండింగ్ ఓవేషన్ ఇచ్చారు.
ఒక్క పరుగు తేడాతో చరిత్ర మిస్ అయింది. కానీ ఆ ఇన్నింగ్స్ ఓడిపోలేదు.
ఘరామీ కథ… రషీద్ క్షణం
రంజీ ట్రోఫీ చరిత్రలో 299 వద్ద ఔటైన తొలి బ్యాటర్. భారత ఫస్ట్ క్లాస్ క్రికెట్లో ఇదే మొదటిసారి.
ప్రపంచ ఫస్ట్ క్లాస్ క్రికెట్లో మూడోసారి మాత్రమే జరిగిన ఘట్టం. మార్టిన్ క్రో, మైకేల్ పావెల్, ఇప్పుడు- సుదిప్ కుమార్ ఘరామీ.
ఈ జాబితాలో పేరు నిలబెట్టింది ఘరామీ.
ఆ చరిత్రకు ముగింపు పెట్టిన బంతి వేసింది — గుంటూరు కుర్రాడు రషీద్.
మ్యాచ్ సంగతి పక్కన పెడితే…
ఘరామీ ఇన్నింగ్స్తో బెంగాల్ తొలి ఇన్నింగ్స్లో 629 పరుగులు.
ఆంధ్ర తొలి ఇన్నింగ్స్లో 295 మాత్రమే.
చివరి రోజు డ్రా దిశగా మ్యాచ్.
తొలి ఇన్నింగ్స్ ఆధిక్యంతో బెంగాల్ సెమీస్కు చేరే పరిస్థితి.
కానీ ఈ మ్యాచ్ను గుర్తుంచుకునే కారణం అది కాదు. ట్రిపుల్ సెంచరీ రాలేదు. రికార్డు పుస్తకంలో 300 పరుగుల ఆటగాని పేరు ఎక్కలేదు.
కానీ ఒక రోజు, ఒక మ్యాచ్లో - ఒక యువ బ్యాటర్ తన జట్టును ఒంటిచేత్తో నిలబెట్టాడు. ఒక యువ బౌలర్, చరిత్ర అంచున ఉన్న క్షణాన్ని ఆపేశాడు. ఘరామీకి ఇది జీవిత ఇన్నింగ్స్. రషీద్కు ఇది జీవితంలో మరిచిపోలేని బంతి.
క్రికెట్ ఇలానే ఉంటుంది. కొన్నిసార్లు ఒక పరుగు తేడాతో కలలు చెదిరిపోతాయి. కొన్నిసార్లు అదే పరుగు… ఇద్దరి జీవితాల్లో శాశ్వతంగా మిగిలిపోతుంది.
Next Story