‘అసెంబ్లీలో రాయలసీమపై ప్రత్యేక చర్చకు జగన్ వత్తిడి తేవాలి’

రాయలసీమ ప్రాంతంలో ఏక్కడో 10 ఎకరాలు పచ్చగా ఉన్న ప్రాంతాన్ని ఫోటోలో బంధించి రాయలసీమ అంతా పచ్చగా ఉంది అని గ్లోరిఫై చేయడానికి మీడియా ప్రయత్నం చేస్తున్నది. కానీ ఎడారి కాబోతున్న రాయలసీమ ప్రాంతానికి పొంచి ఉన్న గండం గురించి ఈ పేపర్లు ఏ రోజు రాయడం లేదు. కర్ణాటక ప్రాంతంలో ఎన్డీఏ ప్రభుత్వం అప్పర్ భద్రను జాతీయ ప్రాజెక్టుగా గుర్తించడంతో రాయలసీమ ప్రాంతానికి రాబోయే కాలంలో మరణ శాసనాన్ని లిఖించింది. విధించింది,

ఇప్పటివరకు, 2014 విభజన తర్వాత అధికారంలోకి వచ్చిన చంద్రబాబు నాయుడు కావచ్చు, ఆతర్వాత వచ్చిన జగన్మోహన్ రెడ్డి, కావచ్చు కర్ణాటక, తెలంగాణ అక్రమ ప్రాజెక్టుల గురించి కేంద్రం దగ్గర ఆంధ్రప్రదేశ్ వాదనలు గట్టిగా వినిపించలేకపోయారు. ఫలితంగా తప్పుడు నివేదికలను చూపించి అప్పర్ భద్రకు కర్ణాటక ప్రభుత్వం జాతీయ హోదాను సాధించింది.

మరి ఆంధ్రప్రదేశ్ కు సంబంధించి తుంగభద్ర డ్యామ్ లో దాదాపుగా 33 టీఎంసీలు పూడికచేరితే దామాసా పద్ధతిన నష్టపోతున్నటువంటి మన నీటిని సాధించడానికి తుంగభద్ర సమాంతర కాలువను కూడా జాతీయ ప్రాజెక్టుగాచేయవచ్చుగా. అలా చేయాలని కేంద్రం దగ్గర చంద్రబాబునాయుడు గాని, జగన్ మోహన్ రెడ్డి గాని ఇంతవరకు గట్టిగా మాట్లాడలేదు. దీనితో రాయలసీమ ప్రాంతం త్వరలో ఎడారి కాబోతోంది అన్నది రాయలసీమ ఉద్యమకారుల మనోవేదన.

ఈరోజు కోస్తా ప్రాంతంలో పోలవరాన్ని జాతీయ ప్రాజెక్టు చేసింది నాటి యపీఏ ప్రభుత్వం,కర్ణాటకలో అప్పర్ భద్రను జాతీయ ప్రాజెక్టుగా చేసింది నేటి ఎన్డీఏ ప్రభుత్వం. ఈ విషయం ఈ ప్రపంచానికే తెలుసు.

కానీ రాయలసీమ ప్రాంతం కరువు ప్రాంతం అని మన దేశాన్ని ఏలుతున్నటువంటి జాతీయ పార్టీల నాయకులకు మాత్రం తెలియదు. రాయలసీమ ప్రాంతానికి కూడా జాతీయ ప్రాజెక్టులను మంజూరు చేయాల్సిన అవసరం ఎంతైనా ఉందని విభజన తర్వాత అధికారంలోకి వచ్చిన తెలుగుదేశం పార్టీ కావచ్చు, 2019లో అధికారం చేపట్టిన వైయస్సార్ పార్టీ డిమాండ్ చేయలేదు. ఈ రెండు ప్రభుత్వాలు రాయలసీమ సంరక్షణ కోసం, రాయలసీమ ప్రాంతంలో ఉన్న రైతుల రక్షణ కోసం ఏ రోజు కూడా నివేదికలు పంపే ప్రయత్నం చేయలేదు. అలా చేసి ఉంటే ఈరోజు భారీ వరదలతో విజయవాడ అమరావతి ప్రాంతం జలమయం అయ్యేది కాదు. ఎందుకంటే గుడ్ ఇయర్ లో వచ్చే భారీ వర్షాలతో కర్ణాటక ప్రాంతం నుండి తుంగభద్ర కృష్ణ నదుల వరద జలాలను రాయలసీమ ప్రాంతానికి మరలించడానికి తుంగభద్ర సమాంతర కాలువ ఆలమట్టి నుండి బుక్కపట్నం వరకు పశ్చిమ ప్రాంతంలో ఉన్నటువంటి వేదవతి, పెన్నా, చిత్రావతి, పాపాఘ్ని నదుల వరకు వరద కాలవను జాతీయ ప్రాజెక్టుగా నిర్మించడం అవసరం. అదేవిధంగా సిద్దేశ్వరం దగ్గర కల్వకుర్తి నుండి తిరుపతికి నిర్మించ తలపెట్టిన నేషనల్ హైవే లో భాగంగా కృష్ణా నదిపై కేంద్రం "తీగల వంతెన" నిర్మాణం చేస్తోంది. అక్కడ తీగల వంతెన వద్దు ‘బ్రిడ్జ్ కం బ్యారేజీ’ నిర్మించి రాయలసీమ తెలంగాణ ప్రాంతాలకు నీళ్లు గ్రావిటీ ద్వారా గుడ్ ఇయర్లో (Good Year) మరలించగలిగితే అమరావతి విజయవాడ ప్రాంతాలకు ముంపు పరిస్థితులు లేకుండా ప్రమాదాన్ని నివారించవచ్చు. ఈ మేరకు ఎన్నో వేదికల ద్వారా ఢిల్లీ వరకు కూడా రాయలసీమ ఉద్యమకారులు తమ గళాన్ని వినిపించడం జరిగింది.

