జర్నలిజంలో విలువల పునరుద్ధరణ జరగాలి

ప్రజాస్వామ్యంలో మీడియా పాత్ర అత్యంత కీలకం, కానీ ప్రస్తుతం జర్నలిజంలో విలువలు, సిద్ధాంతాలు పడిపోతుండటం ఆందోళనకరమని, అబద్ధాలను నిజాలుగా చిత్రీకరించే ధోరణిని వీడి, విలువల పునరుద్ధరణకు జర్నలిస్టులు కృషి చేయాలి అని ముఖ్యమంత్రి నారా చంద్రబాబు నాయుడు పిలుపునిచ్చారు. శనివారం విజయవాడ తుమ్మలపల్లి కళాక్షేత్రంలో జరిగిన ఐజేయూ 11వ ప్లీనరీలో ఆయన ముఖ్య అతిథిగా పాల్గొని ప్రసంగించారు. గత ఐదేళ్ల అణచివేత పాలనలో జర్నలిస్టులకు ప్రశ్నించే స్వేచ్ఛ కూడా లేదని, నేడు తమ ప్రభుత్వం విలేకరులకు పూర్తి భరోసాను, స్వేచ్ఛను కల్పించిందని ఆయన స్పష్టం చేశారు. సోషల్ మీడియాలో జరుగుతున్న తప్పుడు ప్రచారాలను అరికట్టడంలో జర్నలిస్టులు బాధ్యతాయుతంగా వ్యవహరించాలని కోరుతూనే, విలేకరుల సంక్షేమానికి తమ ప్రభుత్వం కట్టుబడి ఉందని సీఎం పునరుద్ఘాటించారు.