దళిత డప్పు కళాకారుడిపై స్పీకర్ అయ్యన్నపాత్రుడు దాడి
నర్సీపట్నం ఘటనపై నిప్పులు చెరుగుతున్న దళిత సంఘాలు
అమ్మవారి జాతరలో భక్తిపారవశ్యంతో డప్పు కొడుతున్న ఒక వృద్ధ దళిత కళాకారుడిపై.. సాక్షాత్తూ రాష్ట్ర అసెంబ్లీ స్పీకర్ చింతకాయల అయ్యన్నపాత్రుడు బహిరంగంగా చేయి చేసుకోవడం ఇప్పుడు ఆంధ్రప్రదేశ్లో కార్చిచ్చులా రేగుతోంది. 60 ఏళ్లు పైబడిన వృద్ధుడని కూడా చూడకుండా, విచక్షణ కోల్పోయి సదరు కళాకారుడి చెంప చెళ్లుమనిపించిన వీడియో సోషల్ మీడియాలో వైరల్ కావడంతో దళిత సంఘాలు ఆగ్రహంతో ఊగిపోతున్నాయి. రక్షణ కల్పించాల్సిన పోలీసుల కళ్లముందే ఈ అమానుషం జరగడం, బాధ్యతాయుతమైన స్పీకర్ పదవిలో ఉన్న వ్యక్తి ఇలా ప్రవర్తించడంపై సర్వత్రా నిరసనలు వ్యక్తమవుతున్నాయి. అయ్యన్నపాత్రుడిపై వెంటనే ఎస్సీ, ఎస్టీ అట్రాసిటీ కేసు నమోదు చేసి అరెస్ట్ చేయాలన్న డిమాండ్తో రాష్ట్రవ్యాప్తంగా దళిత సంఘాలు నిరసన బాట పట్టాయి.
అసలేం జరిగింది?
అనకాపల్లి జిల్లా నర్సీపట్నంలో మరిడిమాంబ అమ్మవారి జాతర అంటేనే ఆ ప్రాంతానికి ఒక పెద్ద పండుగ. డప్పుల మోత, భక్తుల కోలాహలంతో ఊరంతా సందడిగా ఉంది. ఆ కోలాహలంలో భాగంగానే 60 ఏళ్ల వృద్ధ దళిత కళాకారుడు నాగులపల్లి రామదాసు తన తోటి కళాకారులతో కలిసి ఎంతో ఉత్సాహంగా డప్పు కొడుతున్నారు. భక్తి పారవశ్యంలో మునిగి తేలుతున్న ఆ సమయంలో, అక్కడికి వచ్చిన అసెంబ్లీ స్పీకర్ అయ్యన్నపాత్రుడు ఒక్కసారిగా ఆగ్రహంతో ఊగిపోయారు. ఏం జరిగిందో తెలుసుకునే లోపే, వృద్ధుడని కూడా చూడకుండా రామదాసు చెంప చెళ్లుమనిపించడంతో ఒక్కసారిగా అక్కడ నిశ్శబ్దం ఆవరించింది. స్పీకర్ స్థాయి వ్యక్తి విచక్షణ కోల్పోయి పరుష పదజాలంతో దూషించడం చూసి అక్కడున్న వారంతా విస్తుపోయారు.
కాలు తొక్కాడు.. ఒక బలవంతపు మారుమాట
ఘటన జరిగిన తర్వాత అసలు విషయం బయటకు రాకుండా అధికార యంత్రాంగం తెరవెనుక పావులు కదిపినట్లు తెలుస్తోంది. కాలు తొక్కాడు కాబట్టే కొట్టారు అని బాధితుడితో బలవంతంగా స్టేట్మెంట్ ఇప్పించడం ఈ వ్యవహారంలో మరో వివాదాస్పద అంశంగా మారింది. ఒకవేళ కాలు తొక్కినా, దానికి శిక్షగా ఒక వృద్ధుడిని బహిరంగంగా కొట్టడం ఎంతవరకు సమంజసమని దళిత నాయకులు ప్రశ్నిస్తున్నారు. ఇది కేవలం కాలు తొక్కినందుకు జరిగిన దాడి కాదు, దళితులపై ఉన్న అహంకారానికి పరాకాష్ట అని వారు ధ్వజమెత్తుతున్నారు. తప్పును బాధితుడి మీదకే నెట్టే ప్రయత్నం చేయడం అణచివేతకు నిదర్శనమని సామాజిక కార్యకర్తలు మండిపడుతున్నారు.
