ఫీజు కడితేనే డ్రోన్ ఎగురుతుంది
ఏపీలో డ్రోన్ సేవలకు సర్వీస్ రూల్స్.
ఆంధ్రప్రదేశ్ను డ్రోన్ టెక్నాలజీకి హబ్గా మార్చే ప్రయత్నంలో రాష్ట్ర ప్రభుత్వం మరో కీలక నిర్ణయం తీసుకుంది. ఇకపై రాష్ట్రంలో డ్రోన్ సర్వీసులను ఉచితంగా పొందడం సాధ్యం కాదని స్పష్టం చేస్తూ, ప్రైవేట్ వ్యక్తుల నుంచి ప్రభుత్వ విభాగాల వరకు ఎవరైనా సరే డ్రోన్ సేవలను వినియోగించుకోవాలంటే ప్రభుత్వం నిర్ణయించిన సేవా రుసుము చెల్లించాల్సిందేనని తేల్చిచెప్పింది. ఈ మేరకు రాష్ట్ర పెట్టుబడులు, మౌలిక వసతుల శాఖ ప్రత్యేక ప్రధాన కార్యదర్శి ఎంటీ కృష్ణబాబు అధికారిక ఉత్తర్వులు జారీ చేశారు. ఏపీ డ్రోన్ కార్పొరేషన్ను నోడల్ ఏజెన్సీగా నియమిస్తూ, సర్వీస్ ఛార్జీల రూపంలో కొత్త నిబంధనలను అమల్లోకి తెచ్చారు.
ఏపీడీసీ పర్యవేక్షణలోనే అంతా..
రాష్ట్రంలో డ్రోన్ సేవలన్నింటినీ క్రమబద్ధీకరించేందుకు ఏపీ డ్రోన్ కార్పొరేషన్ (APDC) ను నోడల్ ఏజెన్సీగా ప్రభుత్వం ప్రకటించింది. ఏరియల్ సర్వే, మ్యాపింగ్ నుంచి మొదలుకొని వ్యవసాయ పనులు, విపత్తు నిర్వహణ, మౌలిక వసతుల పర్యవేక్షణ, డ్రోన్ పైలట్ శిక్షణ వరకు ప్రతి అంశం ఇప్పుడు ఏపీడీసీ కనుసన్నల్లోనే సాగాలి. ప్రభుత్వం అందించే ఈ హైటెక్ సేవలకు ప్రతిఫలంగా నిర్దేశిత రుసుములను వసూలు చేసే బాధ్యతను కూడా ఈ సంస్థకే అప్పగించారు.
ఖరీదైన ప్రాజెక్టు.. తక్కువ ఫీజు
డ్రోన్ సేవల ప్రాజెక్టు విలువను బట్టి సర్వీసు చార్జీలను ప్రభుత్వం వర్గీకరించింది. ఇక్కడ గమనించాల్సిన విషయం ఏమిటంటే.. ప్రాజెక్టు విలువ పెరిగే కొద్దీ సేవా రుసుము శాతం తగ్గుతుంది.
రూ. 50 లక్షల లోపు వ్యయం చేసే చిన్న ప్రాజెక్టులకు 5 శాతం ఫీజు కట్టాలి.
రూ. 50 లక్షల నుంచి రూ. కోటి లోపు విలువైన సేవలపై 3.75 శాతం చార్జీ ఉంటుంది.
రూ. కోటి దాటిన భారీ ప్రాజెక్టులకు కేవలం 2.50 శాతం సర్వీసు చార్జీగా నిర్ణయించారు.
ప్రభుత్వ శాఖలకు గట్టి ఆదేశం
ప్రభుత్వ విభాగాలు కూడా ఈ నిబంధనల నుంచి మినహాయింపు పొందలేవు. వివిధ ప్రభుత్వ శాఖలు తమ అవసరాల కోసం (ఉదాహరణకు భూముల సర్వే లేదా పంటల పర్యవేక్షణ) డ్రోన్లను ఉపయోగించాలంటే, తప్పనిసరిగా ఏపీ డ్రోన్ కార్పొరేషన్ ద్వారానూ వెళ్లాల్సి ఉంటుంది. అంతేకాకుండా, సేవలు పొందడానికి ముందే అడ్వాన్స్ ఫీజు (Advance Fee) వసూలు చేసే అధికారాన్ని ఏపీడీసీకి ప్రభుత్వం కట్టబెట్టింది. అంటే, ఏ డిపార్ట్మెంట్ అయినా సరే.. జేబులో డబ్బు ఉంటేనే డ్రోన్ గాల్లోకి లేస్తుందన్నమాట.
పారదర్శకత కోసం సరికొత్త అడుగు
ఈ రుసుముల విధింపు ద్వారా డ్రోన్ సేవల వినియోగంలో జవాబుదారీతనం పెరుగుతుందని ప్రభుత్వం భావిస్తోంది. పరిశోధనలు, ప్రజాసేవలు, లాజిస్టిక్స్ రంగాల్లో డ్రోన్ల వినియోగాన్ని ప్రోత్సహిస్తూనే, కార్పొరేషన్ నిర్వహణకు అవసరమైన నిధులను ఈ సర్వీస్ చార్జీల ద్వారా సమకూర్చుకోనున్నారు. మొత్తానికి, ఏపీ ఆకాశంలో డ్రోన్ల సందడి పెరగడమే కాకుండా, అది ప్రభుత్వ ఖజానాకు కూడా కొత్త ఆదాయ వనరుగా మారనుంది.
Next Story