జొమాటో, స్విగ్గీ ప్రియులకు షాక్: పెరగనున్న డెలివరీ ఛార్జీలు!

ఆన్‌లైన్‌లో నచ్చిన ఫుడ్ ఆర్డర్ ఇచ్చి హాయిగా ఇంట్లో కూర్చుని తినే రోజులకు కాలం చెల్లనుందా? అంటే 'అవుననే' సమాధానం వినిపిస్తోంది. ఇరాన్-అమెరికా యుద్ధం సృష్టించిన సంక్షోభం ఇప్పుడు సుఖజీవుల కంచంపై పడనుంది. ఇప్పటికే దేశంలో వంట గ్యాస్ ధరలు గుట్టుచప్పుడు కాకుండా పెరిగిపోగా, ఇప్పుడు ఆ సెగ జొమాటో (Zomato), స్విగ్గీ (Swiggy) వంటి ఫుడ్ డెలివరీ ప్లాట్‌ఫారమ్‌లకు బలంగా తాకనుంది.

ఇరాన్-అమెరికా మధ్య జరుగుతున్న యుద్ధం వల్ల ప్రపంచ ఇంధన సరఫరా వ్యవస్థ కుప్పకూలే స్థితికి చేరింది. ముఖ్యంగా ప్రపంచ చమురు రవాణాకు కీలకమైన 'హార్మూజ్ జలసంధి' (Strait of Hormuz) మూతపడటంతో భారత్ వంటి దేశాలపై ప్రభావం తీవ్రంగా ఉంది.

హోటళ్లలో వాడే కమర్షియల్ సిలిండర్ ధర మార్చి 2026లో ఏకంగా రూ. 115 పెరిగింది. ఫలితంగా హోటల్ యజమానులు తమ మెనూ ధరలను పెంచక తప్పని పరిస్థితి ఏర్పడింది. "గతంలో వంద రూపాయలకు ఇచ్చే బిర్యానీ లేదా టిఫిన్ ఇకపై రూ. 125 చేస్తే తప్ప మాకు గిట్టుబాటు కాదు" అని ఓ హోటల్ యజమాని రహమాన్ ఆవేదన వ్యక్తం చేస్తున్నారు.

యుద్ధం కారణంగా అంతర్జాతీయంగా క్రూడ్ ఆయిల్ ధరలు పెరగడంతో, దేశంలో పెట్రోల్, డీజిల్ ధరలు కూడా పెరిగే సూచనలు కనిపిస్తున్నాయి. డెలివరీ బాయ్స్ వాడే బైక్‌లకు పెట్రోల్ ఖర్చు పెరిగితే, కంపెనీలు 'డెలివరీ ఛార్జీలు' లేదా 'సర్జ్ ప్రైసింగ్' పేరుతో కస్టమర్ల నుంచి అదనపు మొత్తాన్ని వసూలు చేసే అవకాశం ఉంది.

షిప్పింగ్ కష్టాలు- సరుకుల కొరత..

యుద్ధం కారణంగా సముద్ర మార్గాల్లో రవాణా స్తంభించిపోయింది. నౌకలు 'కేప్ ఆఫ్ గుడ్ హోప్' మీదుగా చుట్టూ తిరిగి రావాల్సి రావడంతో రవాణా సమయం 10-14 రోజులు పెరుగుతోంది. దీనివల్ల వంట నూనెలు, పప్పు ధాన్యాలు, ఇతర దిగుమతి చేసుకునే ఆహార పదార్థాల ధరలు కూడా పెరుగుతున్నాయి. ఇది పరోక్షంగా హోటల్ తిండిని మరింత ప్రియం చేస్తోంది.

చమురు సంస్థలు ఇప్పటికే గ్యాస్ బుకింగ్‌లపై ఆంక్షలు విధించాయి. సింగిల్ సిలిండర్ ఉన్నవారు 21 రోజుల లోపు మళ్ళీ బుక్ చేయకూడదనే నిబంధన హోటళ్లు, క్లౌడ్ కిచెన్లను ఇబ్బందుల్లోకి నెట్టింది. గ్యాస్ కొరత ఏర్పడితే హోటళ్లు మూతపడే పరిస్థితి రావచ్చు లేదా పరిమితమైన మెనూతో అధిక ధరలకు విక్రయించాల్సి రావచ్చు.

యుద్ధం ఎంత కాలం కొనసాగుతుందనే దానిపై అనిశ్చితి నెలకొన్న వేళ, ఆహార పంపిణీ సంస్థలు తీవ్ర ఇక్కట్లలో పడనున్నాయి. ఫుడ్ యాప్స్‌లో ఆర్డర్ చేయడం అనేది మధ్యతరగతి ప్రజలకు ఇకపై ఒక విలాసంగా మారే ప్రమాదం కనిపిస్తోంది. కాబట్టి, ఆర్డర్ పెట్టే ముందు ఒకసారి పెరిగిన 'మెనూ' రేట్లను చూసుకోవడం మంచిదని విశ్లేషకులు సూచిస్తున్నారు.