బిల్ గేట్స్ ఏపీకి ఏమి సహకారం అందిస్తారు?

ఉదయం 8:10 గంటలకు గన్నవరం విమానాశ్రయానికి చేరుకున్న గేట్స్‌ను విద్య, ఐటీ శాఖల మంత్రి నారా లోకేష్, హోం మంత్రి అనిత, వ్యవసాయ శాఖ మంత్రి అచ్చెన్నాయుడు, ఆరోగ్య శాఖ మంత్రి సత్య కుమార్ యాదవ్ సహా ప్రభుత్వ అధికారులు ఘనంగా స్వాగతించారు. అక్కడి నుంచి బృందం సచివాలయానికి బయలుదేరింది.

ఏపీ సచివాలయంలో బిల్ గేట్స్ తో ముఖ్యమంత్రి చంద్రబాబు నాయుడు

చివాలయంలో ఉన్నత స్థాయి సమావేశాలు

సచివాలయంలో ఉదయం 10 గంటలకు ముఖ్యమంత్రి ఎన్ చంద్రబాబు నాయుడు, డిప్యూటీ సీఎం పవన్ కల్యాణ్, ఐటీ మంత్రి నారా లోకేష్‌లతో గేట్స్ బృందం విస్తృత చర్చలు జరిపింది. రాష్ట్రంలోని 'సంజీవని' వంటి రియల్-టైమ్ హెల్త్ మానిటరింగ్ ప్రాజెక్టు, AI-ఆధారిత ఆరోగ్య సంస్కరణలు, డ్రోన్-AI సాయంతో వ్యవసాయం, రియల్-టైమ్ గవర్నెన్స్ సిస్టమ్ (RTGS) వంటి కీలక కార్యక్రమాలపై సమీక్ష జరిగింది.

ముఖ్యమంత్రి చంద్రబాబు నాయుడు రియల్-టైమ్ గవర్నెన్స్ కేంద్రం (RTGS)లో గేట్స్‌కు ప్రత్యేక ప్రెజెంటేషన్ ఇచ్చారు. రాష్ట్రంలో సాంకేతికత సాయంతో గవర్నెన్స్ ఎలా మార్పు చెందుతోందన్న విషయాలను వివరించారు. ఈ కేంద్రం ద్వారా ప్రభుత్వ యంత్రాంగం సరైన సమయంలో ప్రజల సమస్యలను పరిష్కరిస్తున్న విధానాలు, ఫలితాలను గేట్స్ బృందం పరిశీలించింది.

వ్యవసాయ రంగంలో కొత్త ఆశలు

సమావేశాల అనంతరం గేట్స్ బృందం అమరావతి సమీపంలోని ఉండవల్లి గ్రామం వద్ద ఒక వ్యవసాయ క్షేత్రాన్ని సందర్శించనుంది. అక్కడ డ్రోన్ సాయంతో పంటల పర్యవేక్షణ, AI-ఆధారిత వ్యవసాయ పద్ధతులు, ఆధునిక సాంకేతికతలతో రైతులకు సహాయం చేస్తున్న కార్యక్రమాలను పరిశీలించనున్నారు. గేట్స్ ఫౌండేషన్ సహకారంతో వ్యవసాయ రంగంలో కొత్త సాంకేతికతలు అమలు చేయడం ద్వారా రైతుల ఆదాయాలు పెంచడం, ఉత్పాదకత పెంచడం లక్ష్యంగా చర్చలు జరుగనున్నాయి.

ఆరోగ్య రంగంలో గేమ్ చేంజర్

గేట్స్ ఫౌండేషన్ సహకారంతో రాష్ట్రం అమలు చేస్తున్న 'సంజీవని' ప్రాజెక్టు ఈ సందర్శనలో కీలకం. ఇది రియల్-టైమ్ హెల్త్ మానిటరింగ్ వ్యవస్థ, ఇందులో AI సాయంతో రోగ నిర్ధారణ, చికిత్సలు, ఆరోగ్య సేవలు అందించడం జరుగుతోంది. కుప్పం నుంచి మొదలైన ఈ ప్రాజెక్టు ఇప్పుడు చిత్తూరు జిల్లా అంతటా విస్తరించింది. త్వరలో రాష్ట్రవ్యాప్తంగా అమలు చేయనున్నారు. ఇది 'ఆరోగ్యవంతమైన ఆంధ్రప్రదేశ్' లక్ష్యాన్ని సాధించడంలో కీలకం అని మంత్రులు వ్యాఖ్యానించారు.

