S.I.Rతో ఓటర్ల జాబితాలో భారీగా కోత ..
12 రాష్ట్రాలు, 3 కేంద్రపాలిత ప్రాంతాల్లో 6.08 కోట్ల పేర్లు తొలగింపు..
ఓటరు జాబితా సవరణ ప్రక్రియలో భాగంగా దేశంలోని పలు రాష్ట్రాల్లో భారీ మార్పులు చోటుచేసుకున్నాయి. తొమ్మిది రాష్ట్రాలు, మూడు కేంద్రపాలిత ప్రాంతాలతో కలిపి సుమారు 6.08 కోట్ల ఓటర్ల పేర్లను తొలగించారు. గత సంవత్సరం అక్టోబర్ 27న ఈ ప్రక్రియ ప్రారంభమైనప్పుడు.. ఈ రాష్ట్రాలు, కేంద్రపాలిత ప్రాంతాల్లో మొత్తం ఓటర్ల సంఖ్య సుమారు 51 కోట్లుగా ఉండేది. అయితే తాజా సవరణల తర్వాత ఈ సంఖ్య 44.92 కోట్లకు తగ్గింది.
ఇటీవల ఉత్తర ప్రదేశ్ తన తుది ఓటర్ల జాబితాను విడుదల చేయడంతో, S.I.R రెండవ దశ పూర్తయింది. ఈ దశలో ఉత్తర ప్రదేశ్, పశ్చిమ బెంగాల్, తమిళనాడు, రాజస్థాన్, ఛత్తీస్గఢ్, కేరళ, గుజరాత్, మధ్యప్రదేశ్, గోవా రాష్ట్రాలతో పాటు పుదుచ్చేరి, అండమాన్ & నికోబార్ దీవులు, లక్షద్వీప్ కేంద్రపాలిత ప్రాంతాలు కూడా ఉన్నాయి.
ఈ ప్రక్రియను ఎన్నికల సంఘం గత కొన్ని నెలలుగా క్రమంగా అమలు చేసింది. రాష్ట్రాల ప్రధాన ఎన్నికల అధికారులు అందించిన సమాచారం ఆధారంగా తుది జాబితాలను తయారుచేశారు.
బీహార్లో ఈ ప్రక్రియ ఇప్పటికే పూర్తయింది. త్వరలో మరిన్ని రాష్ట్రాల్లో కూడా S.I.R అమలు చేయాలని ఎన్నికల సంఘం భావిస్తోంది. ఐదు అసెంబ్లీ ఎన్నికలు పూర్తయ్యాక మిగిలిన రాష్ట్రాలు, కేంద్రపాలిత ప్రాంతాల్లో సుమారు 40 కోట్ల ఓటర్లను ఈ ప్రక్రియలో చేర్చే అవకాశం ఉంది.
ఇదిలా ఉండగా, ఈ చర్యపై కొంత రాజకీయ వివాదం కూడా నెలకొంది. ముఖ్యంగా తమిళనాడు, పశ్చిమ బెంగాల్ రాష్ట్రాల్లో కొన్ని రాజకీయ పార్టీలు S.I.R ప్రక్రియను సవాలు చేస్తూ సుప్రీంకోర్టును ఆశ్రయించాయి.
మొత్తంగా చూస్తే ఓటర్ల జాబితాను శుద్ధి చేయడమే లక్ష్యంగా ఎన్నికల సంఘం ఈ చర్యలు చేపట్టినప్పటికీ, దీని ప్రభావంపై రాజకీయంగా చర్చ కొనసాగుతోంది.
