టీ20లో ఆసక్తికర మ్యాచ్, నమీబియా వైపే భారత్ అభిమానుల మొగ్గు

టీ20 టోర్నమెంట్‌లో బుధవారం జరగనున్న పాకిస్థాన్–నమీబియా మ్యాచ్‌పై భారత్ అభిమానుల దృష్టి కేంద్రీకృతమైంది. మధ్యాహ్నం 3 గంటలకు కొలంబోలో ప్రారంభమయ్యే ఈ మ్యాచ్ ఫలితం గ్రూప్-ఏ సమీకరణాలను ప్రభావితం చేసే అవకాశముంది. అందుకే నమీబియా గెలవాలని భారత్ అభిమానులు కోరుకుంటున్నారు.

టోర్నమెంట్‌లో పాకిస్థాన్ ఇప్పటివరకు మూడు మ్యాచ్‌లు ఆడింది. అందులో రెండు గెలిచింది, ఒకటి ఓడింది. ప్రస్తుతం ఆ జట్టు 4 పాయింట్లతో -0.403 నెట్ రన్ రేట్‌తో ఉంది. టోర్నీలో ముందుకు సాగాలంటే ఈ మ్యాచ్‌లో గెలుపు అవసరం. వర్షం కారణంగా మ్యాచ్ రద్దయినా పాకిస్థాన్‌కు లాభమే కాని గెలిస్తేనే బలమైన స్థానం దక్కుతుంది.

ఇక నమీబియా మూడు మ్యాచ్‌ల్లోనూ ఓటమి చవిచూసి, -2.443 నెట్ రన్ రేట్‌తో చివరి స్థానంలో ఉంది. ఈ జట్టు ఇప్పటికే టోర్నీ నుంచి దాదాపు నిష్క్రమించినట్టే. ఈ మ్యాచ్ గెలిచినా, ఓడినా నమీబియాకు పెద్ద మార్పు ఉండదు.

పాయింట్ల పట్టికలో లెక్కలు

ప్రస్తుతం ఇండియా 6 పాయింట్లు, +3.05 నెట్ రన్ రేట్‌తో అగ్రస్థానంలో ఉంది. అమెరికా 4 పాయింట్లు, +0.787 నెట్ రన్ రేట్‌తో రెండో స్థానంలో ఉంది. పాకిస్థాన్ 4 పాయింట్లతో మూడో స్థానంలో ఉంది.

నమీబియాపై పాక్ గెలిస్తే 6 పాయింట్లతో రెండో స్థానంలోకి చేరుతుంది. వర్షం కారణంగా మ్యాచ్ రద్దయితే రెండు జట్లకు చెరో పాయింట్ లభిస్తుంది. అప్పుడు పాక్ 5 పాయింట్లతో అమెరికాను దాటుతుంది. ఈ పరిస్థితిలో ఇండియా మొదటి స్థానంలో, పాక్ రెండో స్థానంలో నిలుస్తాయి.

అయితే నమీబియా అనూహ్యంగా గెలిస్తే పాక్ టోర్నీ నుంచి నిష్క్రమించాల్సి వస్తుంది. ఇదే జరగాలని భారత్ అభిమానులు ఆశిస్తున్నారు. ఇండియాకు పాక్ మరోసారి ఎదురుపడకూడదన్న భావన అభిమానుల్లో స్పష్టంగా కనిపిస్తోంది. క్రికెట్ అనిశ్చితి ఆట కావడంతో ఏ జట్టు ఎలా ఆడుతుందో చెప్పడం కష్టం. అందుకే అభిమానుల్లో ఈ ఆందోళన.

వర్షం ప్రభావం?

ఈ మ్యాచ్‌పై వాతావరణం ప్రభావం చూపే అవకాశముంది. కొలంబోలో వర్ష సూచనలు ఉన్నట్లు వాతావరణ శాఖ తెలిపింది. మ్యాచ్ అంతరాయం లేకుండా జరగాలని భారత్ అభిమానులు కోరుకుంటున్నారు. ఎందుకంటే వర్షం పడితే పాక్‌కు లాభమయ్యే అవకాశముంది.

నమీబియా ‘ఫ్రీగా’ ఆడే అవకాశం

టోర్నీలో అవకాశాలు ముగిసిన జట్టు కావడంతో నమీబియా ఒత్తిడి లేకుండా ఆడే అవకాశం ఉంది. అలాంటి పరిస్థితుల్లో పెద్ద జట్లకు షాక్ ఇవ్వడం అసాధారణం కాదు. నమీబియా ధైర్యంగా ఆడితే మ్యాచ్‌లో అనూహ్య మలుపు తిప్పే అవకాశముంది.

పాక్ అభిమానుల కోణంలో

పాకిస్థాన్ అభిమానుల దృష్టిలో ఈ మ్యాచ్ కీలక మలుపు. గెలుపు ద్వారా రెండో స్థానంలోకి చేరాలని వారు ఆశిస్తున్నారు. నెట్ రన్ రేట్ మెరుగుపరుచుకోవడం కూడా వారి లక్ష్యం. వర్షం రాకుండా మ్యాచ్ పూర్తిగా సాగాలని కోరుకుంటున్నారు. శ్రీలంకలోని పాక్ అభిమానులు కొలంబోకు చేరుకుంటున్నట్లు సమాచారం. స్టేడియంలో తమ జట్టుకు మద్దతు ఇవ్వడానికి సిద్ధమవుతున్నారు. ఈ మ్యాచ్ ఫలితం గ్రూప్-ఏలో తుది సమీకరణాలను నిర్ణయించనుంది.

మరి వరుణుడు అనుకూలిస్తాడా? నమీబియా సంచలనం సృష్టిస్తుందా? లేక పాక్ ఆశించిన ఫలితం సాధిస్తుందా? కొలంబో సమరమే సమాధానం చెప్పబోతోంది.