లొంగిపోయిన మావోయిస్టులెవరు? ఎస్పీ ఏమన్నారు?
దశాబ్దాలుగా అడవిని నమ్ముకుని, పార్టీ సిద్ధాంతాల కోసం పనిచేసిన వీరు, ఇప్పుడు ఆ మార్గాన్ని వీడి జనజీవన స్రవంతిలోకి అడుగుపెట్టారు.
తుపాకీ గొట్టం ద్వారానే రాజ్యధికారం అనే సిద్ధాంతం పట్ల క్రమంగా పట్టు సడలుతుండటంతో, అడవి బాట పట్టిన వారు ఒక్కొక్కరుగా జనజీవన స్రవంతిలోకి అడుగులు వేస్తున్నారు. తాజాగా, అల్లూరి జిల్లా కేంద్రంలో బుధవారం చోటుచేసుకున్న పరిణామం మావోయిస్టు కేడర్లో తీవ్ర ప్రకంపనలు సృష్టించింది. ఛత్తీస్గఢ్ అడవుల్లో కీలకంగా వ్యవహరించిన ఇద్దరు కీలక నేతలు అల్లూరి జిల్లా ఎస్పీ అమిత్ బర్దార్ సమక్షంలో స్వచ్ఛందంగా ఆయుధాలు వీడటం, అటవీ ప్రాంతాల్లో పార్టీ ప్రాబల్యం ఏ స్థాయిలో క్షీణిస్తుందో అద్దం పడుతోంది. ప్రభుత్వ పునరావాస పథకాలపై పెరిగిన నమ్మకం, మరోవైపు పోలీసుల ఆపరేషన్లతో కలుగుతున్న ప్రాణభయం వెరసి మావోయిస్టుల అగ్ర నాయకత్వానికి ఇది కోలుకోలేని దెబ్బగా మారింది. హింసా మార్గాన్ని వీడి అభివృద్ధి వైపు మళ్ళిన ఈ మెంటర్ల లొంగుబాటు ఇప్పుడు తెలుగు రాష్ట్రాల భద్రతా వర్గాల్లో హాట్ టాపిక్గా మారింది.
ఎవరీ మావోయిస్టులు? వారి నేపథ్యం ఏమిటి?
అల్లూరి జిల్లా ఎస్పీ ఎదుట లొంగిపోయిన వారిలో ఛత్తీస్గఢ్లోని మాడేరియా డివిజన్ కమిటీకి చెందిన ఇద్దరు అత్యంత కీలకమైన నేతలు ఉన్నారు. వీరిలో ఒకరు మహిళా మావోయిస్టు కావడం గమనార్హం. దశాబ్దాలుగా అడవిని నమ్ముకుని, పార్టీ సిద్ధాంతాల కోసం పనిచేసిన వీరు, ఇప్పుడు ఆ మార్గాన్ని వీడి జనజీవన స్రవంతిలోకి అడుగుపెట్టారు.
మొదటి వ్యక్తి కడితే హిడిం (అలియాస్ అంజు, అలియాస్ కరుణ). ఈమె మావోయిస్టు పార్టీలో అత్యంత కీలకమైన డివిజినల్ ఏరియా కమిటీ మెంటర్ (DCM) హోదాలో పనిచేశారు. పార్టీ వ్యూహరచనలోనూ, కేడర్ను ఉత్తేజితం చేయడంలోనూ ఈమెకు ప్రత్యేక గుర్తింపు ఉంది. ఛత్తీస్గఢ్, ఆంధ్ర సరిహద్దు ప్రాంతాల్లో జరిగిన పలు హింసాత్మక సంఘటనల్లో ఈమె ప్రధాన నిందితురాలిగా ఉన్నట్లు పోలీసులు రికార్డులు వెల్లడిస్తున్నాయి.
మరో కీలక నేత బడ్చే భీమా (అలియాస్ మనీష్). ఈయన ఏరియా కమిటీ మెంటర్ (ACM) గా క్షేత్రస్థాయిలో పార్టీ కార్యకలాపాలను పర్యవేక్షించేవారు. పార్టీ ఆదేశాలను అమలు చేయడం, కొత్త వారిని చేర్చుకోవడం, గెరిల్లా వ్యూహాల్లో ఈయన ఆరితేరిన వ్యక్తి. వీరిద్దరూ సుదీర్ఘ కాలం పాటు అజ్ఞాతంలో ఉంటూ, రక్షణ దళాలకు సవాలుగా నిలిచినట్లు ఎస్పీ వివరించారు. దాడులు, ఆస్తినష్టం కలిగించడం వంటి పలు తీవ్రమైన నేరాలలో వీరి ప్రమేయం ఉందని పోలీసు వర్గాలు స్పష్టం చేశాయి.
