ఒకే ఒక్క క్లిక్తో ఆ ఎమ్మెల్యే బ్యాంక్ ఖాతా ఖాళీ..మీరూ జాగ్రత్త
నిమిషాల వ్యవధిలోనే ఏకంగా రూ. 12 లక్షలు ఆవిరైపోవడంతో ఆయన ఒక్కసారిగా షాక్కు గురయ్యారు.
సైబర్ నేరగాళ్ల మాయాజాలం ఇప్పుడు సామాన్యుల ఇంటి గడప దాటి ఏకంగా ప్రజాప్రతినిధుల గదుల్లోకి ప్రవేశించింది. నిత్యం ప్రజల్లో ఉంటూ అప్రమత్తంగా ఉండే నాయకులనే ఈ మాయగాళ్లు బురిడీ కొట్టిస్తున్నారు. తాజాగా ఏలూరు జిల్లా పోలవరం ఎమ్మెల్యే చిర్రి బాలరాజు సైబర్ కేటుగాళ్ల వలలో చిక్కుకుని నిలువునా మోసపోయారు. వాహన చలానా పేరుతో వచ్చిన ఒకే ఒక్క లింక్ ఆయన జీవితాంతం గుర్తుండిపోయే గుణపాఠాన్ని నేర్పింది. ఆ లింక్పై క్లిక్ చేసిన నిమిషాల వ్యవధిలోనే ఆయన బ్యాంక్ ఖాతా నుంచి ఏకంగా రూ. 12 లక్షలు ఆవిరైపోయాయి. అత్యంత ప్రణాళికాబద్ధంగా, సాంకేతిక పరిజ్ఞానంతో సాగిన ఈ భారీ దోపిడీ ఇప్పుడు ఆంధ్రప్రదేశ్ రాష్ట్రవ్యాప్తంగా సంచలనం సృష్టిస్తోంది.
చలానా పేరుతో చాపకింద నీరులా చేరిన ముప్పు
అసలేం జరిగిందంటే.. పోలవరం ఎమ్మెల్యే చిర్రి బాలరాజు మొబైల్కు ఆర్టీఏ (RTA) విభాగం నుంచి వచ్చినట్లుగా ఒక మెసేజ్ ప్రత్యక్షమైంది. అందులో ఆయన వాహనానికి సంబంధించి ట్రాఫిక్ చలానా పెండింగ్లో ఉందని, వెంటనే క్లియర్ చేయకపోతే ఇబ్బందులు తప్పవని హెచ్చరిస్తూ ఒక లింక్ పంపారు. అది నిజమైన ప్రభుత్వ సందేశమేనని నమ్మిన ఎమ్మెల్యే, ఏమాత్రం సందేహించకుండా ఆ లింక్ను క్లిక్ చేశారు. అంతే.. ఆ ఒక్క క్లిక్తో ఒక ప్రమాదకరమైన మాల్వేర్ యాప్ ఆయన ఫోన్లోకి నిశ్శబ్దంగా ప్రవేశించింది. ఆయనకు తెలియకుండానే ఫోన్ నియంత్రణను తన చేతుల్లోకి తీసుకున్న ఆ యాప్, కొద్దిసేపటికే జంగారెడ్డిగూడెంలోని ఇండస్ ఇండ్ బ్యాంక్ ఖాతాను ఖాళీ చేయడం మొదలుపెట్టింది. వరుసగా నగదు విత్డ్రా అవుతున్న మెసేజ్లు చూసి ఎమ్మెల్యే నివ్వెరపోయారు. నిమిషాల వ్యవధిలోనే ఏకంగా రూ. 12 లక్షలు ఆవిరైపోవడంతో ఆయన ఒక్కసారిగా షాక్కు గురయ్యారు.
రంగంలోకి పోలీసులు..కేటుగాళ్ల కోసం వేట
జరిగిన ఘోరాన్ని గుర్తించిన ఎమ్మెల్యే వెంటనే అప్రమత్తమై జీలుగుమిల్లి పోలీస్ స్టేషన్లో ఫిర్యాదు చేశారు. కేసు నమోదు చేసుకున్న పోలీసులు, సైబర్ క్రైమ్ విభాగం నిపుణులతో కలిసి రంగంలోకి దిగారు. నిందితులు ఎక్కడి నుంచి ఆపరేట్ చేస్తున్నారో తెలుసుకునేందుకు ఐపీ అడ్రస్ ట్రాకింగ్.. మాల్వేర్ యాప్ డేటాను క్షుణ్ణంగా విశ్లేషిస్తున్నారు. అత్యంత గోప్యంగా ఉండాల్సిన బ్యాంకింగ్ వివరాలను సైతం హ్యాక్ చేయగలిగారంటే, ఈ ముఠా ఎంతటి సాంకేతిక నైపుణ్యం కలిగి ఉందో అర్థం చేసుకోవచ్చు. ఒక బాధ్యతాయుతమైన పదవిలో ఉన్న ప్రజాప్రతినిధికే ఇలాంటి పరిస్థితి ఎదురవడంతో, నిరంతరం అప్రమత్తంగా ఉండాల్సిన అవసరం ఎంతైనా ఉందని పోలీసులు గుర్తు చేస్తున్నారు.
అపరిచిత లింక్స్పై నిఘా..పోలీసుల కీలక సూచనలు
ఈ ఘటన నేపథ్యంలో సైబర్ పోలీసులు ప్రజలందరికీ అత్యవసర హెచ్చరికలు జారీ చేశారు.
నకిలీ మెసేజ్ పట్ల జాగ్రత్త: చలానాలు, గిఫ్ట్ వోచర్లు, కేవైసీ (KYC) అప్డేట్ లేదా బ్యాంక్ ఖాతా బ్లాక్ అవుతుందనే పేరుతో వచ్చే అపరిచిత లింక్లను ఎట్టి పరిస్థితుల్లోనూ క్లిక్ చేయవద్దు.
అధికారిక వెబ్సైట్లనే వాడండి: ట్రాఫిక్ చలానాల వివరాల కోసం ప్రభుత్వం అధికారికంగా నిర్వహిస్తున్న e-Challan వెబ్సైట్ లేదా అధికారిక యాప్లను మాత్రమే సంప్రదించండి.
యాప్ పర్మిషన్లపై నిఘా: మీ మొబైల్లో ఏదైనా యాప్ ఇన్స్టాల్ చేసేటప్పుడు అది మీ కాంటాక్ట్స్, ఎస్ఎంఎస్ రీడ్ చేయడానికి పర్మిషన్ అడిగితే వెంటనే తిరస్కరించండి.
మోసపోతే ఏం చేయాలి?: ఒకవేళ పొరపాటున మీరు సైబర్ మోసానికి గురైతే, ఏమాత్రం ఆలస్యం చేయకుండా గోల్డెన్ అవర్ (మొదటి గంట)లోపు 1930 నంబర్కు కాల్ చేయండి లేదా www.cybercrime.gov.in లో ఫిర్యాదు చేయండి. ఇలా చేయడం వల్ల మీ డబ్బు తిరిగి పొందే అవకాశం ఉంటుంది.
Next Story