గేట్స్ ఫౌండేషన్‌తో భాగస్వామ్యం, AI ద్వారా ఆరోగ్య సంస్కరణలు: ఆరోగ్య మంత్రి

గేట్స్ ఫౌండేషన్ నుంచి సాంకేతిక సహాయంతో పబ్లిక్ హెల్త్‌కేర్‌లో సమగ్ర సంస్కరణలను ఆంధ్రప్రదేశ్ ప్రారంభిస్తోందని ఆరోగ్య మంత్రి సత్య కుమార్ యాదవ్ తెలిపారు.

ఆదివారం ఒక ప్రకటన విడుదల చేశారు. ఈ భాగస్వామ్యం ముఖ్యమంత్రి ఎన్ చంద్రబాబు నాయుడు ‘ఆరోగ్యవంతమైన ఆంధ్రప్రదేశ్’ లక్ష్యాన్ని సాధించాలనే దృష్టితో సరిపోతుందన్నారు. ఈ సహకారం ప్రధాన లక్ష్యం ఆధునిక సాంకేతికత, వ్యవస్థాగత సంస్కరణల ద్వారా అందరికీ సరసమైన ఆరోగ్య సంరక్షణను అందించడమని సత్య కుమార్ యాదవ్ అన్నారు.

ఫౌండేషన్ సిఫార్సు మేరకు రాష్ట్రం 10 అంతర్జాతీయ నిపుణులతో కూడిన హై-పవర్ ఎక్స్‌పర్ట్ అడ్వైజరీ గ్రూప్‌ను ఏర్పాటు చేసిందని, ఇది ప్రస్తుత ఆరోగ్య వ్యవస్థలను సమీక్షించి సంస్కరణలను సూచిస్తుందని మంత్రి తెలిపారు. టాటా ఎండీతో కలిసి ‘సంజీవని’ అనే ఇంటిగ్రేటెడ్, రియల్-టైమ్ హెల్త్ మానిటరింగ్ కార్యక్రమాన్ని ప్రారంభించామని, కుప్పం‌లో మొదలైన పైలట్ ప్రాజెక్ట్‌ను చిత్తూరు జిల్లా అంతటా విస్తరించామని, త్వరలో రాష్ట్రవ్యాప్తంగా అమలు చేయనున్నట్లు చెప్పారు.

ఆరోగ్య సేవల్లో AI-ఆధారిత సాంకేతికతలను ప్రవేశపెట్టడానికి రాష్ట్రం ఇప్పటికే కార్యాచరణ తీసుకుంటోందని కూడా అన్నారు. ఫౌండేషన్ మద్దతుతో ప్రభుత్వం AI-ప్రారంభిత వైద్య పరికరాలు, సొల్యూషన్లను గుర్తించడానికి ‘మెడ్‌టెక్ చాలెంజ్’ను ప్రారంభించిందని మంత్రి వెల్లడించారు.

భవిష్యత్ చర్యలు

ఈ సందర్శనలో గేట్స్ ఫౌండేషన్తో మరిన్ని భాగస్వామ్యాలు ఏర్పాటు చేసుకోవడం, 'మెడ్‌టెక్ చాలెంజ్' వంటి కార్యక్రమాల ద్వారా AI-ఆధారిత వైద్య పరికరాలు అభివృద్ధి చేయడం, విద్యా రంగంలో కొత్త సాంకేతికతలు ప్రవేశపెట్టడం వంటి అంశాలపై చర్చలు జరుగనున్నాయి. రాష్ట్ర ప్రభుత్వం ఈ సహకారాన్ని 'విజన్ 2047'తో ముడిపెట్టి ముందుకు తీసుకెళ్లాలని భావిస్తోంది.

బిల్ గేట్స్ సందర్శన ఆంధ్రప్రదేశ్‌ను సాంకేతికత, ఆరోగ్యం, వ్యవసాయ రంగాల్లో ముందుకు నడిపించే మైలురాయిగా మారనుందని రాజకీయ, అధికార వర్గాలు ఆశాభావం వ్యక్తం చేస్తున్నాయి. ఈ సందర్శన సమయంలో సురక్షిత వాతావరణం కల్పించడానికి పోలీసు శాఖ అన్ని ఏర్పాట్లు చేసింది.