వెస్టిండీస్ పై గెలిస్తేనే ఇండియా సెమీస్ కి,

టీ20 ప్రపంచకప్‌లో అసలు సిసలు మజా మొదలైంది. జింబాబ్వేపై 83 పరుగుల భారీ విజయం సాధించి టీమ్ ఇండియా ఊపిరి పీల్చుకున్న మాట వాస్తవమే కానీ, అసలు గండం ఇంకా ముందే ఉంది. మార్చి 1న జరిగే భారత్ - వెస్టిండీస్ మ్యాచ్ ఇప్పుడు ఒక అనధికార ఫైనల్‌గా మారింది. ఈ మ్యాచ్‌లో గెలిచిన జట్టు నేరుగా సెమీస్‌కు చేరుకుంటుంది, ఓడిన జట్టు కప్పు ఆశలను వదులుకుని ఇంటి దారి పట్టాల్సిందే.

సమీకరణం ఏంటి?

ప్రస్తుతం సూపర్‌-8 గ్రూపులో దక్షిణాఫ్రికా 4 పాయింట్లతో ఇప్పటికే సెమీస్ బెర్తును ఖరారు చేసుకుంది. ఇక మిగిలిన ఒకే ఒక్క స్థానం కోసం భారత్, వెస్టిండీస్ పోటీ పడుతున్నాయి. టీమ్ ఇండియా గెలిస్తే ఎటువంటి లెక్కలతో సంబంధం లేకుండా భారత్ 4 పాయింట్లతో సెమీస్‌కు వెళ్తుంది. ఓడితే వెస్టిండీస్ 4 పాయింట్లతో ముందుకు వెళ్తుంది, భారత్ టోర్నీ నుంచి నిష్క్రమిస్తుంది.

వర్షం పడితే పరిస్థితి ఏంటి?

ఒకవేళ మ్యాచ్ వర్షం కారణంగా రద్దయితే, ఇరు జట్లకు ఒక్కో పాయింట్ లభిస్తుంది. అప్పుడు భారత్, విండీస్ రెండూ 3 పాయింట్లతో సమానంగా ఉంటాయి. కానీ, ఇక్కడే టీమ్ ఇండియాకు అసలు చిక్కు వచ్చి పడింది. వెస్టిండీస్ నెట్ రన్ రేట్ (+1.791) భారత్ (-0.100) కంటే చాలా మెరుగ్గా ఉంది. కాబట్టి వర్షం పడితే భారత్ టోర్నీ నుండి అవుట్ అయినట్టే!

జింబాబ్వేపై ‘భారీ’ విజయం.. అర్ష్‌దీప్ సింగ్ 'డబుల్ ధమాకా'

చెన్నై వేదికగా జరిగిన మ్యాచ్‌లో భారత్ 256 పరుగుల భారీ స్కోరు సాధించినప్పటికీ, జింబాబ్వే బ్యాటర్ బ్రియాన్ బెనెట్ (85) భారత బౌలర్లను ఒక ఆట ఆడుకున్నాడు. అయితే, అర్ష్‌దీప్ సింగ్ తన అద్భుత స్పెల్‌తో మ్యాచ్‌ను మలుపు తిప్పాడు. ముఖ్యంగా సికందర్ రజాను అవుట్ చేయడంతో పాటు, ఒకే ఓవర్‌లో రెండు వికెట్లు తీసి జింబాబ్వే నడ్డి విరిచాడు.

అర్ష్‌దీప్ వేసిన బంతికి బర్ల్ అవుట్ అయినప్పుడు అంపైర్ నాటౌట్ ఇచ్చారు. రివ్యూ సమయం ముగియడానికి కేవలం 2 సెకన్ల ముందు కెప్టెన్ సూర్యకుమార్ యాదవ్ తీసుకున్న డీఆర్ఎస్ (DRS) నిర్ణయం అద్భుతమని చెప్పాలి. అది అవుట్ అని తేలడంతో జింబాబ్వే పతనం ఖాయమైంది. అక్షర్ పటేల్ పొదుపుగా బౌలింగ్ చేయగా, తిలక్ వర్మ పట్టిన సూపర్ క్యాచ్ మ్యాచ్‌కే హైలెట్‌గా నిలిచింది.

టెన్షన్ పెట్టిన దూబే.. 10 బంతుల ఓవర్!

భారత్ విజయం ఖాయమనుకున్న తరుణంలో శివం దూబే వేసిన ఒక ఓవర్ అభిమానుల గుండెల్లో రైళ్లు పరిగెత్తించింది. లైన్ అండ్ లెంగ్త్ తప్పిన దూబే, ఏకంగా ఒక నోబాల్, మూడు వైడ్లు వేసి ఆ ఓవర్‌ను 10 బంతుల వరకు లాగాడు. బ్రియాన్ బెనెట్ ఆ ఓవర్‌లో రెండు ఫోర్లు, రెండు సిక్సర్లతో చెలరేగిపోవడంతో ఏకంగా 26 పరుగులు సమర్పించుకోవాల్సి వచ్చింది. ఈ ఫామ్ వెస్టిండీస్ వంటి భారీ హిట్టర్లు ఉన్న జట్టుతో మ్యాచ్ ముందు ఆందోళన కలిగించే విషయమే.