ఉమ్మడి ‘విశాఖ’లో మూకుమ్మడి ‘ఉత్సవ్‌’!

తెలుగుదేశం ప్రభుత్వం అధికారంలో ఉన్నప్పుడు విశాఖ ఉత్సవ్‌ను దాదాపు క్రమం తప్పకుండా నిర్వహించేది. డిసెంబర్‌/జనవరి నెలల్లో విశాఖ సాగరతీరంలో అట్టహాసంగా విశాఖ ఉత్సవ్‌ పేరిట హంగామా చేసేది. 2019లో వైఎస్సార్‌సీపీ అధికారాన్ని చేపట్టాక ఆ ఏడాది నిర్వహించింది. ఆ తర్వాత ఆ ఉత్సవ్‌కు మంగళం పాడింది. ఆరేళ్ల తర్వాత మళ్లీ ఇప్పుడు విశాఖ ఉత్సవ్‌కు కూటమి సర్కార్‌ తయారవుతోంది. అయితే ఈసారి ఉత్సవ్‌కు ఓ ప్రత్యేకత ఉంది. గతంలో టీడీపీ ప్రభుత్వం ఈ ఉత్సవ్‌ను నిర్వహించిన సమయంలో విశాఖపట్నం జిల్లా ఒక్కటే ఉండేది. కానీ నాలుగేళ్ల క్రితం వైఎస్సార్‌సీపీ ప్రభుత్వం ఈ జిల్లాను విశాఖపట్నం, అనకాపల్లి, అల్లూరి సీతారామరాజు జిల్లాలుగా విభజించింది. దీంతో ఇప్పుడు ఆ మూడు జిల్లాలను కలుపుకుని విశాఖపట్నం, అనకాపల్లి, అరకులోయల్లో విశాఖ ఉత్సవ్‌ను ఉమ్మడిగా నిర్వహించాలని నిర్ణయించింది. గతంలో మూడు నాలుగు రోజులకే పరిమితమైన ఈ ఉత్సవ్‌ ఈసారి తొమ్మిది రోజుల పాటు అంటే ఈనెల 24 నుంచి ఫిబ్రవరి 1వ తేదీ వరకు కొనసాగించనుంది. తద్వారా దేశంలోనే బిగ్గెస్ట్‌ బీచ్‌ ఫెస్టివల్‌గా పర్యాటకరంగంలో సరికొత్త చరిత్ర సృష్టించాలని తపిస్తోంది.

గతంలో ఆర్కే బీచ్‌లో నిర్వహించిన విశాఖ ఉత్సవ్‌ (ఫైల్‌ ఫోటో)