సోషల్ మీడియా సెన్సేషన్..ఉవ్వెత్తున ఎగసిన ఆగ్రహం
వృద్ధ దళిత డప్పు కళాకారుడిపై స్పీకర్ అయ్యన్నపాత్రుడు చేయి చేసుకున్న వీడియో సోషల్ మీడియాలో కార్చిచ్చులా వ్యాపించింది. ఈ దృశ్యాలు చూసిన కుల వివక్ష వ్యతిరేక పోరాట సంఘం (KVPS), డప్పు కళాకారుల సంఘాలు ఆగ్రహంతో ఊగిపోతున్నాయి. కళాకారులను గౌరవించాల్సిన చోట, ఇలా బహిరంగంగా అవమానించడం అరాచకానికి పరాకాష్ట అని దళిత సంఘాలు నినదిస్తున్నాయి. ఈ ఘటన సామాన్యుడి ఆత్మగౌరవంపై జరిగిన దాడిగా పరిగణిస్తూ రాష్ట్రవ్యాప్త నిరసనలకు పిలుపునిచ్చాయి.
చట్టపరమైన వేటుకు డిమాండ్..అట్రాసిటీ కేసు నమోదు చేయాలి
ఒక సామాన్య దళితుడిపై స్పీకర్ హోదాలో ఉండి దాడి చేయడం రాజ్యాంగ విరుద్ధమని కేవీపీఎస్ నేతలు మండిపడుతున్నారు. అయ్యన్నపాత్రుడిపై వెంటనే ఎస్సీ, ఎస్టీ అట్రాసిటీ కేసు నమోదు చేయాలని, చట్టం ముందు అందరూ సమానమేనని నిరూపిస్తూ ఆయనను తక్షణమే అరెస్ట్ చేయాలని వారు ప్రభుత్వాన్ని డిమాండ్ చేశారు. బాధ్యతాయుతమైన పదవిలో ఉండి విచక్షణ కోల్పోయిన వ్యక్తిపై కఠిన చర్యలు తీసుకోవాలని వారు పట్టుబడుతున్నారు.
క్షమాపణ చెప్పాలని డిమాండ్
చట్టసభల గౌరవాన్ని, ప్రజాస్వామ్య విలువలను కాపాడాల్సిన స్పీకర్ స్థానంలో ఉండి ఇలాంటి పాశవిక చర్యకు పాల్పడటం దారుణమని విదసం ఐక్య వేదిక విమర్శించింది. బాధితుడైన నాగులపల్లి రామదాసుకు అయ్యన్నపాత్రుడు వెంటనే బహిరంగ క్షమాపణ చెప్పాలని డిమాండ్ చేసింది. అణగారిన వర్గాల పట్ల అహంకారపూరిత వైఖరిని ప్రదర్శిస్తే తీవ్ర పరిణామాలు ఉంటాయని హెచ్చరించింది.
కోవెలకుంట్లలో దిష్టిబొమ్మల దహనం
నంద్యాల జిల్లా కోవెలకుంట్లలో నిరసన జ్వాలలు మిన్నంటాయి. దళిత సంఘాల నేతలు అయ్యన్నపాత్రుడికి వ్యతిరేకంగా నినాదాలు చేస్తూ ఆయన దిష్టిబొమ్మను దహనం చేశారు. ఈ అన్యాయంపై మౌనంగా ఉండే ప్రసక్తే లేదని, రాష్ట్ర ప్రభుత్వం స్పందించి చర్యలు తీసుకోకపోతే నేరుగా జాతీయ ఎస్సీ, ఎస్టీ కమిషన్కు ఫిర్యాదు చేస్తామని నేతలు అల్టిమేటం జారీ చేశారు. అణచివేతకు వ్యతిరేకంగా ఈ పోరాటం మరింత ఉధృతం చేస్తామని వారు స్పష్టం చేశారు.
ఖాకీల మౌనం.. అప్రజాస్వామికం
ఈ ఘోరం జరుగుతున్నప్పుడు అక్కడ సామాన్యులెవరూ లేరు సరే.. కానీ శాంతిభద్రతలను కాపాడాల్సిన సీఐ, పలువురు ఎస్ఐలు అక్కడే ఉన్నారు. ఒక బాధ్యతాయుతమైన పదవిలో ఉన్న వ్యక్తి, సామాన్యుడిపై దాడి చేస్తుంటే వారించాల్సిన పోలీసులు.. కనీసం నోరు మెదపకుండా ప్రేక్షక పాత్ర పోషించడం ఇప్పుడు తీవ్ర విమర్శలకు దారితీస్తోంది. రాష్ట్రంలో కూటమి ప్రభుత్వం వచ్చిన తర్వాత దళితులపై దాడులు పెరిగాయని వైఎస్సార్సీపీ ఎస్సీ సెల్ ఆరోపించింది. ఖాకీ చొక్కా వేసుకున్న వారు చట్టానికి కాకుండా, కేవలం అధికారానికి మాత్రమే తలవంచుతారా? అన్న ప్రశ్నలు వెల్లువెత్తుతున్నాయి.
Next Story