పేదరికంపై ’శవం‘ ప్రయాణం

బాపట్ల జిల్లా కర్లపాలెం మండలం చింతాయపాలెం గ్రామానికి చెందిన నక్కా నాగేశ్వరరావు (55) అనే వ్యక్తి మంగళవారం ఉదయం గుండెపోటుతో కుప్పకూలారు. ప్రాణాలు కాపాడుకోవాలనే ఆశతో కుటుంబ సభ్యులు ఆయన్ను బైక్‌పైనే బాపట్ల ఏరియా ఆస్పత్రికి తరలించారు. అయితే, అప్పటికే ఆయన మృతి చెందినట్లు వైద్యులు ధ్రువీకరించారు. మరణవార్త విన్న దుఃఖంలో ఉన్న ఆ కుటుంబానికి మృతదేహాన్ని ఇంటికి తీసుకెళ్లడం పెద్ద భారమైంది. ప్రభుత్వ ఆసుపత్రిలో మృతదేహాలను తరలించే మహాప్రస్థానం వాహనం అందుబాటులో లేదు. ప్రైవేటు ఆటోలను ఆశ్రయిస్తే వారు రూ. 2,000 నుంచి రూ. 3,000 వరకు డిమాండ్ చేశారు. రెక్కాడితే గానీ డొక్కాడని ఆ నిరుపేద కుటుంబం వద్ద అంత డబ్బు లేకపోవడంతో, విధిలేక తండ్రి శవాన్ని బైక్‌పై ఇద్దరి మధ్య కూర్చోబెట్టుకుని 13 కిలోమీటర్ల మేర ప్రయాణించి స్వగ్రామానికి తీసుకెళ్లారు.

ఈ అమానవీయ ఘటనకు సంబంధించిన దృశ్యాలు సోషల్ మీడియాలో వైరల్ కావడంతో ప్రభుత్వం, అధికారులపై విమర్శలు వెల్లువెత్తాయి. కూలి పనులు చేసుకుని జీవించే యానాది సామాజిక వర్గానికి చెందిన ఈ కుటుంబానికి ఆసుపత్రి వర్గాలు గానీ, ఇతర యంత్రాంగం గానీ కనీసం సాయం చేయలేకపోవడంపై ప్రజలు మండిపడుతున్నారు. ఆసుపత్రి వర్గాలేమో మా దృష్టికి తెస్తే సాయం చేసేవారమని అంటుంటే.. పేదలు ఆ సమయంలో ఎవరిని బ్రతిమలాడాలో తెలియని స్థితిలో ఉండటం వ్యవస్థలోని లోపాలను ఎత్తిచూపుతోంది.

ఈ ఘటనపై బాపట్ల జిల్లా కలెక్టర్ వి.వినోద్ కుమార్ స్పందించారు. బాపట్ల ఏరియా ఆసుపత్రిలో ప్రస్తుతం మహాప్రస్థానం వాహనం లేదని, దాని ఏర్పాటుకు ఇప్పటికే ప్రభుత్వానికి ప్రతిపాదనలు పంపామని వివరణ ఇచ్చారు. ఈ ఘటనపై సమగ్ర విచారణ జరపాలని డీఎంహెచ్‌వోను ఆదేశించారు. అయితే, ప్రతిపాదనలు పంపాం అనే సమాధానం మరణించిన ఆ తండ్రికి, ఆ నిస్సహాయ కొడుకు పడ్డ వేదనకు ఊరటనివ్వలేకపోయింది.