‘పెను సవాళ్ల మధ్య బిఆర్ నాయుడు ప్రస్థానం ప్రారంభం’

తిరుపతి ప్రజలకు కూడా టిటిడితో విడదీయరాని బంధం శతాబ్దాలుగా కొనసాగుతోంది. కుల మతాల కతీతంగా కొన్ని సాంప్రదాయాలు ఏర్పడి ఉన్నాయి. ఇక్కడి విద్యాలయాల్లో చదువుకోవడం ఉద్యోగులుగా కార్మికులుగా పనిచేయడం, టిటిడి అనుబంధ పరిశ్రమలు, సంస్థలు, వ్యాపారాలలో ఉపాధి కలిగి ఉండటం ఇక్కడి అదనపు అంశాలు. టీటీడీ లేని తిరుపతిని ఊహించలేము.

కరోనా సమయంలో తిరుపతికి యాత్రికులు రాకపోవడంతో దీనిపై ఆధారపడిన ప్రజలు అల్లాడిన తీరు దీనికో ఉదాహరణ. తప్పులు చేస్తే ఎంతటి పెద్దవారినైనా ప్రశ్నించగలిగే భక్తి భావంతో కూడిన అధికారుల సంఖ్య కూడా టిటిడిలో ఎక్కువే. బయట జరిగే వివాదాలు, రాద్ధాంతాలతో ఇక్కడి ఉద్యోగులకు, తిరుపతి ప్రజలకు ఏమాత్రం సంబంధం ఉండదు.

వెంకన్న స్వామిని అడ్డం పెట్టుకొని దేశమంతటా లబ్ది పొందాలన్నా స్వార్థపూరిత ప్రయోజనాలు కలిగిన శక్తులు తిరుమల పై కన్నేసి ఉన్నాయి. బిఆర్ నాయుడు గారు అప్రమత్తంగా ఉండాల్సింది వీరి తోనే. తెలివైన వారు వివాదాల జోలికి వెళ్లకుండా టీటీడీలో ఉన్న ఉద్యోగులు, వెంకన్నను దర్శించే భక్తులు, తిరుపతి ప్రజల ఆదరాభిమానాలు పొందిన వారు తమ పాలనలో జయప్రదం అయ్యారు.

వివాదం ముంగిట్లోకి తలదూర్చిన పెద్దలు ఎంతటి వారైనా ఇబ్బందులు పడిన సందర్భాలు గతంలో అనేకం చూశాం. బి.ఆర్ నాయుడు గారు ఏ తరహా ను ఎంచుకుంటారో వేచి చూడాల్సిందే. టీటీడీ చరిత్రలో ఎన్నడూ లేని విధంగా బలమైన వ్యక్తులతో బోర్డు ఏర్పడింది.

సుప్రీంకోర్టు ప్రధాన న్యాయమూర్తిగాను, జాతీయ మానవ హక్కుల కమిషన్ ఛైర్మన్ గాను పని చేసిన జస్టిస్ హెచ్ ఎల్ దత్తు లాంటి అత్యున్నత స్థాయి వ్యక్తి కూడా టీటీడీ బోర్డులో ఓ సభ్యుడుగా ఉండటం గతంలో ఎన్నడూ లేదు.

కేంద్ర పెద్దలు తమ పెత్తనం సాగించు కోవడానికి ఇప్పటికే నిబంధనలు సైతం మార్చేసి తమ అనుయాయులను సభ్యులుగా చేర్చారు. గత వైసిపి ప్రభుత్వం లోను వీరు సభ్యులైన విషయాన్ని నాయుడు గారు విస్మరించరాదు. వైసీపీలో ఉండి తెలుగుదేశంలో చేరిన మరికొందరు కూడా ప్రస్తుతం సభ్యులు అయ్యారు.

గతంలో వివాదాలకు కేంద్రమైన వారు ప్రస్తుతం సభ్యులుగా ఉన్న విషయాన్ని బి ఆర్ నాయుడు విస్మరించడం లేదని భావించాలి. మీడియా సంస్థను నడిపినంత తేలికగా టీటీడీని నడపడం అంత సులువు కాదు. ఇప్పటివరకు మీడియా అధిపతిగా ఇతరులను విమర్శించడం ప్రశ్నించడం చూశాం. ఇప్పుడు తాను కూడా అతీతం కాదనే విషయాన్ని నాయుడు గారు గ్రహించి ఉంటారు.

ప్రతి అంశాన్ని భూతద్దంలో చూసే ధోరణి ఉన్న ఇక్కడ బిఆర్ నాయుడు లాంటి వివాద రహితమైన వ్యక్తి రాజకీయ అవసరాల రీత్యా పాలక పార్టీలతో ఎలా వ్యవహరిస్తారు? ఎదురయ్యే సవాళ్లను ఎలా ఎదుర్కొంటారు? అన్నది నేడు పలువురిలో ఆసక్తికరమైన అంశంగా మారింది.

సామాన్య భక్తులకు, సేవలందించడం, ఉద్యోగుల పట్ల సానుకూలంగా వ్యవహరించడం, కాంట్రాక్టు కార్మికుల కష్టాలు తీర్చడంలో బి ఆర్ నాయుడు గారు సానుకూల దృక్పథంతో వ్యవహరిస్తారని ఆశిస్తున్నాము.

తిరుమల కొండపై రాజకీయ దందా, దళారీల దందా, మీడియా దందా, పోలీసు దందా, జ్యుడీషరీ దందా, కార్పొరేట్ దందాలను అరికట్టడానికి, ఈ బోర్డు తగిన చర్యలు తీసుకుంటుందని మనమంతా ఆశిద్దాం... బిఆర్ నాయుడు గారు టీటీడీ ఛైర్మన్ గా జయప్రదం కావాలని ఆయనకు శుభాకాంక్షలు తెలియ జేద్దాం.

(కందారపు మురళి సిఐటియు జిల్లా ప్రధాన కార్యదర్శి తిరుపతి)