అక్షర జైళ్లకు చెక్..ఆదివారం సెలవిస్తారా?

ర్యాంకుల వేటలో యంత్రాలుగా మారుతున్న విద్యార్థుల జీవితాల్లో ఇకపై ఆదివారం ఆటవిడుపు కానుంది. ప్రైవేట్ కోచింగ్ సెంటర్ల ఇష్టారాజ్యానికి అడ్డుకట్ట వేస్తూ ఆంధ్రప్రదేశ్ ఉన్నత విద్యాశాఖ సంచలన నిర్ణయం తీసుకుంది. గంటల తరబడి క్లాసులు, సెలవుల్లేని షెడ్యూళ్లతో పసిప్రాణాలపై పెరుగుతున్న మానసిక ఒత్తిడిని తగ్గించేందుకు ప్రభుత్వం సరికొత్త నిబంధనలను అమల్లోకి తెచ్చింది. ఆంధ్రప్రదేశ్ కోచింగ్ సంస్థల నిబంధనలు, 2026ను విడుదల చేసింది. ఇకపై చదువుల జైళ్లలో బందీలుగా ఉన్న విద్యార్థులకు స్వేచ్ఛా వాయువులు పీల్చుకునే అవకాశం కల్పిస్తూ, కార్పొరేట్ విద్యా సంస్థల నిరంకుశ పోకడలపై ప్రభుత్వం గట్టి కొరడా ఝుళిపించింది. ఆదివారం అంటే కేవలం క్యాలెండర్‌లో ఒక తేదీ మాత్రమే కాదు, అది విద్యార్థి ఆత్మవికాసానికి దొరికిన అపురూపమైన విరామమని ఈ కొత్త మార్గదర్శకాలు స్పష్టం చేస్తున్నాయి.