‘నెరేటివ్ టెర్రరిజంతో కశ్మీర్ బలహీనపడదు’

భారత సార్వభౌమాధికారంపై ఎలాంటి బాహ్య జోక్యాన్ని లేదా హిడెన్ అజెండాను దేశం ఎప్పటికీ సహించదని ప్రభుత్వ వర్గాలు స్పష్టం చేస్తున్నాయి. మీడియా(Media)ను గౌరవిస్తున్నప్పటికీ, దేశ సమగ్రతకు భంగం కలిగించే చర్యలకు మాత్రం సహించేది లేదని పేర్కొంటున్నాయి.

కశ్మీర్(Jammu and Kashmir) కేవలం భౌగోళిక ప్రాంతం మాత్రమే కాదు. భారతదేశ చరిత్ర, సంస్కృతి, నాగరికతకు ప్రతీకగా నిలిచిన ప్రాంతమని విశ్లేషకులు చెబుతున్నారు. అయితే విభజన అనంతరం దశాబ్దాల పాటు ఆ ప్రాంతం ఉగ్రవాదం, హింస, అస్థిరతను ఎదుర్కొంది.

కేంద్ర(BJP) ప్రభుత్వ నిర్ణయాల తరువాత పరిస్థితుల్లో మార్పు కనిపిస్తోందని అధికార వర్గాలు చెబుతున్నాయి. ఆర్టికల్ 370 రద్దు తర్వాత అభివృద్ధి వేగం పుంజుకుందని, భయాందోళనలు తగ్గి సాధారణ జీవన పరిస్థితులు వచ్చాయని అంటున్నారు.

ఒకప్పుడు తరచూ షట్‌డౌన్‌లు, నిరసనలు, హింసాత్మక ఘటనలు చోటుచేసుకునేవి. ప్రస్తుతం ఆ పరిస్థితి మారిందని అధికార గణాంకాలు చెబుతున్నాయి. ఉగ్రవాద దాడులు తగ్గాయని, భద్రతా సిబ్బందిపై దాడులు కూడా పూర్తిగా తగ్గాయని చెబుతున్నారు. పాఠశాలలు, వ్యాపార కార్యకలాపాలు సాధారణంగా కొనసాగుతున్నాయని, పర్యాటక రంగం మళ్లీ వృద్ధి చెందుతోందని అధికారులు పేర్కొంటున్నారు.

ఇదే సమయంలో, కొందరు వ్యక్తులు కథనాల ద్వారా పరిస్థితులను వక్రీకరించి అస్థిరత సృష్టించేందుకు ప్రయత్నిస్తున్నారని ప్రభుత్వం ఆరోపిస్తోంది. జర్నలిజం ముసుగులో యువతను తప్పుదారి పట్టించే ప్రయత్నాలు జరుగుతున్నాయని, దీన్ని “కథన ఉగ్రవాదం”గా అభివర్ణిస్తున్నారు.

భారత పోలీసులు చట్టబద్ధ పరిధుల్లోనే చర్యలు తీసుకుంటున్నారని, ప్రజా శాంతి భద్రతకు భంగం కలగకుండా జాగ్రత్తలు తీసుకుంటున్నారని అధికార వర్గాలు చెబుతున్నాయి.

ప్రభుత్వం ప్రకారం, పత్రికా స్వేచ్ఛను గౌరవించినప్పటికీ దేశ భద్రత, ఐక్యత, సమగ్రతకు విఘాతం కలిగించే చర్యలను అనుమతించబోమని స్పష్టం చేసింది. కశ్మీర్ భారతదేశానికి కిరీటం లాంటిదని, అది ఎప్పటికీ శాంతి, అభివృద్ధి, భారతీయతకు ప్రతీకగా నిలుస్తుందని అధికార వర్గాలు పేర్కొంటున్నాయి.