తుచ్ఛమైన డబ్బుపై నాకు మోజు లేదన్న మంగ్లీ, లాయర్ పై ఎదురు కేసు

ఈ సందర్భంగా ఆమె కన్నీటి పర్యంతమైంది. తనపై వస్తున్న ‍అసత్య ప్రచారంపై తన బాధను వ్యక్తం చేసింది. ఎవరో వచ్చి నాపై ఆరోపణలు చేస్తే.. ఏది పడితే రాయొద్దని మీడియాకు విజ్ఞప్తి చేసింది. తనకు ఎలాంటి వ్యాపారాలు లేవని.. కేవలం పాటే నా ప్రాణమని మంగ్లీ ఆవేదన తెలిపింది. నిజనిజాలు తెలుసుకోకుండా నా గురించి ఎలాంటి కథనాలు ప్రసారం చేయవద్దని కోరింది. నేను కూడా సోషల్ మీడియా నుంచే వచ్చానని.. కానీ అదే నాకు శాపంగా మారుతుందని ఏనాడూ అనుకోలేదని ఆవేదన వ్యక్తం చేసింది.

ఆ వ్యక్తి కేవలం ఫేమస్ అవ్వడం కోసమే నాపై ఆరోపణలు చేస్తున్నాడని మంగ్లీ అన్నారు. నన్ను, నా ఫ్యామిలీని రోడ్డుకు లాగకండని కోరింది. మీడియా అంటే తనకు చాలా గౌరవం ఉందని.. దయచేసి ఈ విషయంలో మీరు వెనక, ముందు చూసుకోవాలని సూచించింది. ఎవరెవరో నేనంటే పడని వాళ్లు.. నాపై ఆరోపణలు చేస్తుంటారని అన్నారు. నాపై పార్టీ ముద్రలు వేయడంతో 2003 తర్వాత ఏ పార్టీకి కూడా తాను పాటలు కూడా పాడలేదన్నారు.

మైక్రోఫైనాన్స్ పేరుతో మంగ్లీ తనను రూ. 10 కోట్లు మోసం చేశారంటూ గతంలో అడ్వకేట్ సుబ్బారావు పంజాగుట్ట పోలీస్ స్టేషన్‌లో ఫిర్యాదు చేశారు. దీనిపై స్పందించిన మంగ్లీ, ఆ ఆరోపణలు కేవలం తనను లక్ష్యంగా చేసుకుని చేస్తున్నవేనని స్పష్టం చేశారు.

డ్రగ్స్ కేసు మొదలుకొని తాజాగా మైక్రోఫైనాన్స్ వరకు వరుస వివాదాలతో మంగ్లీ పేరు వార్తల్లో నిలుస్తోంది. ఈ తాజా ఫిర్యాదుపై కేసు నమోదు చేసిన పోలీసులు దర్యాప్తును ముమ్మరం చేశారు.