ఏపీలో ఒకవైపు సెగలు.. మరోవైపు ఉరుములు

సోమవారం నాడు ఉత్తరాంధ్ర జిల్లాలైన శ్రీకాకుళం, విజయనగరం, పార్వతీపురం మన్యం ప్రాంతాల్లో వాతావరణం ఒక్కసారిగా చల్లబడే అవకాశం ఉంది. ఈ జిల్లాల్లో పలుచోట్ల ఉరుములు, మెరుపులతో కూడిన వర్షాలు కురిసే అవకాశం ఉందని విపత్తుల నిర్వహణ సంస్థ తెలిపింది. ముఖ్యంగా ఆకాశం మేఘావృతమైనప్పుడు పిడుగులు పడే ప్రమాదం ఎక్కువగా ఉందని, ఈ సమయంలో ప్రజలు బహిరంగ ప్రదేశాల్లో ఉండకూడదని అధికారులు హెచ్చరిస్తున్నారు.

కేవలం ఉత్తరాంధ్రకే పరిమితం కాకుండా కోస్తా ఆంధ్ర, రాయలసీమలోని పలు జిల్లాల్లో కూడా వర్ష ప్రభావం ఉండనుంది. అల్లూరి సీతారామరాజు, విశాఖపట్నం, అనకాపల్లి నుంచి మొదలుకొని ఉమ్మడి గోదావరి జిల్లాలు, కృష్ణా, గుంటూరు, ఎన్టీఆర్ జిల్లాల వరకు అక్కడక్కడా తేలికపాటి జల్లులు కురిసే అవకాశం ఉంది. అలాగే రాయలసీమలోని కర్నూలు, నంద్యాల, అనంతపురం, శ్రీసత్యసాయి జిల్లాల్లో కూడా వాతావరణం మారి వర్షం పడవచ్చు. ఈ ఆకస్మిక వర్షాలు అటు ఎండ నుంచి కాస్త ఉపశమనం కలిగించినప్పటికీ, పిడుగుల భయం మాత్రం పొంచి ఉంది.

వాతావరణంలో సంభవిస్తున్న ఈ మార్పుల నేపథ్యంలో ప్రజలు అప్రమత్తంగా ఉండాలని విపత్తుల నిర్వహణ సంస్థ సూచించింది. ముఖ్యంగా పిడుగులు పడే సమయంలో చెట్ల కిందకు చేరవద్దని, విద్యుత్ స్తంభాలకు దూరంగా ఉండాలని హెచ్చరించింది. వ్యవసాయ పనుల్లో ఉన్న రైతులు, పశువుల కాపరులు సురక్షితమైన భవనాల్లో తలదాచుకోవాలని కోరింది. ఎండలు, అకాల వర్షాల మిశ్రమ వాతావరణం దృష్ట్యా ఆరోగ్య పరంగా కూడా జాగ్రత్తలు తీసుకోవాలని సూచిస్తున్నారు.