పాఠశాల ఆవరణల్లో దుకాణాలా? హైకోర్టు సీరియస్

చిత్తూరు జిల్లా బైరెడ్డిపల్లి హైస్కూల్ వద్ద రూ.50 లక్షలతో, వి.కోట పాఠశాల వద్ద రూ.25 లక్షల అంచనా వ్యయంతో వాణిజ్య సముదాయాలను నిర్మించాలని అధికారులు నిర్ణయించారు. ఈ నిర్ణయాన్ని వ్యతిరేకిస్తూ విశ్రాంత ఉపాధ్యాయుడు నారాయణరెడ్డి సోమచంద్రరెడ్డి హైకోర్టును ఆశ్రయించారు. విద్యాాలయాల పవిత్రతను కాపాడాలని కోరుతూ ఆయన దాఖలు చేసిన పిటిషన్‌పై న్యాయమూర్తి జస్టిస్‌ న్యాపతి విజయ్‌ శుక్రవారం విచారణ చేపట్టారు.

పిటిషనర్‌ తరఫున సీనియర్‌ న్యాయవాది కేజీ కృష్ణమూర్తి వాదనలు వినిపిస్తూ.. పాఠశాల ఆవరణలో వాణిజ్య కార్యకలాపాలు సాగితే విద్యార్థుల ఏకాగ్రత దెబ్బతింటుందని కోర్టుకు వివరించారు. బయటి వ్యక్తుల రాకతో పాఠశాల వాతావరణం కలుషితమవుతుందని, ఇది విద్యార్థుల చదువుపై తీవ్రమైన ప్రతికూల ప్రభావం చూపుతుందని పేర్కొన్నారు.

న్యాయవాది వాదనలతో ఏకీభవించిన న్యాయమూర్తి, సదరు పాఠశాలల వద్ద ఎటువంటి వాణిజ్య నిర్మాణాలను చేపట్టవద్దని ప్రభుత్వానికి స్పష్టమైన ఆదేశాలు ఇచ్చారు. ఈ వ్యవహారంపై పూర్తి వివరాలతో కౌంటర్‌ అఫిడవిట్ దాఖలు చేయాలని ప్రభుత్వాన్ని ఆదేశిస్తూ, తదుపరి విచారణను వచ్చే వారానికి వాయిదా వేశారు.