కానీ తెలుగు రాష్ట్రాల్లో ముఖ్యమంత్రులుగా ఉండిన కెసిఆర్ గానీ ,జగన్మోహన్ రెడ్డి గాని ,ప్రస్తుతం ముఖ్యమంత్రులు చంద్రబాబు నాయుడు గాని, రేవంత్ రెడ్డి గానీ ‘బ్రిడ్జ్ కం బ్యారేజీ’ నిర్మించి మధ్య కోస్తా ప్రాంతంలో వరద ముంపుకు గురి అవుతున్న విజయవాడ అమరావతి ప్రాంతాలను రక్షించాలని ప్రధాని మోదీని ఏ రోజు కోరడం లేదు.

2014 నుండి 2019 వరకు ఉన్నటు తెలుగుదేశం ప్రభుత్వం అమరావతి రాజధాని ప్రకటన తర్వాత కృష్ణా నది ఒడ్డున ప్రకాశం బ్యారేజ్ దగ్గర నిర్మించిన కరకట్ట ఎక్కడ తెగిపోతుందో అనే నెపంతో మళ్ళీ దానిపై భారీగా ఎత్తు పెంచుతూ విశాలమైన వెడల్పుతో వేల కోట్ల ప్రజాధనాన్ని దుర్వినియోగం చేస్తూ కరకట్టలను నిర్మించాలనుకుంటున్నది.

ఇంకా నిర్మాణం కూడా చేపట్టని ఆ అమరావతి రాజధాని సంరక్షణ కోసం అనాలోచిత నిర్ణయాలను బలవంతంగా ఏకపక్షంగా ఆంధ్రప్రదేశ్ రాష్ట్ర ప్రజలపై రుద్దుతూ ఉంది. పీకల్లోతు అప్పుల్లో ఉన్న ఆంధ్రప్రదేశ్ రాష్ట్రాన్ని కృష్ణానది ఒడ్డున సమాధి చేస్తున్నది. ఈ కరకట్టకు పెట్టే డబ్బులను కృష్ణ తుంగభద్ర నదులపై పై బాగాన ప్రాజెక్టుల నిర్మాణం చేపట్టి రెండు తెలుగు రాష్ట్రాలు సమన్వయంతో ముందుకు సాగాలి. వరద జలాలను ప్రకాశం బ్యారేజీ వద్ద సముద్రంలోకి వదిలే పరిస్థితి ఉత్పన్నమయ్యేటప్పుడు మాత్రమే రాయలసీమ తెలంగాణ ప్రాంతాలకు నిర్మించబోయే ప్రాజెక్టుల ద్వారా దామాషా పద్ధతులను అనుసరించి కరువు ప్రాంతాలకు నీళ్లు అందించే ఒక నిర్దిష్టమైన ప్రణాళికను అంటే తుంగభద్ర సమాంతర కాలువ ,బుక్కపట్నం- ఆల్మట్టి వరద కాలువ ,గుండ్రేవుల వేదవతి ప్రాజెక్టులు, సిద్దేశ్వరం దగ్గర బ్రిడ్జ్ కం బ్యారేజీ లను ముఖ్యమంత్రి చర్యలు తీసుకోవాలి. దీనికోసం వైఎస్ఆర్ కాంగ్రెస్ అధినేత, మాజీ ముఖ్యమంత్రి జగన్మోహన్ రెడ్డి కూడా సోమవారం అసెంబ్లీలో మాట్లాడాలి. ప్రభుత్వాన్ని ఒప్పించాలి.

అదేవిధంగా కృష్ణా నదికి ముఖద్వారం అయిన రాయలసీమ ప్రాంతంలో కాకుండా కృష్ణానది యాజమాన్య బోర్డును విజయవాడలో పెట్టాలన్న ఆలోచనను విరమించుకోవాలి. బోర్డును కర్నూల్ లో కానీ, శ్రీశైలంలో గాని ఏర్పాటు చేయాలని ఆ విధంగా ఆంధ్రప్రదేశ్ అసెంబ్లీలో తీర్మానం చేసి కేంద్రానికి పంపాలని రాయలసీమ ఉద్యమకారుల సూచన...

