క్వాలిటీ చెక్ లేకుండా కోట్లు చెల్లిస్తారా?

బ్యూరోక్రాట్స్ పనితనానికి నిదర్శనం

అప్పటి ఎమర్జెన్సీ పరిస్థితుల్లో కాలువలు, బ్యారేజీలు ధ్వంసమవుతుండగా, అప్పటికప్పుడు మరమ్మతులు చేయాల్సి వచ్చిందని ప్రభుత్వం చెబుతోంది. క్వాలిటీ సర్టిఫికేట్లు తీసుకోవడానికి సమయం లేకపోవడంతో బిల్లులు పెండింగ్‌లో పడిపోయాయి. మూడు ప్రభుత్వాలు మారాయి. కాంగ్రెస్, టీడీపీ, వైఎస్ఆర్‌సీపీ ప్రభుత్వాలు రాష్ట్రాన్ని పాలించాయి. కానీ ఈ బిల్లులు మాత్రం ‘అత్యవసరం’గా మిగిలిపోయాయి. ఇప్పుడు కూటమి ప్రభుత్వం వచ్చాక రెండేళ్ల తరువాత ఆ పాత బకాయిలను మినహాయింపుతో క్లియర్ చేస్తున్నారు. అంటే 15 ఏళ్ల తర్వాత కూడా ఆ పనుల క్వాలిటీని చెక్ చేయాలనే ఆలోచన లేదా? ఆనవాళ్లు మిగల్లేదు, సాక్ష్యాలు మిగల్లేదు. కానీ బిల్లులు మాత్రం మిగిలాయి. ఇది ప్రభుత్వ 'దీర్ఘకాలిక ధైర్యం'కు నిదర్శనమా, లేక బ్యూరోక్రసీ యంత్రాంగం 'అమరత్వం'కు ఉదాహరణా?

గోదావరి నది నవ్వుకుంటోంది...

ఈ నిర్ణయం చూస్తుంటే గోదావరి నది కూడా నవ్వుకుంటుందేమో! అప్పటి మరమ్మతులు ఎంతకాలం నిలిచాయో ఎవరికీ తెలియదు. కానీ బిల్లులు మాత్రం 15 ఏళ్లు 'నిలిచి' ఉన్నాయి. ప్రభుత్వం ఇప్పుడు క్వాలిటీ చెక్ లేకుండా చెల్లించడం అంటే... 'అత్యవసరం' అనేది బిల్లులు క్లియర్ చేయడానికి కాదు, పాత ఫైళ్లు దుమ్ము దులిపేయడానికి అని అర్థమా? ఇలాంటి నిర్ణయాలు ఒకవైపు కాంట్రాక్టర్లకు ఊరటనిస్తాయి. మరోవైపు పన్ను చెల్లించే పౌరులకు ప్రశ్నలు తెస్తాయి. ఇంతకాలం ఎందుకు ఆలస్యం? క్వాలిటీ చెక్ లేకుండా చెల్లించడం సమంజసమా? ధవళేశ్వరం బ్యారేజ్ ఎన్ని వరదలు తట్టుకుందో లెక్క ఉంది. కానీ ఈ బిల్లుల లెక్కలు ఎందుకు ఇంత ఆలస్యమయ్యాయి?

మూడు ప్రభుత్వాలు మారాయి

ప్రభుత్వం ఈ నిర్ణయాన్ని 'పాత సమస్యల పరిష్కారం'గా చూపుతున్నప్పటికీ, విమర్శకులు మాత్రం ఇది 'పాత తప్పుల మరమ్మతు'గా చూస్తున్నారు. ఒకే ప్రభుత్వం కాలంలో కూడా బిల్లులు పెండింగ్‌లో పడిపోతుంటే, మూడు ప్రభుత్వాల మార్పుల్లో ఇలాంటివి ఎన్ని ఉన్నాయో? ఇది రాష్ట్ర ఆర్థిక శాఖకు సవాలు. క్వాలిటీ లేకుండా చెల్లించడం అంటే భవిష్యత్తులో మరిన్ని 'అత్యవసర' బిల్లులకు దారి తీస్తుందా? లేదా ఇది కేవలం 'పాత ఫైళ్లు క్లియర్' అనే సరికొత్త పాలసీయా? ప్రభుత్వం ఇప్పుడైనా ఇలాంటి పెండింగ్‌లను వేగంగా పరిష్కరించి, క్వాలిటీకి ప్రాధాన్యం ఇస్తే బాగుంటుంది. లేకపోతే మరో 15 ఏళ్లు 'అత్యవసరం' అని చెప్పుకుంటూ సాగిపోతాం!