లొంగిపోవడానికి గల కారణాలు
దశాబ్దాల పాటు అడవిని నమ్ముకున్న వారు ఒక్కసారిగా జనజీవన స్రవంతిలోకి రావడానికి వెనుక బలమైన కారణాలు ఉన్నాయని లొంగిపోయిన మావోయిస్టులు స్పష్టం చేశారు. ముఖ్యంగా మావోయిస్టు ప్రభావిత ప్రాంతాల్లో పోలీసుల నిఘా అత్యంత పటిష్టం కావడం తమను ఉక్కిరిబిక్కిరి చేసిందని వారు అంగీకరించారు. అటవీ ప్రాంతాల్లో కొత్తగా పోలీసు శిబిరాల ఏర్పాటు, నిరంతర కూంబింగ్ ఆపరేషన్ల వల్ల తమ కదలికలు పూర్తిగా పరిమితం అయ్యాయని, అడుగడుగునా ప్రాణ భయం వెంటాడిందని వారు వివరించారు.
మరోవైపు, క్షేత్రస్థాయిలో పరిస్థితులు పూర్తిగా మారిపోయాయని వారు ఆవేదన వ్యక్తం చేశారు. ఒకప్పుడు తమకు వెన్నుదన్నుగా నిలిచిన ప్రజల నుంచి మద్దతు క్రమంగా తగ్గిపోవడం, పార్టీ సిద్ధాంతాల పట్ల ప్రజల్లో ఆసక్తి సడలడం తమను తీవ్రంగా ఆలోచింపజేసిందని తెలిపారు. సిద్ధాంతాల కోసం పోరాటం కంటే మనుగడ సాగించడమే కష్టంగా మారిన తరుణంలో, పార్టీ ఆశయాలపై నమ్మకం కోల్పోయామని వారు పేర్కొన్నారు.
అంతేకాకుండా, ఆంధ్ర, ఒడిశా, ఛత్తీస్గఢ్ సరిహద్దుల్లో జరిగిన వరుస ఎన్కౌంటర్లు మావోయిస్టు కేడర్ను కోలుకోలేని దెబ్బ తీశాయి. అనుభవజ్ఞులైన సీనియర్ నేతలు మరణించడంతో నాయకత్వ లోపం ఏర్పడిందని, దీనివల్ల కింది స్థాయి కేడర్లో నైరాశ్యం అలుముకుందని వారు వివరించారు. ఈ క్లిష్ట పరిస్థితుల్లో ప్రభుత్వం అందిస్తున్న ఆకర్షణీయమైన పునరావాస పథకాలు, ఆర్థిక సాయం, ఉపాధి అవకాశాలు తమలో కొత్త ఆశలు చిగురింపజేశాయని.. అందుకే హింసా మార్గాన్ని వీడి గౌరవప్రదమైన జీవితం గడపాలని నిర్ణయించుకున్నట్లు వారు వెల్లడించారు.
ఎస్పీ అమిత్ బర్దార్ విజ్ఞప్తి
లొంగిపోయిన వారికి స్వాగతం పలుకుతూ ఎస్పీ అమిత్ బర్దార్ కీలక వ్యాఖ్యలు చేశారు. ప్రభుత్వం కల్పించే సంక్షేమ, పునరావాస పథకాలను పూర్తిస్థాయిలో వినియోగించుకుని, గౌరవప్రదమైన శాంతియుత జీవితాన్ని గడపాలని వారికి సూచించారు. ప్రభుత్వం నిర్వహించే నైపుణ్యాభివృద్ధి శిక్షణ కార్యక్రమాల్లో పాల్గొని కొత్త జీవితాన్ని నిర్మించుకోవాలని కోరారు. చివరగా, అడవుల్లో ఉన్న ఇతర మావోయిస్టులకు కూడా ఆయన ఒక సందేశాన్ని ఇచ్చారు. హింసను వీడి బయటకు రండి.. నేరుగా గానీ, కుటుంబ సభ్యుల ద్వారా గానీ పోలీసులను సంప్రదించండి అని పిలుపునిచ్చారు. లొంగిపోయిన వారికి ప్రభుత్వం తరపున భూమి, ఆర్థిక సాయం , ఇతర ప్రయోజనాలు అందుతాయని ఆయన భరోసా ఇచ్చారు.
Next Story