ఈరోజు శ్రీశైలం ప్రాజెక్టులో 102 టీఎంసీల పూడిక చేరడం వలన రాయలసీమ తెలంగాణ ప్రాంతాలకు దక్కాల్సిన నికరజలాలు కూడా కృష్ణార్పణం అవుతున్నాయి. రాయలసీమ ప్రాంతానికి ప్రాణాధారంగా ఉన్నటువంటి తుంగభద్ర ,శ్రీశైలం డ్యాములు పూడికతో నిండిపోతుంటే ప్రత్యామ్నాయ ప్రాజెక్టులను నిర్మించాల్సిన గురుతర బాధ్యత మూడుసార్లు విభజన చేసినటువంటి జాతీయ పార్టీలకు అందుకు సహకరించి విభజనకు లేఖలు రాసిన ఆంధ్రప్రదేశ్, తెలంగాణ ప్రాంతీయ పార్టీల మీద ఉంది.

ఈరోజు భారతదేశంలోనే అతి తక్కువ వర్షపాతం పడుతున్నటువంటి ప్రాంతంగా రాయలసీమ ప్రాంతం గుర్తించబడుతుంది అంటే అందుకు ప్రధాన కారణం రాజకీయ పాలకులు ,రాయలసీమ ప్రాంతంలో ఏ ప్రభుత్వం ఏర్పడిన చెట్లు నాటే కార్యక్రమాలకు శ్రీకారం చుడుతూ వేల కోట్ల రూపాయలు ప్రజాధనం దుర్వినియోగం అవుతా ఉంది.

ఎందుకు ఈ మాట చెబుతున్నామంటే ఎక్కడ కూడా తరతరాలుగా నాటినటువంటి చెట్లు రాయలసీమ ప్రాంతంలో బతికి బట్ట కట్టలేదు. అందుకు కారణం నీళ్లు లేకపోవడం. రాయలసీమ ప్రాంతం నుండి ప్రతి గుడ్ ఇయర్లో 500 టిఎంసిలు, ఎనిమిది వందల టీఎంసీలు వృదాగా సముద్రం పాలు అవుతూనే ఉంది. ఏటి(తుంగభద్ర, కృష్ణా నదుల)గట్టున ఉన్నటువంటి రాయలసీమ ప్రాంత రైతాంగం కర్ణాటకకు, కేరళకు ,దుబాయ్ కి మద్రాస్ కు, హైదరాబాదుకు వలసలు పోవాల్సినటువంటి దుస్థితి ఉంది. దీనికి తరతరాలుగా పాలకులు తీసుకున్న టువంటి అనాలోచిత నిర్ణయాలే ప్రధాన కారణాలుగా కనపడుతున్నాయి.

,కాబట్టి ఇప్పటికైనామాజీ ముఖ్యమంత్రి జగన్మోహన్ రెడ్డి అదేవిధంగా ముఖ్యమంత్రి చంద్రబాబు నాయుడు రాయలసీమ ప్రాంతం విషయంలో తమ పార్టీ విధానాలను మార్చుకొని ఈ ప్రాంతంలో ప్రాజెక్టులు నిర్మించాలి.

అదేవిధంగా అభివృద్ధి వికేంద్రీకరణ కోసం రాయలసీమ ప్రాంతంలో హైకోర్టును ఏర్పాటు చేసి,రాయలసీమ ప్రాంతం నుండి ఏ ఒక్క సంస్థను కూడా ఆ అమరావతికి తరలించకుండా చూడాలి.

రాయలసీమ ప్రాంతంలో ఉన్న నిరుద్యోగ యువత ఉద్యోగ కల్పన కోసం విభజన చట్టంలో ఉన్న కడప ఉక్కు పరిశ్రమ ను వెంటనే నిర్మించేలా కేంద్రం మీద వత్తిడి తీసుకువచ్చేందుకు అసెంబ్లీలో చర్చ జరగాలి.

అంతేకాదు విభజన చట్టంలో రాయలసీమ ,ఉత్తరాంధ్ర ప్రాంతాల కోసం బుందేల్ఖండ్ తరహా ప్రత్యేక ప్యాకేజీని మంజూరు చేస్తామన్న పార్లమెంటులోని విభజన చట్టం గురించి అసెంబ్లీలో చర్చించాలి రాయలసీమ ప్రాంతాన్ని ప్రత్యేకంగా అన్ని ప్రాంతాలతో సమాన అభివృద్ధి జరగడానికి రాజకీయ పార్టీలన్నీ కూడా కృషి చేయాలి.

(తిప్పిరెడ్డి నాగార్జున్ రెడ్డి, రాయలసీమ యునైటెడ్ ఫోర్స్, అధ్యక్షుడు)